Jobi 20 - Gourmanchéma Bible

¹ Tisofala, Naama diema yua den maadi ki yedi:

² «Diidi yaala yaa po ke n yankpaaga tigini nni ke min maadi. Kelima n kan fidi ki juuni min gbadi yaala yaa po.

³ N gbadi jaligiba ke yii mani npo. N yanfuoma mo baa waani nni min baa guani yaala.

⁴ Naani ŋaa bani ke yaa yogu n tu yaa yogu Hali U Tienu n li kaani o nilo ki tinga nni,

⁵ Ke bi nibiadiba gbanmanu kan gedi kaanu Ke yua n ki ŋua U Tienu mo yaa pamanli kan waagi?

⁶ Baa o yaa kpedi ki pundi hali tanpoli Ke o yuli mo ban sii ti tawadi,

⁷ O baa bodi nani o baadi yeni yaa yogunu kuli po. Yaaba mo n den nua o baa yedi: ‹O ye le?›

⁸ O baa yugi nani ti dangidi yeni ke bi kan go le o. O baa pendi nani ku ñiagu bonlekaala yeni.

⁹ Yaa nunbu n den diidi o, kan go le o. Wan den ye naani mo kan go le o.

¹⁰ A luoda baa gedi ki baa o bijaba ki fie o piama, Wani oba mo baa guani wan den fie yaa ŋalimano.

¹¹ O den paani ki go pia u fidu, Ama o baa taani leni lankuli ki duani mi tama nni.

*

¹² Baa mi biadima yaa mani o ñoabu nni, Ke o kubini ma o lanbu tinga,

¹³ Ki kpibi ma ki kan sii ma, Ki kubi ma o nialu nni,

¹⁴ Mi baa n lebidi o tugu nni Ki tua lienni nani li waalabili loabide yeni.

¹⁵ Wan den dini yaa ŋalimano, o baa goa ki sii o. U Tienu n baa dadi ki ñani o, o tugu nni.

¹⁶ O fuagi a wulaba loabidi, O duduuno mo n baa ñidi ki kpa o.

*

¹⁷ O kan go le ke ti siadi leni mi naaŋankpama kuli Puubi opo nani i kpenciami yeni.

¹⁸ O baa guani wan baa yaala leni fala O kan go le li fuoma mo. O kan gbadi o kpendu ñuadi manu.

*

¹⁹ Kelima o ñii ki mindi mindi a luoda ki ŋa ba, Ki fie wan ki maa yaa diegu.

²⁰ Nani o nunponbiadili n den yaba maama po, O kan ñani liba kuli o ŋalimani nni.

²¹ Waa den di ki sengi liba kuli, Lani n teni ke o yemanma mo kan waagi.

*

²² O yemancianma siiga li paboanli baa nandi o. Mi yebiadima buoli kuli baa ŋma o.

²³ Yaa yogunu ke o gbiendi o tugu yeni, U Tienu baa soani opo o pabiencianli, Ki teni i piemi n jiidi o gbanu nni.

²⁴ O yaa sani ti kuboandi jatiadi kani, Ti kumoandi dabanli baa toa ki cuo o.

²⁵ O yaa dadi ki fobi u piemu o gbanu nni, Ki ñani yaa pengu n muu o puali, Laa yogunu mi kuuma jawaanciandi baa baa o.

*

²⁶ Li *biigili wuo ki bili ki guu o, Niloba kuli n kan tigi yaa fantama baa je o, Ki buoni yaala n baa sieni o diegu nni.

²⁷ Tanpoli baa doagidi o tagili, Ki tinga mo baa fii ki sedi opo.

²⁸ Ki tabolinkaaga baa bolini o diegu nni bonbaakaala kuli, Likuli baa pendi U Tienu pabienli daali.

²⁹ Lani n tie U Tienu n bili o nibiado po yaa biinu Lan go tie U Tienu n bili opo yaa panpaani.»