Jobi 3 - Gourmanchéma Bible

^1-2 Lan pendi Joba den yaadi o ñoabu ki soli o maadaali ki yedi:

³ «Min mali yaa daali yeni n bodi, Ki taani baa leni ban taa n tugu yaa ñiagu yeni.

⁴ Laa daali n kpandi ki tua *biigili, U Tienu yua n ye tanpoli n da taani li li baanli nni, Yenmaba kuli n da cua ki yendi laa daali!

⁵ Li biigili leni mi kuuma jinjingu n buali lipo! Yaa tawadi n biigi n cua ki libini lipo! Yaa bonla n bia n cua ki yaa jiendi li!

⁶ Laa ñiagu, li biigili n taa gu, Ban da baani ki taani gu li binli dana nni. Ban da taani gu o ŋmaalo dana coali nni!

⁷ Laa ñiagu n da go baa ku liegu Laa ñiagu n da baa pamandanyigimiba.

⁸ Yaaba n solini a dana n soli gu, Bani yaaba n baa fidi ki yini o bonfuodibiado yeni.

⁹ Laa tiŋaagu ŋmabila n biigi Kun yaa sugini mi yendima, ke li nan kan yendi Kun da baa ki le u tiŋafaanu yenma!

¹⁰ Kelima ku naa yie ban da maa nni, Yaala n bi baa teni ke n kan le o naa fala.

¹¹ Be n teni ke mii den kpe hali min den ye n naa tugu nni yaa yogunu? Be n teni ke mii den kpe min den ña o tugu nni yaa yogunu?

¹² Be n teni ke n den baa min baa kali yaa pana po? Be n teni ke n baa yaa biina n baa ŋaani nni?

¹³ Moala di bi baa sua ke n dua suo n kuli nni N bi baa yaa goa, ki ye leni mi yanduanma.

¹⁴ Mini leni ki tinga badiba, leni bi paatieba, Bani yaaba n goa ki maa yaa diena n den wudi yeni,

¹⁵ Leni yaa badijaba n pia wula Ki go gbieni bi diena leni ŋanjilifa,

¹⁶ Bi, n bi baa yaa tie nani yaa tugu n biidi n wuo maama yene. Nani ban mali yaa bila ke baa mua yeni.

¹⁷ Li kuli nne ke bi nibiadiba sedi suo, Ke yaaba n coagi, ki naa pia fidu dua ki fuo.

¹⁸ A kpaada kuli baa mi yanduanma Kaa go gba a kpaadiguuda tantani.

¹⁹ Taliginba leni bi paatieba kuli tie yenma likani, O yonbo mo baa mi *faabima leni o daano.

²⁰ Be yaa po ke U Tienu teni ke yua ye leni fala laadi u yienu pudima? Be yaa po yo ke bi puni li miali yaaba mo n ye leni li paboanli?

²¹ Bi guu mi kuuma ke maa kpendi Bi lingi ki bua ma ki cie baa ŋalimani.

²² Bi yaa bi baa bi kula, Se ban yaa ye leni li pamankandikaali.

²³ N tie nisaalo kaa bani min caa naani, Ke U Tienu mo nan pigini n sani kuli.

²⁴ N ñiindi n tie n bonjekaala. N mua ki kan fidi suo mo.

²⁵ Min jie yaala yeni, lani n nandi nni. Min bangi yaala yeni, lani n tiendi nni.

²⁶ Mii pia yanduanma, mii pia kalima, Mii pia fuodima. Yanyagidi bebe n ye leni nni.»