Jobi 30 - Gourmanchéma Bible

¹ Ama moala wani, yaaba n tie n kani bila nua ki sengi nni, Min den fali yaaba yaa baanba, Kaa taagi ba baa yaa sangbanli n guu n yankuli siiga yeni.

² Bi den baa fidi ki tieni npo be Bani yaaba n ki den pia fidu yeni?

³ Mi koma leni mi luoma den dondi ba Ki teni ke bi sani ki teli a tinwaga po, Naankani n den tie diegbendi hali yogu.

⁴ Bi guni ti tudi kani yaa muadi, Yaa tiidi n ye mi fanpienma nni yaa jiini mo n tie bi jiema.

⁵ Bi niba kuli deli ki ñani ba bi siiga, Ki di ŋua ki yiedi ba nani a concona yeni,

⁶ Ke bi ban ye mi joayidima nni Leni ki tinga buodi nni.

⁷ Bi den laabi laabi biyaba po ku sabigu tiipo, Ke bi moe ban tuodi a tugana siiga.

⁸ Bi deli ki ñani bani Nisaalifanma fanma bila yeni mi diema nni.

*

⁹ Moala, bani n di bugini nni i yani, Ki teni ke n tua bipo li ñuali bonla.

¹⁰ Ban sengi nni maama teni ke bi sani ki ŋa nni, Ki siini n nunga nni ban bua maama.

¹¹ U Tienu n tadigi nni ki fiagi nni yeni, Ke bani moko tiendi nni ban bua yaala.

¹² Laa niba n fii ki sedi npo, Ki sedi npo hali ke bi bolini nni.

¹³ Bi jia n sanu ki tuuni ki bua ki guli nni, Bani yaaba n ki den pia todikaaba yeni.

¹⁴ Bi tagi u bilinu n padi naani ki kpendi, Ki pua beli beli a bilincaba siiga.

*

¹⁵ Ti jawaandi cuo nni boncianla, Ki taa n bulicindi kuli ki ban caa nani ku faagu yeni. N *faabima mo pendi nani ku tawaligu yeni.

¹⁶ Moala n miali dana bua ki dudi, N yema mo kuli tie fala ki tu fala bebe.

¹⁷ Ku ñiagu, fala duoliti nni ki ban kua hali n kpaba nni. Yaa fala n nugi nni yeni naa gbendi.

¹⁸ U Tienu cuo n liadinialu leni u paalu, Ki bua ki suadi nni.

¹⁹ U Tienu luni nni li ŋuabili nni, Ke n tua nani mi wagima leni mi fantanpienma yeni.

²⁰ N tangi ki yi ŋa ŋan todi nni, Ama a naa guandi nni liba kuli. N nagini ki sedi a nintuali, Ama ŋaa faami npo.

²¹ A fii npo leni mi biadima, Ki sedi npo leni a fidu kuli.

²² A teni ke ku faagu gedini nni nani yua n jagi o taamo yeni, Ki teni ke n digibi banbani.

²³ N bani ke a li caani nni mi kuuma nne Bi niba kuli n baa taani ki kadi naani.

²⁴ Naani yua n baa kpe ki yen miadi U Tienu n faabi o kaa? Naani yua n ye fala nni ki yen miadi mi todima kaa?

²⁵ Naani mii den yen mua leni yaaba yaa yema n pa bipo? Naani mii den ye leni li paboanli o luodo po?

²⁶ N yema nni n den miadi mi yemanma Ama mi yebiadima mo nan cua. N den guu mi yenma ke li *biigili mo n nan cua.

*

²⁷ N yama kuli li yagine Hali fala n li duoli nni.

²⁸ N cuoni ki boani, ama laa ŋua u yienu ka. N yen fii ki sedi baa li nitaanli nni ki kuudi.

²⁹ N kpandi i tanboe kpiilo yo, Ti tataadi mo yaa yegininlielo.

³⁰ N gbanu boandi bii N kpaba kabi ti ñinwadi po.

³¹ N kogidigu di pua i kuyane N yeliga mo todi a muamuada.