Jobi 38 - Gourmanchéma Bible

¹ Li Miali Diedo den guani Joba ku tafaagu siiga ki yedi o:

² «Ŋme n bua ki gangi gangi ki biidi n yanjaga Leni mi yanluodanmaama?

³ Ñagini ku gbanñagidigu nani o jakoando yeni, Ke n baa buali a i buali ŋan guani npo.

⁴ A den ye le min den tagi ki tinga yaa yogunu? Waani nni laa bonla kelima a nan tie yanfodaane.

⁵ Naani a bani yua n biigi ki bili ki bianu? Bi naani a bani yua n den biigi ga leni u baabu?

⁶ Ki tinga tanpuuna maa be yaa po yo? Ŋme n den bili ki tinga tanpuuli tanjigi,

⁷ Ku tiŋaagu ŋmabila n den taani ki yiini leni li pamanli, Ke U Tienu malekinba kuli mo kpaani li pamanli kpaani yaa yogunu?

⁸ Ŋme n den luoni mi ñincianma leni a buliñoana, Man den toa ki ña mi kaanu yaa yogunu?

⁹ Mini n den teni ke ku tawaligu tua mi liadili, Ke li *biigili mo tua mi bongolikaala.

¹⁰ N den sieni mi jama leni n *bali maama, Ki luoni ma leni bu buliñoabu,

¹¹ Ki den yedi: ‹A baa cua hali nekanba, Ŋan da pendi lankani, Nekanba yo ke a ñingola fuugu baa gbeni.›

*

¹² Hali ŋan ye, a kpa teni ke u yienu pudi leni u paalu? Naani a kpa waani u tiŋafaanu, wun baa cua yaa yogunu,

¹³ Ki teni li yenma n cuo ki tinga ñoakuni Ki yoagi bi nibiadiba ban suodi?

¹⁴ Lanwani ki tinga yen goa ki yendi Nani ban yen tieni mi maalima ku yoagu po maama yeni.

¹⁵ Ama bi nibiadiba naa go pia bi yenma Yaa buagu n yugidi mo baa kua.

¹⁶ Naani a kpa gedi hali mi ñincianma ñinbuna kani? Naani a kpa kua ki goadi u *kulu nni?

¹⁷ Naani bi doagidi apo mi kuuma diema buliñoana? Naani a laa mi kuuma jinjingu buliñoana?

¹⁸ Naani a faami ki tinga yabinu po? Waani nni a yaa bani laa bonla kuli po.

¹⁹ Naani a bani yaa sanu n caa mi yenma deni? Li biigili mo ye le yo,

²⁰ Ke ŋan fidi ki lingi ki cuo bi bianu, Ki go bandi yaa sani n caa bi yekaani po?

²¹ Ŋan pia yaa binciama kuli nne A baa bani laa bonla de!

²² Naani a kpa pundi mi ñima n guani ki duogi naani? Naani a laa a tatana n duogi naani,

²³ Min dogini yaa fala daali po, Mi janjanma leni bu toabu daali po?

²⁴ Naani a bani mi yenma n ña naani ki pundi tikani? Naani a bani puoli faalu n ña naani ki pundi ki tinga kuli nni?

²⁵ Ŋme n luodi ki tacianga po u sanu, Ki bili mi tañigima leni i tatantani mo yaa sanu?

²⁶ Ŋme teni ke ki taaga mii niba n ki ye yaa tinga nni, Yaa fanpienma yaa niinni ke nisaalimiali kuli ki ye,

²⁷ Ki teni ke li tinwagili ñuni mi ñima ki guo Ki teni ke ti muadi pani ki go bundi?

²⁸ Naani ki taaga pia baa? Ŋme n teni ke ku mangu yen luoni?

²⁹ O laa pomado n mali mi ñinguankaama? Ŋme n mali a tatana?

³⁰ Mi ñima yen ti juagi nani li tanli yeni, U ñingbanu tanpoli mo n tua nani ku tangu yeni.

³¹ Naani a baa fidi ki taani ki loli ŋmasoali, Bi ki loti bi naadadiba baabi?

³² Naani fini n tendi ke a ŋmabila n ña, Ŋmabiga kuli leni ki yogunu? Naani fini n gobidi o ŋmabiluomo o cenli nni?

³³ Naani a bani tanpoli bonla n cuoni maama? Naani a faami ki tinga moko n bogini ki cuoni maama?

³⁴ Naani a baa fidi ki kpedi a nialu wun pundi tanpoli po, Hali maama ke mi ñima baa jiidi ki milini a?

³⁵ Naani fini n yen soani i tañigi yin gedi? Naani yi yen yedi a: ‹Tinba nno?›

³⁶ Ŋme n tieni mi yanfuoma li pali nni? Ŋme n tieni mi yanfuoma o nilo yantiali nni?

³⁷ Ŋme n pia yaa yanfuoma n baa fidi ki coadi ti tawadi, Ki bidi tanpoli dayuadi,

³⁸ Ki teni mi wagima n cuo ki sedi A tangbana mo n cuo ki taani yenma?

³⁹ Naani fini n deli ki co o yangbanñua po o jiema? Naani fini n gbendi a yangbanbila koma,

⁴⁰ Bi yaa laabi bi kaanpaalu, Bi, bi yaa laabi ki bua ki cuo yaa yogunu?

⁴¹ Ŋme lingi li kankali po o jiema, O bila yaa mua ki diidi U Tienu Ki yalini kaa pia jiema yaa yogunu?