Jobi 31 - Gourmanchéma Bible

¹ N den kuani n nuni yaa kuali n tie Ke n kan diidi jafaano n yama n kua o niinni.

² Yeni yaaka, tanpoli Tienu den baa sieni nni u laa biinu yo? U Paaciamu Kuli Daano den baa soani npo be yo hali tanpoli?

³ Naani mi yebiadima ki tie ti *tuonbiadi daano po kaa? Siiga nni yema mo yaaba n tiendi yaala n ki tiegi po kaa?

⁴ Naani U Tienu ka diidi min tagini yaa sanu, Ki coadi n tayaagima kuli?

*

⁵ Li yaa tie ke n cuoni mi faama nni, N taali mo yaa jaligi ki taa i janbi sanu,

⁶ U Tienu n biigi nni yaa *bonbiigikaala n tiegi nni, Ki bandi n papienli n de maama.

⁷ Li yaa tie ke n taali jadi ki ŋa yaa sanu n tiegi, N pali yaa ŋoadi n nuni n bua yaala, Joagindiba yaa tabini n nii,

⁸ Min buli, nitoa n taa ki je! Ban ŋabi min ŋu yaa tiidi mo!

*

⁹ Li yaa tie ke n laa pua ke n yama kua o niinni, Ke n gedi n yieninlielo buliñoabu kani ki bua ki jiadi o,

¹⁰ N pua n ŋmagidi bu saabu jatoa po, Jatoaba mo n tieni o ban bua yaala!

¹¹ Kelima li tie cagindi bonla, Bi bujiaba n co bi niba yaa tagili po.

¹² Laa tagili baa tie nani yaa fantama n baa bolini nni, Ki go bolini min pia yaala kuli yeni.

*

¹³ N yaa den fali n jatuadili bi n potuadili moamoani Yaa yogunu ke ti maama den gali,

¹⁴ U Tienu yaa fii yaa yogunu, n baa tieni be? O yaa fii ki taani lienni, n baa guani be?

¹⁵ Naani yua tagi nni n naa tugu nni yeni, Wani ka den tagi bani wani? Naani Tienyendu yeni ka kuani tikuli ti naanba tugidi nni?

*

¹⁶ N yaa den muni a luoda ban bua yaala, Ki teni ke li kpepuoli mo yaa nuni moandi lipo,

¹⁷ N yaa den dini n bebe n jiema, Ke ki kpienbiga ki den baa ki dini,

¹⁸ Ama diidi, hali n bonwaama nni o fandi n yaa kani nani o baa kani yeni, Hali n bonwaama nne ke n todi li kpepuoli.

¹⁹ Naani n den laa o lianliamo ke waa pia tiayiekaadi, Ki laa taliga mo ke waa pia kpaligolikaabu,

²⁰ Ke mii den puni o n pekobidi caba Ki tongi o gbanu ke o tuondi nni?

²¹ N yaa den fii ki sedi ki kpienbiga po Kelima bi bujiaba ñii n ciaga po,

²² N boacabili n padi ki baa, N buagu mo n tugidi n nukpandunli kani ki baa ki kua kua.

²³ N jie U Tienu n soani yaa yebiadima. Mii tie puu kuli o bali kpiagidi kani.

*

²⁴ Li yaa tie ke n bili n dugidi wula nni, Ki yedi wani wula yeni: ‹N dugi apo!›

²⁵ N yaa den mangi n pali n ŋalimanciamo po Leni min soani ki baa yaa piama po,

²⁶ Min den diidi u yienu yenma, wun ñuliti yaa yogunu, Ki den diidi o ŋmaalo n den cuoni ti tawadi nni ki yieni maama,

²⁷ Naani n den tuo ke n pali boandi nni ŋasiili nni Ke n ŋoadi ki pugi ba nani i *buli yeni?

²⁸ Lani moko tie yaa tagili n pundi ki gedi ti buudi po Kelima li tie ke n ñani tanpoli Tienu puoli po yo.

*

²⁹ Naani n den mangi n pali yua den nani nni yebiadima po? Naani n den yugi ki cii leni li pamanli kelima bonbiadila tieni o po?

³⁰ Mini yua ki den tuo ke n lanbu n tieni tuonbiadi yeni, Mii den poli ki mia o kuuma.

³¹ Yaa niba n den ye n diegu nni den tua: ‹Ŋme n ki ŋmani ti nandi ki guo?›

³² O caano kan den duani ñiagu niinpo N den yen luodi n buliñoabu o sancenlo po.

*

³³ Naani n wuoni n biadima nani bi nisaaliba kuli yeni, Ki wuoni n tagili n pali nni?

³⁴ Naani n den jie bi niba maama leni bi faliga, Hali yaala ke n kan yedi liba ki kaa suo n deni?

*

³⁵ Ŋain, ŋme n baa lingi npo yua n baa cengi nni? Min pia yaa majuodikaama nne: U Paaciamu Kuli Daano n guani npo wan laa yaama! Naani n yibali n fii npo ki diani ki kuli nni leni yaa maama,

³⁶ N kan taa ma ki tugi n yuli po kaa? Naani n kan taa ma ki cibini nani ki badifogiliga yeni kaa?

³⁷ N baa waani U Tienu n tayaagima kuli n de maama, Ki cua o kani nani o badija yene.

*

³⁸ Baa min ko yaa tinga yaa fii ki koani leni nni Ke ki bana mo fii ki mua,

³⁹ Li yaa tie ke n den dini ki bonluonkaala kaa pani, Ki boandi bi tindanba pala,

⁴⁰ I konkoni n pudi *ŋalikama kaanu. Ti moabiaditi n pa *olije kaanu.» Joba majuodikaama n yeni.