Jobi 2 - Gourmanchéma Bible

¹ Dayenli U Tienu malekinba den cua Li Miali Diedo nintuali, ke Sutaani ku *tuotabigu yudaano moko den cua ki sedi bi siiga Li Miali Diedo nintuali.

² Li Miali Diedo den buali Sutaani: «A ñani le yo?» Sutaani den yedi Li Miali Diedo: «N da li goadi n goada ki gangi ki lindi ki tinga nni.»

³ Li Miali Diedo den yedi Sutaani: «A nan ko laa n naacemo Joba? Waa pia o lie kuli ki tinga nni. O tie papiendaano ki go tiegi mo. O fangi U Tienu, o naa tiendi yaala n bia. Baa ke a tigini nni min bolini o, o baa ki se o papienli nni.»

⁴ Sutaani den goa ki yedi Li Miali Diedo: «O nilo kan da o miali ki gbali! O nilo n pia yaala kuli o baa teni la o miali po.

⁵ Ama tandi a nuu ki sii o wani oba, n bani cain ke o li baa teli ki sugi a a nunbu nne.»

⁶ Li Miali Diedo den yedi Sutaani: «Diidi o ye a nuu nni, ama ŋan da sii o miali wani.»

⁷ Lanwani Sutaani den fuadi Li Miali Diedo kani ki cua ki luni Joba po yaa gbansoama n bia boncianla, ki cili o taajenfaadi ki ban do hali o yuli siiga.

⁸ Joba den kali ku tunbengu po mi fantanpienma nni ki taa ki tanciaciaga ki kpiadi oba.

⁹ O pua den yedi o: «A baa ki se a papienli nni yo? Soli U Tienu ki yuandi ki kpe.»

¹⁰ Ama Joba den goa ki yedi o: «A maadi nani yaa pua n ki pia mi yama yene! Be! Ti baa yaa gaani U Tienu kani yaala n ŋani, Ki nan kan ga yaala n bia wani?» Baa laa bonla kuli yaa niinni, Joba naa den tieni ti*tuonbiadi o maama nni.

Joba danlitaadiba cua ki baa le o

¹¹ Joba den pia danlinba bonba taa, yaaba n den tie bine: Elifasa, Temana diema yua, Bilidada, Sua diema yua leni Tisofala, Naama diema yua. Bi danlitaadiba yeni n den gbadi yaa yebiadima n den ŋma o, bi den taani ki tu ñoabu ki baa gedi ki ban mua opo ki go baagi o.

¹² Ban den ye foagima ki yaadi ki noanli o, baa den bandi o. Lanwani ban den nagini ki bandi o, bi den mua ki figindi hali boncianla. Bi den cuo bi liadiciama ki padi padi, ki wuliti bi yula po mi tama.

¹³ Bi den kali leni o tiipo dana lele leni ñadi lele ke oba kuli ki den yaadi o ñoabu ki maadi leni o kelima ban den nua o fala n yaba ki kandi maama po.