Jobi 29 - Gourmanchéma Bible

¹ Joba go den doagidi o moamoani ki yedi:

² «N yaa bi baa fidi ki goa ki baa yaa ŋmaali n pendi yaa yema, Nani yaa dana ke U Tienu den kubi nni yeni,

³ Nani o fidisanga n den yieni n yuli po yaa yogunu, Ke o yenma den teni ke n fidi ki cuoni li *biigili nni,

⁴ Nani n yema n den mani npo yaa yogunu ke U Tienu den tie n danli, Ki kubi n diegu bonŋanla maama yeni.

⁵ U Paaciamu Kuli Daano n den ye leni nni yaa yogunu Ke n bijaba den gaani ki lindi nni,

⁶ N taana n den paagi mi naaŋankpama nni, Ke mi kpama mo puubi ki ña ban ŋoali ma yaa tangu po.

⁷ N yaa den ñani ki baa gedi u dogu buliñoabu po, Ki teni ke bi ŋanbi npo n kalikaanu u nitaankaanu kani,

⁸ Bi jawaaba yaa den laa nni, se ban fii ki ŋa npo u kaanu, A jakpela mo n fii ki sedi suo.

⁹ Bi badijaba yen cedi bi booli, Ki taa bi nii ki pii bi ñoana.

¹⁰ Bi yudanba yen mubini bi ñoana Ki yaa ŋmini suo.

¹¹ Kelima yaa tubili n den cengi nni den tua nni: ‹Mi yemanma daano!› Yaa nunbu n den nua nni mo den tiendi npo siedi.

¹² Kelima n den faabidi yaa niñinnilo n miadi mi todima. Leni yaa kpienbiga n ki pia todika.

¹³ Yua n den baa kpe den yen gaaliti nni. N den mangidi li kpepuoli mo yaa pali.

¹⁴ N den yen taa mi *teginma ki laa, man yaa tie n liadili, N moamoani mo n den tie n liadicianli leni n finfinjuadi.

¹⁵ Mini n den tie o juamo po i nuni, Ki go den tie o wabo mo yaa po a taana.

¹⁶ N den tie a luoda po bibaa, Ki den tie o caano mo yaa todika.

¹⁷ N den yen pua ki mudi yaa nilo n ki tiegi yaagu, Ki kpibidi wan kpibi yaala o ñoabu nni.

¹⁸ Lanwani n den yen tua: ‹N baa kpe n duanu nni! N dana baa yaa yaba nani mi tanbiima yeni.

¹⁹ N jiini baa talini ki gedi mi ñima po, Ku mangu baa duani ku ñiagu n beni po.

²⁰ N baa goa ki baa min den pia yaa kpiagidi, N fidu mo n go goa ki pugini!›

*

²¹ Bi den yen cengi nni suo, Ki guu min baa tundi ba yaala.

²² N yaa den maadi ki gbeni, bi kan go liegi. N maama den yen sandi bikuli po.

²³ Bi den guu nni nani ban guu ki taaga maama yeni. Bi den yen yaa bi ñoana n maama po. Nani ki tinga ñiali n yen guu ki taaga maama yeni.

²⁴ N yaa den mangi n nunga bipo bi kan den daani. N nunmanga n den tie bipo i baagi.

²⁵ N den yen yegi leni ba ki ban kali bi liiga. N den tie nani o bado yeni li toagoli liiga, Nani yua n baagidi yaaba n ye leni li paboanli yeni.