Jobi 23 - Gourmanchéma Bible

¹ Joba go den goa ki yedi:

² «Dinla moko min baa, maadi yaama Baa tie nani mi yiema yene U Tienu po, Baa ke n moa ki bua ki da ñiindi.

³ Ŋain, n yaa bi bani min baa le o naane, Ki bi baa fidi ki pundi o dene,

⁴ N bi baa doagidi o nintuali n yantugupiengu, Ki cua o kani leni yaala n doagidi ke mii pia tagili.

⁵ Lani, n bi baa bandi wan bi baa guani nni maama, N bi baa fidi ki ga wan baa yedi nni yaala.

⁶ Naani li tie tiladi wan bi moande ki jia leni nni ti buudi? Yeni ka, ama o bi baa yaa faami npo wani.

⁷ Kelima niteginka n bi baa maadi leni o, N bujialo n bi baa saa npo i moamoani ki faabi nni yaa yogunu kuli po.

*

⁸ Ama n yaa gedi puoli po waa ye lipo Nintuali po mo, mii nua o.

⁹ Naani o pia li tuonli nijienu po? Mii fidi ki laa o lipo. Naani o ban wuo niganu po yo? Mii nua o.

¹⁰ Ama o nan bani n sanu n tie yu. O yaa ti biigi nni yaa yogunu n baa ña ki ŋani nani wula yeni.

¹¹ N ŋoadi o taabuona leni o sani, Mii jadi ki tagini santo.

¹² Mii lebidi o *bali maama. N kubi n pali nni o ñoabona kuli.

*

¹³ Ama o mo yaa jagi ke o baa tieni bonla, Ŋme n baa fidi ki teni wan lebidi yanjagili? Wan bua yaala, o tiendi lane.

¹⁴ Lanwani o baa tieni wan jagi npo yaala, O go pia npo jagitoana ki pugidi.

¹⁵ Lani n teni ke n jie ki luodi o nintuali. N yaa kpaagi lipo, se min yaa jie o.

^16-17 U Tienu bolini n papaali kuli cain U Paaciamu Kuli Daano teni ke n jie ki luodi. Yaala n teni ke n ŋmini laa tie li *biigili, Bi yaa boanboanbiigili n lindi nni, ama U Tienu.