Jobi 11 - Gourmanchéma Bible

¹ Tisofala yua den tie Naama diema yua den maadi ki yedi:

² «Mi naa macianma kuli ki baa maguankaama? Naani mi mabanma bebe baa fidi ki pa o nilo i moamoani?

³ Naani a macianma baa fidi ki teni bi niba n suoni? Naani a mañuali baa teni ke oba kuli kan fu leni a?

⁴ A yedi: ‹N banma ki pia tagili Mii pia tagili o nintuali mo.›

⁵ Hei! U Tienu yaa bi bua ki maade, O yaa bi yaadi o ñoabu a nintuali,

⁶ Ki waani a o yanfuoma ŋasiili Yaama n cie ti yanjaga kuli, A baa bandi ke U Tienu yen sundi apo a tagili i tiami po.

*

⁷ Naani a fidi ki bandi U Tienu ŋasiili ki gbeni? Bi ki bandi U Paaciamu Kuli Daano paalu leni o yabinu fuuli?

⁸ Mi yaba ki kpedi ki pundi ti tawadi, a baa tieni be? Mi ñua ki cie bi tinkpiba diema, a baa bandi be lienni?

⁹ Mi *biigili foagimu cie ki tinga Mi pianu mo cie mi ñincianma.

¹⁰ U Tienu yaa cuo tuonando ki yini o ti buudi kaanu, Ŋme n baa fidi ki yie opo?

¹¹ Kelima o bani yaa niba n ki pia fuoma O nua yaala n ki tiegi baa o yaa kpaagi lipo.

¹² Li dingi ki kuani o fuaŋunbo ti diedi nni, Ki cie ki teni o yanluodaano n baa mi yama.

¹³ Fini wani a yaa pegidi a pali U Tienu po, A yaa yugidi a nii U Tienu po ki jaandi o,

¹⁴ A yaa foagidi leni yaala n naa tiegi Kaa teni ke tuongunda tuuni a diegu nni,

¹⁵ Lanwani a baa yaa cuoni ke a yuli yaa. A baa se bonŋanla kaa bangi liba kuli po.

¹⁶ Kelima a baa sundi a fala po, A baa tiadi lipo, ama nani yaa ñima n puubi ki pendi yeni.

¹⁷ A yema baa yaa ŋani ki yieni ki cie u yensicocolu. Li biigili baa yaa yieni nani u tiŋafaanu yeni.

¹⁸ A baa ka leni ti dugidi kelima mi suginma ye. A baa diidi yaala n gaani ki lindi a Ki duani ki guani leni mi yanduanma.

¹⁹ A baa duani ki tandi aba, Niloba kan biidi a guama. Bi niba boncianla baa mia a todima.

²⁰ Bi nibiadiba wani yaa nuni baa le yaala n bia. Wuonkaanu ki ye bipo. Bi suginma kuli n tie ban kpe bebe!»