Jobi 10 - Gourmanchéma Bible

¹ N yama ñani li miali nni Cedi min fu ki maadi n yema nne po, N paboancianli nni n baa maadi.

² N yedi U Tienu: ‹Da jia buudi ki cuo nni.› Teni min bandi yaala yaa po ke a koani leni nni,

³ Naani a sua ke li dagidi ŋan waani nni fala, Ki yie a nuu n tagi yaala Ki teni a yenma n yendi bi nibiadiba taanli po?

⁴ Naani a pia o nisaalo yaa nuni yo? Naani a nua nani o nisaalo n nua maama yo?

⁵ Naani a miali dana tie nani o nisaalo yua n baa kpe yaa dana yene? Naani a miali bina tie nani o nilo yeni yo

⁶ Ke a ŋua ki lingi n tagili Ki yagini a yama n *tuonbiadi po?

⁷ A bani bonŋanla cain ke mii pia biili Ke oba mo kan fidi ki faabi nni a nuu nni.

⁸ A yaa nii n tagi nni, yini n tieni nni. Ama moala a bua ki bolini nni cain!

⁹ Tiadi ke a tagi nni leni ku yoagu yo. Naani a bua ki guani nni mi tama nni?

¹⁰ Naani ŋaa den li kuodi nni nani mi naaŋanma yeni kaa? Naani ŋaa den li teni ke n guani nani mi naaŋankpama yeni kaa?

¹¹ A puni nni ku gbangu leni ti nandi, Ki puni nni a kpaba leni i jiini.

¹² A puni nni li miali leni li *ŋanbili Ŋan kubi nni bonŋanla maama teni ke n baa fo.

*

¹³ Ama diidi ki le ŋan den bili yaala a pali nni, N bani yaala n den ye a niinni lani n tie:

¹⁴ N yaa tieni ti tuonbiadi a nua nni. A kan yedi ke mii pia tagili.

¹⁵ Li yuboanli n baa nni n yaa tie tuonando. N yaa tiegi moko n kan fidi ki yaadi n yuli, Kelima n laa ki faliga leni mi yebiadima.

¹⁶ N yaa tuo ki yaadi n yuli, Se ŋan ŋoadi ki deli nni nani o yangbanlo yeni. A baa mudi nni yomi yomi leni a paaciamu.

¹⁷ A teni ke n yema tie fala ki tu fala. A pugidi a pabienli npo Toagotoali fii ki sedi npo, ki mua mi jama.

¹⁸ Be n teni ke a ñani nni n naa tugu nni? N bi baa kpe ke nunbu kuli ki laa nni.

¹⁹ N bi baa yaa tie nani mii den kpa ye yeni. N den baa ña n naa tugu nni, Ban tugi nni ki gedi nni li kuli po.

²⁰ N miali dana yema ki fuu. Cedi nni min mangi n pali leni yaa yoginjenga n sieni npo,

²¹ Hali ke n daa gedi ki kan go guani, Li *biigili leni mi kuuma jinjingu diema nni,

²² Li biigicianli leni li paboanli diema nni, Mi kuuma jinjingu leni ti yanyagidi n ye naankani, Ke mi yenma tie nani li biigili yeni!»