Jobi 36 - Gourmanchéma Bible

¹ Elihu go den suagi ki yedi:

² «Guudi waamu n baa doagidi apo, Kelima n da go pia matoama Ki baa saa U Tienu po moamoani.

³ N baa ñani n bandima hali foagima yo Ki saa yua n tagi nni po moamoani.

⁴ I moamoani, n maama naa tie boandi ka, Kelima mini yua n ye leni a yeni N tie papiendaane n bandima nni.

⁵ U Tienu pia u paalu, waa yie oba kuli mo. O pia u paalu kelima o yanfuoma n yaba maama po.

⁶ O kan cedi o nibiado n yaa ye O baa saa bi niñinniba po moamoani.

⁷ O kan buli bi niteginkaaba o nunga. O yen kaani ba ti gbandi po, Ki teni ban waagi ki ka, bi yela mo n ña.

⁸ Bi yaa tie kpaada ki luo leni i kugaali, Bi yaa ye fala yaa lolima nni,

⁹ Li tie kelima o den bua ki doagidi ba bi tuona Leni bi yiema ban den gbengidi bi yula yaa yogunu.

¹⁰ O den waani ba ban fangi bi yula, Ki cedi bi tuongolima yeni.

¹¹ Bi yaa cengi ki go tuo ki miini bi yula, Se ban kali mi kpama nni, Bi miali yema dana mo n juodi leni mi yemanma.

¹² Ama bi yaa cengi, li kpaanli n baa je ba. Bi baa kpe kelima baa bandi po.

¹³ Yaa niba n ki ŋua U Tienu, pala be U Tienu yaa cuo ba yaa yogunu. Baa miadi o *faabima.

¹⁴ Bi baa kpe bi panma nne, Bi miana mo n gbeni nani bi cancaginniba yeni.

¹⁵ Ama U Tienu wani yen taa o niñinnilo yaa fala yo ki faabi o. O yen tundi o leni fala.

¹⁶ O baa ñani a li paboanli nni, Ki lebidi li ki pa ŋa mi yemanma. A baa yaa pia mi jemanma buoli kuli.

¹⁷ Ama a yaa jia ti buudi nani o nibiado yeni, Ti buudi leni li *moamoansaali baa taani ki cuo ŋa.

¹⁸ Li pabienli n da teni ŋan tudi. Li suuli yabinu n da teni ŋan jadi.

¹⁹ Naani a bubula baa fidi ki teni ke a kan yaa ye li paboanli nni? A gbanmanu leni a jama wani baa fidi be?

²⁰ Da kuani a yama ku ñiagu nni, I nibuoli kuli n baa bodi yaagu yaa niinni.

²¹ Fangi a yuli ki da kua mi biadima nni, Kelima a ye fala nni ke ŋan da kua biadima nne.

U Tienu wani ki pia o lie

²² U Tienu paaciamu ki pia lie Ŋme n baa fidi ki bangi li bonla nani wani yeni?

²³ Ŋme n wangi o wan baa tagini yaa sanu? Ŋme n baa fidi ki yedi o: ‹A tieni ti *tuonbiadi?›

²⁴ Tiadi ki pagi o tuonli, Bi niba n pagi yaali bi yani nni.

²⁵ Nisaalo kuli ñuadi li ŋamu, Nilo kuli nua li hali foagima.

²⁶ U Tienu yaba hali maama ke ti kan fidi ki bandi o O bina mo ki pia coali.

²⁷ O yen fua a ñinboala, Ŋan ñuudi ki kpandi ki tua taaga ki go mi.

²⁸ Ti tawadi yen ŋa ga kan yaa jiindi Ki wuti bi niba po.

²⁹ Ŋme n baa bandi ku tawaligu n wuli ki ladi maama, Bi ki taaga n duni ki go tangi tanpoli po maama?

³⁰ Diidi, o yen teni o yenma n yendi ki lindi o, Ki ŋuagini mi ñincianma ñuanlu leni ma.

³¹ Wan tuuni yaa taaga n teni ke i nibuoli ye, Ki puuni ba mi jiema ke li kandi.

³² O yen kubi ki taaga o nuu nni, Ki wangi ga kan baa pua yaala.

³³ O yen doagidi o yema i tatantani nni. Baa ti yandi yen tuodi ki bandi ke o nagini.