Jobi 26 - Gourmanchéma Bible

¹ Joba den goa ki yedi:

² «A ŋanbi! N laa ŋan baa fidi ki todi yua n ki pia fidu maama! N laa ŋan baa fidi ki todi yua n tadigi maama!

³ A bani ki tundi yua n luo mi yanfuoma wani de! A bani mi maama mo de!

⁴ A maadi leni ŋme yo da? Ŋme n wangi a ŋan maadi yaala ne kuli?

U Tienu paalu ki pia bianu

⁵ Mi ñincianma tiipo, Yaaba n ye lienni leni bi tinkpiba kuli digibi.

⁶ Bi tinkpiba diema nni Liba kuli ki duagi opo. U *kulu nni mo, puu kuli ki wuo opo.

⁷ O teni ke nijienu ye u damu nni, Ki teni ke ki tinga mo juani ku lengu nni.

⁸ O kubi mi ñima ti tawadi nni, Mi kpiagu naa teni ke ti tawadi padi.

⁹ O dadi ki tandi ti tawade, Ki pini o bali kalikaanu.

¹⁰ O diani boncencenli u ñingbanu po, Ki paadi li *biigili leni mi yenma.

¹¹ U Tienu yaa funi, Tanpoli benjieli jigi yen cie, yin digibi.

¹² O teni ke mi ñincianma digibi kelima o paaciamu po, Ki bolini mi ñincianma nni bonfuodibiado.

¹³ Leni o fuoma bebe, o pidi tanpoli kpali kpali. Leni o nuu paalu o muu ki ku yaa wa n tiini.

¹⁴ Line da yaa tie o tuona waamu bebe, Ke tin gbadi yaala tie i soabidi bebe, Ŋme n baa fidi ki bandi o tuonciama n de maama?»