Jobi 22 - Gourmanchéma Bible

¹ Elifasa Temana yua den maadi ki yedi:

² «Naani o nilo baa fidi ki yaa pia mi fuoma U Tienu po? Yaa nilo n pia mi yama pia mi fuoma o yuli po bebe.

³ Naani li mani U Paaciamu Kuli Daano po a yaa tiegi? Baa a pali yaa pieni, o baa ŋmani be lienni?

⁴ Naani ŋan ŋua U Tienu bonŋanla yeni po n teni ke o wangi a fala, Ki ja leni a ti buudi?

⁵ Moamoani a tienbiadi yaba ki kandi, A tagili mo ki pia bianu.

*

⁶ Ŋaa den guandi a kpiiba n den ledi a kani ki bili yaala A den fenli bi niba tiadi ki ŋaani ba mubili.

⁷ Ŋaa den puuni u ñunñuunu n gbadi yaaba mi ñima. Ŋaa den puuni mi koma n muubi yua mo mi jiema.

⁸ U paalu daano n den die mi diema, O japadaano mo den yeni u kaanu.

⁹ A den yen yaadi a kpepuona ban gedi nikuomi, Ki cie a kpienbila mo yaa jigi.

¹⁰ Lan teni ke ti diadi gaani ki lindi a, Ke i jeje mo cuo ŋa yenma.

¹¹ Li biigi apo lim ke ŋaa go nua pu, Ke mi ñima mo fii ki bua ki milini a.

*

¹² Naani U Tienu ki ye hali tanpojoma kaa? Diidi a ŋmabila n kpedi maama!

¹³ A mo yedi: ‹U Tienu bani be? Naani o baa fidi ki le li *biigili nni?

¹⁴ Ti tawadi doagini o ke waa nua liba kuli, Wan goadi tanpoli fanma nni yaa yogunu.›

¹⁵ Naani a moko bua ki ŋoadi Bi nibiadiba n den ŋoadi yaa sanu yo?

¹⁶ Bi den cuo ba ke u yogunu daa pundi, Ke bi pendi nani mi ñima n tugi yaa bilinu yeni!

¹⁷ Bi den tua U Tienu: ‹Ña ti maama nni. U Paaciamu Kuli Daano baa fidi ki tieni ti be?›

¹⁸ Ama wani n nan den gbieni bi diedi leni ŋalimani. Mii ye bi nibiadiba maama nni.

¹⁹ Bi niteginkaaba baa le la, ki mangi bi pala. Yua n ki pia tagili baa ñuadi ba ki yedi:

²⁰ ‹Yaaba n fii sedi tipo bodi. Mi fantama mo sia bi baali.›

*

²¹ Fini, goa ki mangi leni U Tienu Lani n tie ŋan baa mi yanduanma, A yema n mo goa ki mangi apo.

²² Cengi o ñoabu nni tundi Ki kuani o maama a pali nni.

²³ A yaa guani U Paaciamu Kuli Daano kani, A yema baa goa ki mangi, Lani, ŋan teni ti *tuonbiadi n foagidi leni a diegu.

²⁴ A yaa luni a wula mi tama nni, Bi i kpeni siiga,

²⁵ U Paaciamu Kuli Daano n baa tua a wula, Ki go tua apo ŋanjilifa.

*

²⁶ Yeni, a baa teni U Paaciamu Kuli Daano n tua ŋan bua yua hali boncianla, A baa yaadi a nunga ki nuali wani U Tienu.

²⁷ Lani, a yaa jaandi ki mia o, o baa guani apo, Yeni, a baa fidi ki kuani ŋan niani o yaala.

²⁸ A yaa jagi yaala, li baa tieni nani ŋan bua maama, Mi yenma mo n yendi a sani kuli nni.

²⁹ U Tienu biandi bi japaadanba yanjaga fanma, Ama o todi bi yumiindanba.

³⁰ O baa ga yaaba n ki pia tagili mi biadima nuu nni, Ki faabi amo kelima a *teginma po.»