Jobi 15 - Gourmanchéma Bible

¹ Elifasa Temana yua den maadi ki yedi:

² «Naani yanfodaano baa guani yaa maguankaama n tie na? Naani o baa gbengidi o yuli leni mi mafanma?

³ Naani o maadi ki baa ga o yuli leni yaa maama n ki pia mayuli, Bi leni yaa maama n ki pia fuoma yo?

⁴ Fini, ŋaa go fangi U Tienu, Ki teni ke li kpaagili mo gbeni U Tienu nintuali.

⁵ Kelima a tagili n gobidi a ñoacuuna, A mo gandi bi nunfandanba yaa mataana.

⁶ A ñoabu n buni ki cuo ŋa. Laa tie mini ka A maama n cuo ŋa.

*

⁷ Naani bi nisaaliba siiga fini n kpa mali? Naani bi kpa mali fine ki ŋa a joabila?

⁸ Naani a den kpa kali U Tienu leni o nijuoginkaaba taanli nni, Ki baa mi yanfuoma fini a bebe po?

⁹ A bani be ke tii bani? A gbadi be yo ke tinba wani ki gbadi?

¹⁰ Ti siiga nni pia ti yukobipiendi danba, Yaaba n kpeli baa a baamado moko.

¹¹ Naani a noanli ki fali U Tienu baagi Leni tin maadi leni a yaa madingima yo?

*

¹² Be n fiini a pali, Ki teni ke a nuni mo moandi?

¹³ A bieni a pali leni U Tienu yo, Ki yaadi a ñoabu ki maadi laa maama buolu?

¹⁴ O nilo tie be ki kaa pia tagili? O pua n mali yua baa tieni lede ki yaa tiegi?

¹⁵ U Tienu yaa dugi baa o malekinba po, Ke ti tawadi mo naa ŋani cain o nintuali,

¹⁶ O nisaalo yua gundi ki tie janbi daano mo te? Wani yua n tiendi ti *tuonbiadi nani wan ñu mi ñima maama yeni.

*

¹⁷ Cengi nni n baa doagidi apo, N baa togidi a min laa yaala,

¹⁸ Bi yanfodanba n pua yaala yaa sawalo Bi baanba n den waani ba yaala ke baa wuoni la.

¹⁹ Bi den puni bani bebe ki tinga, Caanoba kuli daa den kua bi siiga.

²⁰ Lani n tie o nibiado wani baa yaa ye Leni fala o miali yema dana nni kuli, O tugumoandaano mo ban bili opo yaa bina kuli.

²¹ Yaa fuugu n pia ti jawaandi pundi o tuba nni Mi yanduanma siige ke yua n bolindi baa cua ki baa o.

²² Waa tama ke o baa fidi ki sani ki cia li *biigili, Ki jugisiega mo bili ki guu o.

²³ O puagi ki lingi li bonjekaala, O bani ke mi kuuma daali bili ki guu o.

²⁴ Li pabiidili leni i yanbani jiendi o, Ki baa o nani yaa bado n bobi o jatiadi bu toabu po yeni.

²⁵ Lani n tie yaala n baa baa yaa nisaalo N fii ki sedi U Tienu U Paaciamu Kuli Daano po.

*

²⁶ O den paagi o pali ki tuogi leni U Tienu, Kelima o den dugi wan pia yaa gbankoanditi po.

²⁷ O nunga kuli den kpiagi Ke o loga mo kuli den guo bonŋanla.

²⁸ Ama o baa yaa ye ban bolini yaa dogi nni, Yaa diedi n ki pia niba nni Ki caa ki baa wudi ki baa nni.

²⁹ O kan go baa piama ki pugini, O bonbaakaala mo kan go yaa ye. O yulolima mo baa gbeni ki tinga nni.

³⁰ O kan fidi ki faabi leni mi kuuma. Mi fantama baa teni o benkpela n kuodi. U Tienu mo baa piebi ki gedini o foagima.

³¹ Wan da dugi janbi po, laa pia fuomaba kuli, Kelima i janbi n baa tua o panpaani.

³² Laa bonla baa tieni ke o miali dana daa gbeni, Ke o benkpeli mo kan go faadi.

³³ O baa suodi nani duven tiidi bonluonkaala n baa suodi ki daa beni maama, Nani *olifie tiidi puuma n suodi maama, O mo baa suodi yene.

³⁴ O nibiado diegu kan diadi. Mi fantama mo baa juu i janbi daano diegu.

³⁵ Ki jagi yaala n bia li baa cuani fala, Yaala n ña o niinni kuli janbi bebe.»