Jobi 27 - Gourmanchéma Bible

¹ Joba go den doagidi o moamoani ki yedi:

² «U Tienu fo, wani yua n yie n moamoani yeni, Wani U Paaciamu Kuli Daano yua n teni ke n ye leni li paboanli.

³ Hali min baa yaa ye ki fo yaa banlu kuli, Ke U Tienu mo yaa fuoma baa ye n miaboni nni,

⁴ N ñoacuuna kan maadi yaa maama n ki tiegi, N lanbu mo kan pua faama.

⁵ U Tienu n wuoni nni min pa yi moani. Hali min baan kpe, n kan tuo ke n pali ki pieni.

⁶ Mini wani li se n *teginma nne, n kan ña likani, Kelima n miali yema kuli nni, N pali siedi naa buni leni nni baa dayenli po.

*

⁷ N yibali n tua nani o nibiado yeni Yua n fii ki sedi npo mo n tua nani yaa nilo n ki tiegi yeni.

⁸ Yua n ki ŋua U Tienu go pia mi laa suginme U Tienu yaa ñani o miali?

⁹ Naani U Tienu cengi o moe O yaa ye leni li paboanli yaa yogunu?

¹⁰ O yaa bi teni ke U Paaciamu Kuli Daano n tie wan bua yua, O bi baa yaa jaandi ki miadi wane yogunu kuli.

¹¹ N baa doagidi yipo U Tienu paaciamu n tie yu, N kan wuoni yi U Paaciamu Kuli Daano yanjagili.

¹² Ama yikuli n bandi ke li tie yene daa, Be n teni ke yi ŋua yaa sani n ki pia fuoma?

Yaala n ki cuoni bonŋanla kan waagi

¹³ Diidi U Tienu n bili o nibiado po yaa biinu, U Paaciamu Kuli Daano n bili o tugumoandaano po yaa panpaani nne:

¹⁴ Baa o bijaba yaa yaba, bu toabu n baa je ba, O puoliŋuani mo kan je ki guo.

¹⁵ O bijaba yaaba n sieni, mi kuuma baa je ba Bi kpepuona mo kan fidi ki mua bipo.

¹⁶ Baa o yaa dogini ŋanjilifa nani mi tama yeni, Ki dogini ti tiayiekaadi mo nani ku yoagu yeni,

¹⁷ Wani n dogindi, ama o niteginka n baa ti laa li tiadi, Yua n kaa pia tagili n baa diedi ŋanjilifa yeni.

*

¹⁸ O maa yaa dieli n ki pia fidu Nani o guudo n yen tii yaa koasugili yeni.

¹⁹ O baa duani ki tie piado ama o piama bianu n yeni, O baa fundi ki sua ke puu kuli ki go ye!

²⁰ Ti jawaanciandi yen ludi o nani mi ñime yeni, O pinpinja cua ki ñani o ku yagisiigu.

²¹ Puoli faalu taa o ki ban caa, U dadi ki ñani o leni u paalu wan bi ye naankani.

²² Bi toani o i piemi kaa gba o niñima Se wan sane ki nan baa ki cia.

²³ Bi puogi ti nupodi kelima wan laa yaa yema po, Ki sedi wan den ye naankani ki fuoni ki deli o.»