Jobi 19 - Gourmanchéma Bible

¹ Joba den maadi ki yedi:

² «Yi baa yaa biidi n pali ki pundi hali u laa yogunu yo? Yi baa yaa coagini nni leni yi maama ki pundi hali u laa yogunu?

³ Diidi mani figilima piiga nne ke yi sugidi nni Naani i fe ki pia yi leni yin paagidi n yama maama po?

⁴ Li yaa tie moamoani ke n tudi, I tagili yeni jagi n yaa yuli po yo.

⁵ Moamoani yi jigidi nni ki bua ki jigini yi yula, Ki nua ke n tagili n cuani n fe.

⁶ Ama yin nan bandi mani ke U Tienu n sedi npo, Ki luni ki lani nni o taali.

*

⁷ Diidi, n yaa mua ke ban ga nni, Oba kuli naa cengi npo. N yaa miadi ban todi nni, oba ki faami npo.

⁸ O luoni n sanu, ke min da tagini, Ki teni ke n sanu biigi hali boncianla.

⁹ O teni ke n kpiagidi kuli bodi Ki cibidi n badifogiliga mo.

¹⁰ O guli nni i kaani kuli ke n ban caa Ki dadi ki ŋabi n suginma nani bu tibu yeni.

¹¹ O pali beni npo boncianla, Ke o faligi nni nani o yibale yeni.

¹² O toagola kuli pua beli beli ki kpendi, Ki tieni u sanu ki pundi hali n kani. Bi tii bi naga ki lindi n diegu.

*

¹³ U Tienu teni ke n kpiiba sani ki ŋa nni. Yaaba n bani nni mo loagidi nni.

¹⁴ N bankaaba sani ki ŋa nni N buakaaba sundi npo.

¹⁵ N diegu nni yaaba leni n potuada Nua nni nani o caano yeni. N di tua nilamo yo bipo.

¹⁶ N yaa yini n naacemo, waa guandi npo Baa min pugi o maama kuli.

¹⁷ N nuulu ki mani baa n pua po Baa n bimadimu sengi nni.

¹⁸ Baa a biñinda naa bua n kaanu. N yaa fii, se ban yaa ñuadi nni.

¹⁹ N *nidugikaaba pala fa npo Min den bua yaaba fii ki sedi npo.

²⁰ N kpaba sani ki tabini n gbanandi leni n gbangu. N ñina bebe n di sieni.

*

²¹ Gbadi mani n niñima, gbadi mani n niñima, yinba n danlinba! Kelima U Tienu nuu n pua nni!

²² Be yaa po yo ke yi ŋua ki deli nni Nani U Tienu n ŋua ki deli nni maama yeni? Naani yii coagi leni yin wangi nni fala maama?

²³ Ŋain, n bi sugini hali bonŋanla n maama nne N bi diani tili nni!

²⁴ Ban diani ma leni ki celiga ku daagu po, Ki tieni ti noabindi Ke man yaa ye yaa yogunu kuli ki da bodi.

²⁵ Kelima n bani ke n *candanbaalo fo, Ke wani n baa juodi ki fii ki tinga nni.

²⁶ N gbanandi yaa bodi yaa yogunu, Mini nba n baa noanli ki le U Tienu bonŋanla.

²⁷ Wane ke n nuni baa diidi bonŋanla, Laa tie nitoa ka ke n baa le. N pali coagi boncianla kelima n guu laa yogunu yo.

²⁸ Yi yaa yedi: ‹Be teni ke ti ŋua deli o?› Laa yogunu yo ke yi baa le ke n pia i moamoani.

²⁹ Yaa jie mani ki jugisiega yi yula po! Kelima ki jugisiega yaa tundi koani boncianla. Lani n tie yin bandi ke ti buudi ye.»