Jobi 24 - Gourmanchéma Bible

¹ Be teni ke U Paaciamu Kuli Daano naa bili yogunu ti buudi po? Be teni ke o *nidugikaaba naa bani wan baa jia ti buudi yaa dana?

² Bi niba pugidi bi kuani ki ŋmiadi a biankpaana. Bi su ti yandi ki caani ti li kpaali.

³ Bi fie ki kpienbiga ŋunbo ki ban caa, Ki ga li kpepuoli nua ki nan ledi o.

⁴ Bi deli a luoda ki ñani ba u sanu nni Ki mabini mi diema tadima mo ke bikuli wuoni.

⁵ Diidi ki le! Bi naani leni yaa fuaŋunbi n ye mi fanpienma nni yeni. Bi ñani ki kua bi tuonli nni hali ku tiŋapanpangu, Ki baa lingi mi jiema! U tialu nni bebe yo ke bi baa baa mi jiema bi bila po.

*

⁶ Ku muagu nni bi ce ti yanmuadi, Ki liegi o nibiado kuanu nni duven tiidi bonluonkaala.

⁷ Ama bi yen duani ku ñiagu mubili, kaa laa tiadi, Baa pia kpalipinkaadi ti wadi po.

⁸ A juana nni taaga mini ki moagidi ba, Ban kaa pia kaanpaalu yene, ke bi sani ki tabini a joatana.

⁹ Bi yen fie ki kpienbiga o naa nuu nni leni u paalu Ki gaani o tadimo bonla kelima o panli po.

¹⁰ Bi cuoni mubili, baa yie tiadi Mi koma kubi ba ke bi nan tugi a dibaba.

¹¹ Nitoaba diedi nni bi ŋoali mi kpama, Ki tuodi mi daama ki nan kan baa ki ño ma.

¹² U dogu nni, yaaba n ku yenbidi, Yaaba n poagili, mo buudi. Ama U Tienu naa faami laa tuongunda kuli po!

¹³ Bi nibiadiba tie yaaba n nani mi yenma. Baa tagi mi yenma sani nni, Baa ye mi sani nni mo.

¹⁴ O nikpalo yen fii lan da biigi yaa yogunu yo Ki kpa o niñinnilo leni o luodo Ku ñiagu mo o yen tie nani li conconli yeni.

¹⁵ Li jaconconli yen guu lan bii, Wan yedi: ‹Oba kuli kan le nni.› O yen baa li cabili ki pigini o nunga.

¹⁶ Bi yen pua ki mudi a diena li *biigili nni. U yensiinu mo, se ban tundi ki lo. Baa bani mi yenma n tie yaala.

¹⁷ Bi yaa po wani, ku tiŋaagu tie mi kuuma jinjingoe. Yende, bi maani mi kuuma leni man gundi ki go bia maama.

*

¹⁸ Ama yinba wani yedi: ‹Mi ñima baa koadi o nibiado wani ki yaa ban caa. O tinga mo baa tua solindi kaanu bebe yo, O kan go gedi o duven tiidi kuanu po mo.

¹⁹ Nani u tayialu leni ku wulugu n teni ke a tatana yuodi maama, Moko bi tinkpiba diema baa gedini ti *tuonbiadi daano yene.

²⁰ O naamado baa sundi opo, A sidibila n baa je o ki gbadi bi manu. Bi kan go tiadi opo, Ti tuonbiadi daano baa kua kua nani bu tibu yeni!›

*

²¹ O yen kpabidi ki ŋoaliga, yua n ki pia biga, Kaa den tiendi li kpepuoli po mi ŋanma.

²² Ama U Tienu paaciamu po teni ke bi tugumoandanba miana foagidi. Baa ke baa go daani miali, bi suagi liiga ki baa ye.

²³ U Tienu yen teni mi yanduanma n yaa tie bi jigi, Ki yen faami bi sani kuli po.

²⁴ Bi fii, ama yogunu waamu po, baa go ye. Bi ŋmadi ki baali, ki baan pundi bi bianu nani bi nisaaliba kuli yeni. Bi yen mali nani ban yendi ti siandi maama yeni.

²⁵ Li yaa tie yeni, ŋme n baa nia nni? Ŋme n baa teni n maama n bia fanma?»