Jobi 21 - Gourmanchéma Bible

¹ Joba den goa ki yedi:

² «Cengi mani n maama, Lani n tie yi baagi npo.

³ Tuo mani npo min baa ki maadi N yaa maadi ki gbeni, a baa fidi ki ñuadi nni.

⁴ Naani n mo fu leni o nisaalo yo? N yama ka ke mii fidi ki baa juuni.

⁵ Pegidi ki noanli nni mani! Li baa paki yi, yin pii yi ñoana.

⁶ N yaa tiadi lipo ti jawaandi yen cuo nni boncianla, N gbanu mo n jeli kpekpe.

*

⁷ Be yaa po ke bi nibiadiba ye ki fo? Be yaa po ke bi yen podi, Bi fidu mo nan go yaa baa pugidi?

⁸ Bani leni bi puoliŋuani kuli paalu taani ki pugidi, Bi yaabila mo fandi ki pugidi bi nunbu nni.

⁹ Bi diedi nni yanduanma bebe, Jawaandi wani ki ye leni ba, U Tienu gbiamu mo ki yie bipo.

¹⁰ Yogunu kuli bi naañua yaa doni, O yen maa, o kan mii mo.

¹¹ Bi teni ke bi bila tiini nani ti yanbidi yeni, Bi bijaba mo jeli ban bua maama.

¹² Bi yiini i yani ki pua mu lonmu leni ti kogiditi, Ki mangidi bi pala leni ki yeliga.

¹³ Bi ye leni mi yemanma bi miali yema dana kuli nni, Ki go pundi bi tinkpiba diema nni leni mi yanduanma.

*

¹⁴ Ama bi den tua U Tienu: ‹Ña ti maama nni, Tii bua ki bandi a sani mo!

¹⁵ U Paaciamu Kuli Daano tie be yo Ki baa yaa tuuni opo? Ti ŋua ki pugi o ki baa ŋmani be yo?›

¹⁶ Moamoani de, bi yemanma naa ye bi yaa nuu nni ka, Mini wani ki ye nibiadiba maama nni.

¹⁷ Ama yogunuba bi nibiadiba fidisanga yen gbindi, Mi yebiadima n jiidi bipo, U Tienu n tuu ba li panli o pabienli nni.

¹⁸ Bi yen maadi ki tua: ‹Ban tua nani ku faagu n tugi yaa muadi, Nani o pinpinja n tugi yaa fengu yeni.›

*

¹⁹ Naani U Tienu bili o mabinga o nibiado bijaba po yo? U Tienu bi baa waani wani oba yo fala wan bandi o.

²⁰ O yaa nuni n bi pundi ki le wani oba yaa fala. Wani n bi baa ño U Paaciamu Kuli Daano pabienli.

²¹ O diegu go pia opo be yaa fuome, O miali dana yaa gbeni?

²² Naani bi baa bangi U Tienu laa bonla? Wani n die baa malekinba.

*

²³ Niloba yen kpe leni mi yanduanma Kaa bangi liba kuli po.

²⁴ O yen kpe ke o loga guo bonŋanla Ke o kpaba lonlogo mo soangi.

²⁵ One mo n kpe leni li paboanli Ki naa gbadi o yema manu.

²⁶ Ama bikuli taani ki duani mi tama nni, A sidibila mo n ŋoadi ki pini ba.

²⁷ N bani yi yantiana bonŋanla Leni yin kpaagi npo yaala kuli.

²⁸ Yi yaa yedi yaa yogunu: ‹O tugumoandaano diegu ye le yo? Bi nibiadiba n den ye yaa diegu nni yeni ye le yo?›

*

²⁹ Ama be n teni ke yii buali bi santagiba? Yii bua ki tuo ke ban laa yaala tie moamoani yo?

³⁰ Mi yebiadima daali yua n tiendi mi biadima baa cia. U Tienu pabiencianli daali mo, liba kan nandi o.

³¹ Ŋme n baa tuo ki fu leni o o tagu po? Ŋme n baa guani o biadima panpaani?

³² Baa o yaa kpe ke bi piini o Bi go baa yaa guu o kuli.

³³ Ku joaloangu tangbana ki kpiagi opo Nilo kuli ŋua o puoli ki cangi mi kuuma, Ke ku niligu mo ye o liiga.

³⁴ Be yaa po yo ke yi baagidi nni yaa baagi n ki pia fuoma? Yi maguankaama kuli tie boandi bebe.»