Jobi 14 - Gourmanchéma Bible

¹ Pua n mali yua kuli, miali yema koabi, Ki go gbie leni yanyagidi bebe.

² O yigidi nani mi puuma yeni ki go suodi O yen sane nani u soangu yeni, ki kan sedi.

³ Ama a ŋubidi a nunbu ki nua wane, Ki go yi mine ti buudi po.

⁴ Ŋme n baa fidi ki teni yaala n ŋani N ña yaala n *joagini nni? Niloba kuli.

⁵ Fini n yaa bili o miali yema dana, Leni o ŋmaali n coali kuli, Fini n yaa bili wan kan fidi pendi yaa dana bianu,

⁶ Lanwani ŋan pegidi a nunga ki noanli potogu wan baa ki fuo, Lani n tie omo n baa ki jiini o tuonli leni mi yanduanma.

*

⁷ Bu tibu pia mi suginma Bi yaa pedi bu, bu baa goa ki bundi, Bu kan luo yaa benkpela n goa ki bundi.

⁸ Baa bu jiini yaa waagi ki tinga nni, Ke bu ñiali mo kpe,

⁹ Mi ñima yaa ti cua, bu baa goa ki faadi, Bu baa goa ki bundi nani bu tipanbu yeni.

¹⁰ Ama o nilo wani yen kpe, o fidu n gbeni. O nisaalo yaa kpe o yen kua le?

¹¹ Mi ñincianma ñima baa fidi ki sani I kpenciami ñima mo n ñuudi ki go kuodi.

¹² Yeni moko o nilo yen duani, ki kan go fii abada. O kan go fii mo hali tanpoli n baan bodi yaa yogunu. O kan go fundi hali abada.

*

¹³ Diidi a yaa den bua ki wuoni nni bi tinkpiba diema nni, Ki yaa kubi nni lienni ŋasiili nni hali a pali n kuugi, Ki bili yaa yogunu ke a baa tiadi npo.

¹⁴ Li yaa bi tie ke o nisaalo baa kpe ki goa fii, Daali kuli n bi baa yaa guu n fala nni, Hali ŋan baa cua ki faabi nni yaa yogunu.

¹⁵ Lanwani a baa yini nni, n mo baa tuo, A go baa lingi mini a nii tuonli.

¹⁶ Ama moala po, a coadi n tayaagima kuli. A baa ti cedi ki kan go faami n poadima po.

¹⁷ A baa loli n tagili kuli ku kpalipiagu nni, Ki go wuoni n *tuonbiadi mo.

*

¹⁸ Ama nani li juali n baa ki mudi mudi maama Ke ku tangu mo fii ki ŋmiagi ku kaanu,

¹⁹ Nani mi ñima n cadi a tana, Ke mi ñinpuubikaama mo koadi ki tinga tama Ki ban caa maama yeni, Moko, a teni ke o nisaalo suginma bodi yene.

²⁰ Yogunu kuli a paagidi o yema, ke o ban caa. A pua ki lebidi o nunga ki yuandi ki deli o.

²¹ Bi yaa bi jigini o bijaba, waa bani puu. Bi yaa didi fali ba mo, waa faami lipo.

²² O gbanandi nne ke o laadi fala O naano n ye leni li paboanli.»