Jobi 18 - Gourmanchéma Bible

¹ Bilidada Sua diema yua den maadi ki yedi:

² «Be yogunu yo ke a baa cedi mi naa maama buolu? Baa mi yama no yo, tin nan yuandi ki maadi.

³ Be yaa po yo ke a nua ti nani ti yandi yeni? Be n teni ke a nua ti nani bi yanluodanba yeni?

⁴ Fini yua n coagini a yuli a pabienli nni, Naani li dagidi ki tinga n da go pia niba kelima fini yaa po? Naani li dagidi fini yaa po ke a juana n ŋmiagi a kaanu?

*

⁵ O nibiado yenma baa gbindi. Fantama mo kan go ŋubidi o diegu nni.

⁶ O gbandieli nni yenma baa gbindi. O miali yema fidisanga baa gbindi.

⁷ Wan den cuoni leni yaa jama kuli baa gbeni, O yucele yanjaga mo n baa guli o.

⁸ Kelima o baa baa i taali nni. O cuoni bu ganbu po yo.

⁹ Ku diagu cuo o taajentindili U baabu mo soadi ki mubini o.

¹⁰ Yaa baabu n baa cuo o, wuo ki tinga nni, Ti cuadi mo ye o sanu nni.

¹¹ I jeje muubi o i kaani kuli, Ki ŋua ki deli o.

*

¹² Mi koma gbeni o gbanmanu Mi yebiadima ŋua ki baali o,

¹³ Ki cabidi o gbanandi waamu waamu. Mi kuuma baa je o taana leni o buadi kuli.

¹⁴ Bi baa dadi ki ñani o o diegu nni o yama n den dua naani, Ki fuli ki gedini o mi kuuma diema bado kani.

¹⁵ Li cidibili baa baa o diegu po. A baa fidi ki kua ki sedi ku niinni, Kelima kuu go tie o yaa yaagu.

¹⁶ O jiini yi n ye ki tinga nni baa cili ki kuodi, Ki yaa caa hali o beni yi n ye tanpoli.

*

¹⁷ Bi baa sundi opo mi diema nni Oba kuli ki go tiani opo mo.

¹⁸ Bi ñani o mi yenma nni, Ki pieni ki luni o li *biigili nni. Bi deli ki ñani o li ŋandunli nni.

¹⁹ Waa ŋa bila, bi yaabila o buolu nni, Oba kuli ki sieni o diegu nni.

²⁰ I jeje baa cuo yaaba n ye puoli leni nintuali, Niganu leni nijienu o bodima po, Lan paki yaa nifiima n kpendi mo leni yaa yebiadima n ŋma o.

²¹ Yaaba n ki tiegi n baa ye naani n yeni, Yua n ki bani U Tienu mo yaa kaanu n yeni.»