Jobi 32 - Gourmanchéma Bible

¹ Lanwani bi jataadiba yeni den cedi kaa go guani Joba liba kuli kelima o den tua ke o tiegi.

² Lane Balakeli bijua Elihu yua n den tie Busa yua, Lama buolu yua pali den beni. O pali den beni Joba po kelima o den tua ke o tiegi U Tienu nintuali.

³ O pali den beni leni o danlitaadiba kelima baa go den fidi ki guani Joba liba kuli, ki nan li ja o ti buudi bebe.

⁴ Nani ban den kpeli o yeni, Elihu den guude ki nan yuandi ki maadi leni Joba.

⁵ Ama Elihu n den laa ke laa jataadiba naa go pia maguankaamaba kuli, o pali den beni hali boncianla.

*

⁶ Elihu Balakeli bijua yua n tie Busa yua den maadi ki yedi: «N tie jawaalo, yimo tie jakpela. Lani n teni ke n den jie ki digibi, Kaa bua ki waani yi, min bani yaala.

⁷ N den tua n yuli: ‹Nikpelo kan gbali maama A binciama danba baa doagidi mi yama.›

⁸ Ama yaala n teni ke o nisaalo pia mi yanfuoma tie U Paaciamu Kuli Daano n kuani yaa fuoma o niinni.

⁹ A binciama ka tie mi yama, A jakpela ka bani yaala n tie i moamoani.

¹⁰ Lani n teni ke n yedi: ‹Cengi mani nni! N moko baa doagidi min bani yaala.›

¹¹ N guudi hali ke yi maadi ki gbeni, Ke n cengi yi yantiana kuli, Hali yin ban biigi o mataana kuli.

¹² N cengi yi bonŋanla. Yi siiga oba kuli naa maadi ki guli Joba, Oba kuli naa fidi ki guani opo o maama.

¹³ Yin da yedi ke yi laa mi yama o niinni de! U Tienu n baa fidi ki nia ki paadi o, laa tie nisaalo ka.

¹⁴ Nani wan ki teli ki maadi leni nni yeni, Lanwani n moko kan guani o leni yi yaa maama.

*

¹⁵ Yi jie, ki naa go guandi pu! Yi naa go pia mayedikaamaba kuli.

¹⁶ N guudi, nani yin kaa go tua liba yeni, Ki sedi kaa go maadi ki guandi maamaba kuli yeni,

¹⁷ N moko, moala wani n di baa maadi ki guani, Ki waani yi mini moko min bani yaala.

¹⁸ Kelima n ñoabu nni kuli gbie maame. N pali mo tigini nni ke min maadi.

¹⁹ Mi maama yeni fiini n gbanu nani yaa daama n beni Ki bua ki padi man ye yaa dayuapandi nni yeni.

²⁰ N baa maadi ki baa ki fuo bonŋanla, N baa yaadi n ñoabu ki fidi ki guani bonŋanla.

²¹ N kan tieni gagidima bi niba siiga N kan taani yi siiga oba kuli po.

²² Kelima mii tie laa nibuolu. N yaa tieni yeni n tagido baa bolini nni tonma.