Jobi 37 - Gourmanchéma Bible

¹ Lani n teni ke n pali pua libi libi, Nani li baa dadi ki ŋabi yeni.

² Cengi mani, cengi mani U Tienu nialu n tangi maama Leni yaa fuugu n ña o ñoabu nni.

³ O yen teni ti tawadi kuli n ga o fuugu laabaalo, O tañigima mo n yendi ki pundi hali u tinbianu.

⁴ Mi tañigima yaa pendi, U Tienu nialu yen duni, Ki go yaa tangi leni li bali. Laa yogunu go yo, o yen ŋa mi tañigima.

⁵ U Tienu yen tiani maama lan lidi bi niba hali boncianla. Li tie yaa bancianma ke ti kan fidi ki bandi ma.

⁶ Wani n yen yedi a tatana: ‹Yaa baali mani ki tinga nni,› Ki go teni ke ki taaga leni mu tacianmu kuli n mii.

⁷ O yen sieni bi niba tuona, Ki teni bi niba kuli n bandi ke bi tie o yaa tagime.

⁸ Baa ti fuayandi yen lingi u kaanpaalu, Ki ban duani bi fali nni.

⁹ O pinpinja ña niganu po yo, Nijienu po mo yaa faagu n kpendinni ti wadi.

¹⁰ U Tienu fuoma teni ke mi ñima guani, Ki teni ke u ñingbanu mo juagi ki sedi kaanyendu.

¹¹ O gbieni ti tawadi leni mi ñima, Ki yayadi ti leni mi tañigima.

¹² Wani n teni ke ti tawadi jilini ki lindi, Ki tiendi nani wani n jagi yaala, Ki baa tieni u tingbanu nni wan puogi ti yaala kuli.

¹³ O yen soani ti yogunuba ki tinga po, Ki bua ki waani ga fala, Bi ki doagidi o *ŋanbili kipo.

*

¹⁴ Joba, diadi a tubili ki cengi laa bonla! Sedi ki bandi U Tienu tuonciama n de maama!

¹⁵ Naani a bani U Tienu n gobidi la maama, Ki teni ke o tawaligu yenma yendi?

¹⁶ Naani a bani yaala n teni ke ti tawadi juani? Naani a bani laa bancianma yanfuoma n ñani yua yaa kani?

¹⁷ A-a, ama fini wani, baa niganu po fawatonma yaa figi ki tinga nni yaa yogunu, Se ŋan yaa laadi fala.

¹⁸ Naani a baa fidi nani U Tienu yeni, Ki tandi tanpoli yua n juagi nani ban duadi yaa maduubiga yeni?

¹⁹ Waani ti tin baa yedi o yaala. Ti kan go yedi puu kuli kelima ti boanma po.

²⁰ Naani n yaa maadi, li da tie tilade ban waani o? Naani bi baa waani o yo, wan da baa li laabaalo?

²¹ Moala baa go nua mi yenma Kelima ti tawadi n doagini ma. Ama u faalu yen tugi ti ki ŋa tanpoli n yendi.

²² Mi yenma ña nijienu po yo. U Tienu yabinu ŋamu pia jilima.

²³ Ti kan fidi ki pundi U Paaciamu Kuli Daano kani, Kelima o paalu n yaba maama po. O moamoani leni o *teginma ki pia lie. O kan faligi yua n tiegi.

²⁴ Lani n teni ke li pundi bi niba n yaa fangi o. Waa diidi yaaba n nua bi yula ke bi tie yanfodaanoba.»