Jobi 16 - Gourmanchéma Bible

¹ Joba den yedi:

² «N gbadi mi naa maama buolu boncianla. Yi kuli tie yaaba yaa baagi n tie fala.

³ Yi tua: ‹Naani ku naa mawolingu kuli baa baa u bianu? Be n yen biendi a pali a yaa maadi ki guandi?›

⁴ N moko bi baa fidi ki maadi yeni, Yi yaa bi ye n kaanu N bi baa maadi ki fu leni yi Ki fefegi n yuli yipo.

⁵ N bi baa maadi ki paagi yi pala, Ki baagi yi ki jiini yi yama.

*

⁶ N yaa maadi, n fala naa wadi, N yaa ŋmini mo, fala baa foagidi leni nni lede?

⁷ Moala wani U Tienu gbeni n fidu, Ki teni ke n diegu kuli bodi.

⁸ A teni ke n gbanandi kuli papali, Ke n dondongu mo fii ki sedi ki jaligi nni.

⁹ O pabienli nni o fii ki baa nni ki toatoadi nni, Ki cegini npo o ñina. N yibali pegidi o nunjoma kuli ki teli nni.

¹⁰ Bi yaadi bi ñoana ki teli nni, Ban bua ki fiagi nni yeni, bi pabini nni. Bikuli taani ki lindi nni ki bua ki koani leni nni.

¹¹ U Tienu teni ke a bonwaala yuali nni, Ki pieni ki luni nni bi nibiadiba nuu nni.

*

¹² N den li ye leni n yanduanma ke a yagi n yama. A cuo n tulu ki luni nni, Ki teni ke n tua ŋan baa yaa toa yua.

¹³ O piemi yugi ki gangi ki lindi nni i kaani kuli. O piemi lugidi n ciaga ke laa pia opo niñima. O pua ki wuli n puali yama tiipo.

¹⁴ O kubi nni ki pua ki poagiliti nni, Ki sani ki cua n kani nani o jakoando yeni.

¹⁵ N laa yogunu kuli li paboanli liadili, N jigidi kuli mo baa ki bodi i tani nni.

¹⁶ N buudi hali ke n nuni moandi, Ke n nuni kuli fii ki gbibi.

¹⁷ Ama ke n nii wani ki tieni biadimaba kuli, Ke joagindiba mo kuli ki ye n jaandi nni.

*

¹⁸ Ŋain ki tinga, da piini n soama Ki teni ke n nialu kan baa ki kpaani.

¹⁹ Diidi moala n siedo ye tanpoli Yua n baa maadi ki ga nni ye hali naani n kpedi.

²⁰ N danlinba ñuadi nni. Ama mini wani li miadi U Tienu leni ti ninsiide.

²¹ N sugini ki baa yua n baa tua n *candanbaalo U Tienu kani, Nani o nisaalo leni o danli siiga yeni.

²² Kelima n miali bina coali caa ki baa gbeni, N baa tagini yaa sanu n ki pia guanma.