Jobi 17 - Gourmanchéma Bible

¹ N fuoma dogini N dana caa ki baa gbeni Li kuli n bili ki guu nni.

² A ñuañuada gaani ki lindi nni. Bi sugidi teni ke mii goa.

³ Kubi nni fini aba yaa kani. Kelima fini yaaka, ŋme n baa tuo ki sedi n puoli?

⁴ A teni ke bi yantiana ki bani bonla gagidima. Moko, ŋan da teni ban koani ki paadi.

⁵ Bi yini bi danlinba ti fagidi boagidima po, Ki nan pia bi bila ke mi koma baa je ba.

*

⁶ O den kaani nni ke min diedi i nibuoli, Ama mini n di goa ki tua ban siini yua yaa nunga nni ti ñinsandi.

⁷ Li pabiidili teni ke n nuni ki go nua bonŋanla, N gbanandi kuli tie nani ku jinjingu yeni.

⁸ Li pakili cuo bi niteginkaaba lipo. Yua n ki pia tagiliba kuli fii ki sedi o nibiado po.

⁹ O niteginka wani n yaa li suagi liiga o tagu nni, Yua yaa nii n ki pia *joagindi mo yaa fidu n yaa pugidi!

¹⁰ Ama yi kuli yin goa ki cua mani na! N kan le yanfodaano yi siiga nni.

*

¹¹ N dana gbeni, min den jagi ke n baa tieni yaala kuli bodi, Ki taani leni n pali n bua yaala kuli.

¹² Bi tua ke ku ñiagu tie yensiinu, Ki tua ke mi yenma cua li *biigili n ye yaa yogunu.

¹³ Naani min sugini yaala kuli ki tie bi tinkpiba diema n tua n deni ka? N baa bili n duanu li biigili nne.

¹⁴ N kpaani ki yedi n kuli: ‹Fini n tie n baa!› Ki yedi mi bedima mo: ‹Fini n tie n naa leni n naataanpuoga!›

¹⁵ N suginma nan ye le yo da? Ŋme n baa fidi ki le n suginma?

¹⁶ Mi baa jiidi bi tinkpiba diema nni, Mini leni mani n yegi ki ban duani mi tama nni.»