Jan n diani U Tienu Laabaaliŋamo maama 6 - Gourmanchéma Bible

¹ Lani n pendi, Jesu den duodi yaa ñincianma n yi *Galile ki go yi Tibeliada.

² Ku niligu boncianla den ŋua o kelima bi den laadi wan tiendi yaa bancianma ki paagidi a yiama.

³ Jesu den doni ki kali li juali po leni o ŋoadikaaba.

⁴ Jufinba jaanma yaama n tie mi *Pendima jaanma den kuli.

⁵ Jesu n den yaadi ki laa ke yaa niligu n yaba kpendi o kani, o den yedi Filipi: «Ti baa da mi jiema hali le ke bine n baa ki je?»

⁶ O den yedi yeni ki bua ki biigi o. Wani oba den bani wan baa tieni yaala.

⁷ Filipi den goa ki yedi o: «Kujapiena kobilie dupen kan dagidi bikuli n baa waamu waamu.»

⁸ O ŋoadikaaba siiga nitoa, Simono Pieli waalo Andile, den yedi o:

⁹ «O jawaalo ye ne ki pia dupen bonba muu leni jami lie, ama line nan baa tieni ku naa niligu be?»

¹⁰ Jesu den yedi: «Teni mani bi niba kuli n kali.» Li sua ke ti moasoangidi ye likani boncianla, ke bi kali tipo. Bi jaba den bua ki pundi niba tudamuu (5 000).

¹¹ Jesu den taa bi dupenmuudiba ki tuondi U Tienu, ki boagidi yaaba n ka yeni kuli. O go den boagidi i jami, ke yua kuli baa wan bua yaa bianu.

¹² Ban den dini ki guo, o den yedi o ŋoadikaaba: «Gandigandi mani yaa boncaba n sieni, ke liba n da bia.»

¹³ Lani bi den gandigandi ki gbieni piiga n baabuodi lie bi dupenmuudiba yeni boncaba, ban den dini ki guo ki sieni yaa.

¹⁴ Bi niba yeni n den laa Jesu n tieni yaa bancianma, bi den yedi: «Moamoani wani n tie o sawalipualo yua n den baa cua ŋanduna nni yeni.»

¹⁵ Jesu den bani ke bi bua ki cuo o paalu, ki dini o li bali wan tua bi bado. Lani yaa po o den fii bikani ki goa ki gedi li juali po wani obebe.

Jesu cuoni u ñingbanu po

¹⁶ Ku yenjoboandigu o ŋoadikaaba den jiidi li juali po ki gedi mi ñincianma jaali kani.

¹⁷ Bi den kua ku ñinbiagu nni ki fii ki baa duodi ki gedi Kapenayuma. Ku ñiagu den bii ba, ke Jesu daa cua bikani.

¹⁸ Ku faaciangu den figi ke mi ñincianma langidi.

¹⁹ Ban den kudi ki cuoni kilo dajena muu, yaaka dajena luoba, bi den laa Jesu ke o cuoni u ñingbanu po ki nagindi ku ñinbiagu kani. Ti jawaandi den cuo ba.

²⁰ O den yedi ba: «Mine, yin da jie mani!»

²¹ Bi den bua wan kua ku ñinbiagu nni, ama lanyogu liga ku ñinbiagu den pundi ban caa yaa jaali kani.

Ku niligu lingi Jesu

²² Lan den fii ki fa yaa niligu n den sieni li jaali kani den sua ke ñinbiatoagu ki ye likani kali Jesu ŋoadikaaba n den kua yaagu. Jesu wani oba mo naa den kua leni o ŋoadikaaba, ama o ŋoadikaaba bebe n kua ki gedi.

²³ Ama ñinbiatoadi den ñani Tibeliada dogu po ki duodi ki nagini Jesu n den tuondi U Tienu mi jiema po ke bi dini naani.

²⁴ Lanwani ku niligu yeni n den laa ke Jesu ki ye likani, ke o ŋoadikaaba moko ki ye likani, bi den kua ti ñinbiadi yeni niinni, ki duodi ki gedi Kapenayuma ki baa n lingi Jesu.

Jesu n tie li miali yaa jiema

²⁵ Bi den laa o mi ñincianma boanduoli kani ki yedi o: «Canbaa, a cua nekanba be yogunu?»

²⁶ Jesu den goa ki yedi ba: «N yedi yi i moamoani, yii lingi nni kelima yin den laa yaa bancianma ka, li tie kelima yi den dini dupen ki guo.

²⁷ Yin da tuuni mani ki baadi yaa jiema n pendi ka. Yin yaa tuuni mani ki baadi yaa jiema n baa ye hali yaa yogunu kuli ki puuni yaa miali n kan gbeni. O *Ja Bijua n baa pa yi laa jiema kelima Baa U Tienu n tieni opo o maalima.»

²⁸ Lanwani bi den buali o: «Ti baa tieni lede ki soani U Tienu n bua yaa tuona?»

²⁹ Jesu den goa ki yedi ba: «U Tienu n bua yin soani yaa tuonli tie ke yin daani wan soani yua yeni.»

³⁰ Bi den buali o: «A baa tieni be bancianma, tin le ki nan daani a? A baa tieni be?

³¹ Ti yaajanba den di *mana mi fanpienma nni, nani lan diani maama: ‹O den puni ba yaa jiema n ñani tanpoli po ke bi di.› »

³² Lani yaa po Jesu den yedi ba: «N yedi yi i moamoani ke Musa ka den puni yi yaa jiema n ñani tanpoli po, ama n Baa n puuni yi yaa jemoanma n ña tanpoli po.

³³ Kelima U Tienu n puuni yaa jiema tie yaama n ñani tanpoli po ki jiidi ki puuni ŋanduna li miali.»

³⁴ Bi den yedi o: «Canbaa, yaa puuni ti laa jiema yogunu kuli.»

³⁵ Jesu den yedi ba: «Mini n tie li miali jiema. Yua n cua n kani, mi koma kan go gbadi o, yua n daani nni mo, u ñunñuunu kan go cuo o hali abada.

³⁶ N den waani yi la, ama baa ke yi laa nni, yii tuo ki daani nni.

³⁷ Baa n puni nni yaaba kuli baa cua n kani. N kan deli yua n cua n kani kuli.

³⁸ Kelima mii ñani tanpoli po ki jiidi ki baa tiendi n yanbuama ka, kali yua n soani nni yaa yanbuama.

³⁹ Yua n soani nni yanbuama yeni tie line: Min da biani wan puni nni yaa niba kuli siiga baa niyendo, ama ke min fiini ba bi tinkpiba siiga li juodidaali.

⁴⁰ N Baa yanbuama go tie line, ke yua n nuali Bijua ki daani o kuli n baa yaa miali n kan gbeni, ke min fiini o bi tinkpiba siiga li juodidaali.»

⁴¹ Lani yaa po Jufinba den yenbidi Jesu po kelima o den yedi: «Mini, n tie yaa jiema n ñani tanpoli.»

⁴² Bi den tua: «Wani ka tie Jesu, Josefi bijua, tin bani yua yaa naa leni o baa kuli yeni? Lede ke o yedi moala ke o ñani tanpoli po ki jiidi?»

⁴³ Jesu den goa ki yedi ba: «Da go yenbidi mani yi siiga.

⁴⁴ Oba kuli kan fidi ki cua n kani, li yaa tie Baa yua n soani nni n dadi yua yaa yama yaaka. Yua n cua n kani yeni, n baa fiini o bi tinkpiba siiga li juodidaali.

⁴⁵ Li diani bi sawalipuaba tila nni: U Tienu baa bangi o niba kuli. Yua n cengi Baa ki ga o bangima kuli, wani n baa cua n kani.

⁴⁶ Laa bua ki yedi ke niloba kuli laa Baa ka. Yua n ñani U Tienu kani yaaka. Wani bebe n laa Baa.

⁴⁷ N yedi yi i moamoani, yua n tuo ki daani nni pia yaa miali n kan gbeni.

⁴⁸ Mini, n tie li miali jiema.

⁴⁹ Yi yaajanba den dini mana mi fanpienma nni ki nan kpe.

⁵⁰ Ama min maadi yaa jiema maama yeni tie yaama n ñani tanpoli po ki jiidi, ke yua n di ma kuli kan kpe.

⁵¹ Mini, n tie yaa jiema n fo ki ñani tanpoli po ki jiidi ki puuni li miali. Yua n di laa jiema kuli baa ye hali yaa yogunu kuli. Min baa pa o yaa jiema yeni tie n gbanandi, min baa pa yaadi ŋanduna yaaba kuli po ke ban baa li miali.»

⁵² Lani yaa po Jufinba den nia leni biyaba ki tua: «O naa nilo baa ga lede ki pa ti o gbanandi tin ŋmani?»

⁵³ Jesu den yedi ba: «N yedi yi moamoani, yi yaa ŋmani o Ja Bijua gbanandi ki go ñuni o soama, yi kaa pia li miali yi niinni.

⁵⁴ Yua n ŋmani n gbanandi ki ñuni n soama kuli pia yaa miali n kan gbeni. N baa fiini o bi tinkpiba siiga li juodidaali.

⁵⁵ Kelima n gbanandi tie mi jemoanma, n soama mo tie li bonñokamoanla.

⁵⁶ Yua n ŋmani n gbanandi ki ñuni n soama kuli ye n niinni, ke n mo ye o niinni.

⁵⁷ Baa yua n soani nni fo, n moko fo kelima wani yaa po. Li go tie yeni leni yua n di nni, o mo baa fo kelima n yaa po.

⁵⁸ Mine n tie yaa jiema n ñani tanpoli po ki jiidi. Maa taa leni yi yaajanba n den dini yaama. Bi den kpe. Yua n di mi naa jiema baa ye hali yaa yogunu kuli.»

⁵⁹ Jesu den maadi lani wan den bangi li *bali maama bangima dieli nni Kapenayuma.

Yaa miali n kan gbeni maama

⁶⁰ O ŋoadikaaba siiga boncianla n den gbadi laa maama bi den yedi: «Mi naa maama pa, ŋme baa fidi ki ga ma?»

⁶¹ Jesu den bandi o pali nni ke o ŋoadikaaba yenbidi laa maama po ke o yedi ba: «Naani laa maama biidi yi pala ke yi baa ŋa nni bi?

⁶² Yi yaa ti laa ke o Ja Bijua goa ki do ki caa wan den kpa ye naani mo te?

⁶³ U Tienu Fuoma n puuni li miali, ti gbanandi ki pia fuoma. Min maadi yi yaa maama tie mi Fuoma yaa maama leni li miali yaa maama.

⁶⁴ Ama yi siiga nni nitianba ki tuo ki ŋoadi ma.» Jesu den yedi yeni kelima o den bani hali mi cilima yaaba n ki daani o, leni yua n baa janbi o n tie yua.

⁶⁵ O go den yedi: «Li tie lani yaa po ke n yedi yi ke oba kuli kan cua n kani, li yaa tie ke Baa puni o wan cua yaaka.»

⁶⁶ Laa yogunu liiga o ŋoadikaaba siiga boncianla den ŋa o ki guani puoli, kaa go yegi leni o.

⁶⁷ Jesu den buali bi piiga n niliediba: «Yi moko bua ki ŋa nni ki gedi yoo?»

⁶⁸ Simono Pieli den goa ki yedi o: «N Daano, ti baa gedi ŋme kani? Fini n pia yaa miali n kan gbeni yaa maama.

⁶⁹ Tinba wani daani ki bani cain ke fini n tie U Tienu Nigagidika.»

⁷⁰ Jesu den goa ki yedi ba: «Naani mini ka den gandi yinba bi piiga n niliediba te? Ama yi siiga nni yendo tie cicibiadiga.»

⁷¹ O den baa Judasa Isikalioto, Simono bijua, kelima baa ke wani Judasa n den tie bi piiga n niliediba siiga nni yua, o den baa janbi o.