Jan n diani U Tienu Laabaaliŋamo maama 7 - Gourmanchéma Bible

¹ Lani n pendi Jesu den goadi *Galile nni. Waa go den bua ki yaa goadi Jude nni kelima Jufinba den lingi ki bua ki kpa o.

² Jufinba jaanma yaama n yi a *suga jaanma den kuli.

³ Lani yaa po Jesu waamu den yedi o: «Ŋan fii nekanba ki gedi Jude ke a ŋoadikaaba mo n le ŋan tuuni yaa tuona.

⁴ Kelima yua n bua bi niba kuli n yaa bani o kan yaa wuondi wan tiendi yaala. Ŋan tiendi laa bonla yeni, teni ŋanduna kuli n bandi.»

⁵ Kelima baa o waamu mo naa den tuo ki daani o.

⁶ Jesu den yedi ba: «N yogunu daa pundi, ama yinba wani yaa po, yogunu kuli dagidi.

⁷ Ŋanduna yaaba kan fidi ki yaa nani yi, ama bi nani mini wani, kelima n tiendi siedi ke ban tuuni yaa tuona bia.

⁸ Yin gedi mani mi jaanma. Mini n wani da kan gedi kelima n yogunu daa pundi.»

⁹ Wan den yedi ba yeni, o go den sedi Galile.

Jesu gedi Jelusalema a suga jaanma yogunu

¹⁰ O waamu n den fii ki gedi mi jaanma yeni, wani oba moko den yuandi ki gedi, ama waa den gedi ke bi niba bani, o den gedi ŋasiili nni.

¹¹ Jufinba den lingi o mi jaanma nni ki tua: «O ye le?»

¹² Ku niligu mo den soabidisoabidi leni biyaba ki maadi o maama. Bine den tua ke o tie niŋamo, bine mo n yaa tua: «Yeni ka, o boandi bi niba.»

¹³ Ama oba ki den maadi o maama ke bi niba gba kelima bi den jie Jufinba.

¹⁴ Mi jaanma dana yeni siiga Jesu den gedi U Tienu diegu nni ki bangi bi niba.

¹⁵ Li den paki Jufinba ke bi tua: «O naa nilo ga lede ki bandi i Diani maama fuuli, wani yua kaa kua li cogu?»

¹⁶ Jesu den goa ki yedi ba: «Min bangi yaa bangima, maa tie n yaama ka, mi tie yua n soani nni yaa bangime.

¹⁷ O nilo yaa bua ki tieni U Tienu yanbuama baa bandi n bangima yaa ñani U Tienu kani, yaaka n yaa maadi n yuli po.

¹⁸ Yua n maadi o yuli po lingi o yuli po ti kpiagidi. Ama yua n lingi yua n soani o yaa kpiagidi tie moamoandaano, waa pia boandiba.

¹⁹ Musa n den soagini yipo li *bali maama, bi yeni kaa? Ama yi siiga nni baa niyendo naa tiendi man bili yaala. Be yaa po ke yi lingi ki bua ki kpa nni?»

²⁰ Ku niligu den goa ki yedi o: «A pia ki cicibiadiga. Ŋme lingi ki baa kpa ŋa?»

²¹ Jesu den goa ki yedi ba: «N den soani tuonyenli ke li paki yikuli.

²² Musa den bili yipo ku koanciagu *ŋantaado, laa cili Musa yaa kani ka, li den cili ti yaajakpiaba kane. Lani yaa po yi yen kuani o nilo ku koanciagu, baa *U Tienu fuodima daali.

²³ Li yaa tie ke yi kuani o nilo ku koanciagu mi fuodima daali ke yin da miidi Musa bali maama, be yaa po ke yi pala nan be leni nni kelima n paagi o nilo cain mi fuodima daali?

²⁴ Yin da ja ti buudi nani yin nua maama, ama yin yaa jia ti buudi ke li tiegi.»

Naani Jesu n tie U Tienu n Gandi Yua?

²⁵ Jelusalema yaaba siiga nni bi nitianba den tua: «Naani one ka tie ban lingi ki bua ki kpa yua yeni?

²⁶ Diidi ki le, o maadi bi niba siiga ke baa tua o liba. Naani ti yudanba tuo ke o tie *U Tienu n Gandi Yua bi?

²⁷ Wani, ti bani wan ñani naani, ama U Tienu n Gandi Yua yaa cua, oba kuli kan bandi wan ñani naani.»

²⁸ Lani yaa po Jesu n den bangi ba U Tienu diegu nni, o den kpaani: «Yi bani nni, ki bani min ñani naani. Mii cua n yuceli cuama ka. Yua n soani nni tie o moamoandaano. Yii bani o.

²⁹ Ama mini n bani o kelima n ñani o yaa kani, wani n soani nni mo.»

³⁰ Lani yaa po bi den lingi ki bua ki cuo o, ama oba kuli ki den cuo o kelima o yogunu daa den pundi.

³¹ Ku niligu siiga boncianla den tuo ki daani o ki tua: «Naani U Tienu n Gandi Yua yaa cua, o go baa tieni yaa bancianma n cie o naa nilo n tiendi yaama bi?»

Bi soani U Tienu diegu jiidikaaba ban cuo Jesu

³² *Falisieninba den gbadi ke ku niligu soabidi leni biyaba ki maadi Jesu maama yeni. Lani bi kopadicianba yudanba leni Falisieninba den soani U Tienu diegu jiidikaaba ban cuo o.

³³ Lani yaa po Jesu den yedi: «N da go baa waagi leni yi u yogunu waamu, lan yaa pendi n baa goa ki gedi yua n soani nni po.

³⁴ Yi baa lingi nni, ama yi kan le nni. Min baa ye naani yeni, yi kan fidi ki cua likani.»

³⁵ Lanwani Jufinba den buali biyaba: «One baa gedi hali le, ke ti kan go le o? Naani o baa gedi Jufinba yaaba n yayadi ki ye bi nilanba siiga, ki ban bangi bi nilanba yeni bi?

³⁶ Wan maadi yaa maama yeni ki yedi: ‹Yi baa lingi nni ki nan kan le nni,› ki go yedi: ‹Min baa ye naani, yi kan fidi ki cua likani,› laa maama mo bua ki yedi be?»

³⁷ Laa jaanma juodidaali, lani n tie mi jaanma dacianli, Jesu den se ki kpaani: «U ñunñuunu n pia yua kuli, wan cua n kani ki ño.

³⁸ Yaa nilo n tuo ki daani nni, li miali kpenciami baa puubi ki ña o niinni nani i Diani n yedi maama.»

³⁹ Jesu n den maadi yeni, o den maadi U Tienu Fuoma yaa maame, yaa niba n tuo ki daani wani Jesu n baa baa yua. U Tienu daa den puni ba o Fuoma yeni, kelima Jesu daa baa o kpiagidi.

⁴⁰ Ku niligu siiga nitianba den gbadi laa maama ki tua: «Moamoani, one n tie tin gu yaa sawalipualo.»

⁴¹ Bine mo den yedi: «One n tie U Tienu n Gandi Yua.» Bine mo den tua: «Naani U Tienu n Gandi Yua baa ña Galile yoo?

⁴² Naani i Diani ki yedi ke U Tienu n Gandi Yua baa tie Dafidi puoliŋuanu, ki ña Betelema dogu nni Dafidi dandogu nni kaa?»

⁴³ Lanwani mi paadima den tieni ku niligu nni kelima Jesu po.

⁴⁴ Bi nitianba den bua ki cuo o, ama oba ki den cuo o.

⁴⁵ U Tienu diegu jiidikaaba n den guani bi kopadicianba yudanba leni Falisieninba yeni kani, bi den buali ba: «Be n teni ke yii cuani o?»

⁴⁶ Bi jiidikaaba den goa ki yedi ba: «Nisaaloba kuli ki maadi nani laa ja n maadi maama.»

⁴⁷ Falisieninba den goa ki buali ba: «O boandi yinba moko bi?

⁴⁸ Naani yi sua ke bi yudanba leni Falisieninba siiga, baa yendo tuo ki daani o bi?

⁴⁹ Ama ku naa niligu, yaaba n ki bani Musa bali maama fuuli tie ban soli yaaba.»

⁵⁰ Nikodema, yua n den kpa gedi Jesu kani ku ñiagu ki tie Falisieninba siiga yua, den yedi ba:

⁵¹ «Naani ti bali maama tuo ban jia leni o nilo ti buudi ki cuo o, bi yaa kpa cengi ki gbadi wan yedi yaala o yuli po ki bandi wan tiendi yaala?»

⁵² Bi den yedi o: «Naani a moko tie Galile yua yoo? Ŋan lingi i Diani nni, a kan le ke sawalipualoba ñani Galile.» [

Yaa pua n conbi maama

⁵³ Bi den yadi ke yua kuli kuni o denpo.