Jobi 13 - Gourmanchéma Bible

¹ Yeni de, n nunbu laa laa bonla kuli N tubili mo gbadi la, ki gaa la.

² Yin bani yaala n moko bani la Yii cie nni ba.

³ Ama min wani, n bua ki maadi leni U Paaciamu Kuli Daano yo. N bua ki maadi ki ga n yuli U Tienu kane.

⁴ Yinba wani, se faami leni mi yama. Yi tie yaa logitola n ki pia mayuli.

⁵ Be n teni ke yii bi ŋmini? Mi yanfuoma sanu bigi n yeni.

⁶ Cengi mani min baa maadi yaama ki ga n yuli! Cengi mani bonŋanla n ñoacuuna n fu yaala yaa po!

⁷ Naani yi tama ke yi baa maadi yaala n ki tiegi yo ki todi U Tienu? Naani yi tama ke yi baa pua mi faama yo ki todi U Tienu?

⁸ Naani yi tama ke yi baa maadi yene ki taani opo? Naani yi bua fu ki ga U Tienu yo?

⁹ Naani o yaa diidi yi yantugu nni bonŋanla, O baa le yaala n ŋani? Bi, yi baa fidi ki boandi o nani ban boandi o nilo maama yeni?

¹⁰ Moamoani n bani cain ke o baa fu leni yi Li yaa tie baa ŋasiili nni ke yi taa opo ke laa dagidi.

¹¹ Naani wani U Tienu bali jigidi kan jieni yi? Naani o fangili jeje kan cuo yi?

¹² Yi kpanjama kuli ki pia fuoma nani mi fantanpienma yeni. Yi mabanma mo tie nani ti tandi bilini yeni.

¹³ Suo mani, cedi nni mani! Mini n baa maadi! Yaala n baa tieni nni, n tieni!

¹⁴ Baa n yaa baa kpe kelima lipo, n tuo!

¹⁵ Baa o yaa baa kpa nni, n baa dugi o yaa po. Ama o nintuali n baa waani o ke mii pia tagili.

¹⁶ Baa lani moko fidi ki todi nni, Kelima *tuonbiadi daano kan fidi ki sedi o nintuali.

¹⁷ Cengi mani bonŋanla n maama, Ki diadi mani yi tuba ki cengi min baa doagidi yipo yaa maama.

¹⁸ Diidi n cuani n maama ti buudi kani Kelima n bani ke mini n pia i moamoani.

¹⁹ Ŋme n baa fidi ki maadi ki je nni li bujiali kani? Lanwani n baa tuo n tagili ki yaa ŋmini ki kpe.

*

²⁰ Tieni npo bonla lie Lani n kan buli a n nunga. Lani n tie line:

²¹ Yindi npo a nuu yu n coagini nni Ki da go jiendi nni mo.

²² Li yaa yuandi ŋan maadi, n baa guani a Bi, n baa maadi ŋan guani npo.

²³ N tuonbiadi leni n tagili coali de lede? Teni min bandi n biili leni n tuonbiadi n tie yaala.

²⁴ Be n teni ke a nan buli nni a nunga Ki nua nni nani a yibali yeni?

²⁵ Naani a baa ŋua ki deli u faalu n tugi yaa faagu? Naani a baa ŋua ki deli ti moakuondi?

²⁶ Kelima a diani npo yaa maama n to Ki teni ke n tugi n panma nni tagili.

²⁷ A kpaa n taana ti kpaadi Ki faami min tiendi yaala kuli, Ki ŋua ki coadi baa n tayaagidi.

²⁸ N gbanandi bedi ki cabidi ki baali nani o dudulo n kua yaa daagu yeni, Bi nani ti lulugidi n kua yaa tiayiekaagu yeni.