Jan n diani U Tienu Laabaaliŋamo maama 5 - Gourmanchéma Bible

¹ Lani n pendi, Jesu den doni ki gedi Jelusalema Jufinba *jaanma siiga jaanyenma po.

² Jelusalema yeni nni den pia ku ñinbuogu ki kuu leni i Pe Buliñoabu. Ebilu maama nni ku ñinbuogu yeni den yi Beteseda ke jana muu ye ku kunkuni.

³ A yiama boncianla den dua a jana yeni soangu nni, bine den tie juama, bine diama, bine waba, [bine mo ti gbanankpiendi danba. Bi den gu mi ñima n langidi.

⁴ Kelima yogunuba maleki yen jiidi ku ñinbuogu yeni niinni ki langidi mi ñima. O yaa langidi ma, yua n kpa kua lienni yen paagi, baa wan pia yaa yianu kuli.]

⁵ Jayendo den ye likani ki yia hali piitaa n bina nii.

⁶ Jesu den laa o ke o dua, ki go bani ke o ye likani ke li waagi, ke o buali o: «Naani a bua ki baa laafia bi?»

⁷ O yiamo yeni den goa ki yedi o: «Canbaa, mii pia yua n baa kuani nni ku ñinbuogu nni mi ñima yaa langidi yaa yogunu. N yaa nagidi ki baa kua, nitoa yen kpa kua ki ŋa nni.»

⁸ Jesu den yedi o: «Taa a kaagu ki yaa cuoni.»

⁹ Lanyogunu liga o ja yeni den baa laafia. O den gbabi o kaagu ki taa ki tugi ki cuoni.

¹⁰ Li daali yeni den tie *U Tienu fuodima daali. Lanwani Jufinba den yedi yua n baa laafia yeni: «Dinla tie fuodima daali. Li kua ŋan tugi a kaagu.»

¹¹ O den goa ki yedi ba: «Yaa nilo n paagi nni n yedi ke min taa n kaagu ki yaa cuoni.»

¹² Lani bi den buali o: «Laa nilo tie ŋme, yua n yedi a ŋan taa a kaagu ki yaa cuoni yeni?»

¹³ Yua n den baa laafia naa den bani Jesu n tie yua, kelima li sua ke ku niligu ye likani ke Jesu kua ku niinni ke waa go laa o.

¹⁴ Lan den yen waamu Jesu den tuogi o U Tienu diegu nni ki yedi o: «Diidi ki le, a baa laafia, ŋan da go tieni *tuonbiadi, ke yaala n bia ki cie line n da cuo ŋa.»

¹⁵ O ja yeni den gedi ki waani Jufinba ke yua n paagi o tie Jesu.

¹⁶ Lani yaa po Jufinba den wangi Jesu fala kelima o den tiendi laa bonbuolu mi fuodima daali.

¹⁷ Jesu den yedi ba: «N Baa baa tuuni hali moala, n moko tuuni.»

¹⁸ Laa maama po Jufinba den lingi ki pugidi ki bua ki kpa o. Laa di den tie kelima o miidi mi fuodima daali kuali bebe ka, ama li tie kelima o go tua ke U Tienu n tie o Baa. Lani n tie ke o nua o yuli ke o de leni U Tienu.

Jesu doagidi wani U Tienu Bijua n pia yaa bali

¹⁹ Lanwani Jesu den yedi ba: «N yedi yi i moamoani, *Bijua kan fidi ki tieni liba kelima o yuceli paalu po. O tiendi wan laa ke Baa tiendi yaala bebe. Wani Baa n tiendi yaala kuli, Bijua moko baa tiendi lane.

²⁰ Kelima Baa bua Bijua ki wangi o wani oba n tiendi yaala kuli. O go baa waani o yaa bonbuolu n cie line ke li baa paki yi.

²¹ Kelima nani Baa n yen fiini bi tinkpiba ki teni ban goa ki yaa fo maama, yeni moko Bijua puuni li miali wan bua yua kuli.

²² Baa mo kan jia ti buudi leni oba kuli, o dini Bijua yo li bali wan jia ti buudi kuli.

²³ Lani ke bi niba kuli n yaa jigindi Bijua nani ban jigindi Baa maama yeni. Yua n kaa jigindi Bijua kuli, waa jigindi Baa yua n den soani o.

²⁴ N yedi yi i moamoani, yua n cengi n maama, ki daani yua n soani nni, pia yaa miali n kan gbeni. O kan cua ti buudi po, ama o ñani mi kuuma nni ki kua li miali nni.

²⁵ N yedi yi i moamoani, u yogunu kpendi ki pundi baa moala, ke yaaba n kpe baa gbadi U Tienu Bijua nialu. Yaaba n baa gbadi u mo kuli baa fo.

²⁶ Kelima nani Baa n pia li miali o niinni maama, o teni ke Bijua moko pia li miali o niinni yene.

²⁷ O go dini Bijua li bali wan yaa jia ti buudi kelima o tie o Ja Bijua.

²⁸ Lan da paki yi. U yogunu kpendi ke yaaba n ye a kula nni kuli baa gbadi o nialu

²⁹ ki ña bi kula nni. Yaaba n den tieni yaala n ŋani baa fii ki yaa fo, yaaba n den tieni yaala n bia baa fii ban jia leni ba ti buudi ki cuo ba.

³⁰ N kan fidi ki tieni pu n yuceli po. N ja ti buudi nani min gba U Tienu kani maama. N ja yaa buudi n tiegi, kelima mii lingi ki baa tiendi n yaa yanbuama, kali yua n soani nni yaa yanbuama.

Yaala n doagidi Jesu bali

³¹ N yaa tieni n yuli po siedi, n siedi ki tie moamoani.

³² Toa ye, yua n tiendi npo siedi. N bani ke wani n tiendi npo yaa siedi tie moamoani.

³³ Yi den soani bi tondiba Jan kani ke o den tieni siedi i moamoani po.

³⁴ Nisaalo siedi ki tie npo tiladi ka, ama n yedi yeni ke yin tindi.

³⁵ Wani Jan n den tie yaa fidisanga n co ki yieni. Yi den tuo ki mangi yi pala o yenma nni u yogunu waamu.

³⁶ Ama n pia yaa siedi n cie Jan n den tieni npo yaa siedi. Lani n tie min tuuni yaa tuona na, Baa n den puogi nni ke min yaa tuuni yaa ki dudi yeni. Laa tuona n tieni npo siedi ke Baa soani nni.

³⁷ Baa yua n den soani nni yeni, wani oba moko tieni npo siedi. Yi daa gbadi o nialu, yi daa laa o mo.

³⁸ O maama mo naa ye yi pala nni, kelima yi naa tuo ki daani wan soani yua yeni.

³⁹ Yi cogi ki kpaagi i Diani po bonŋanla kelima yi tama ke yi baa baa yaa miali n kan gbeni lienni. Laa Diani n tiendi npo siedi.

⁴⁰ Baa yeni, yii bua ki cua n kani ki baa li miali.

⁴¹ Mii lingi bi nisaaliba ka n kpiagi nni.

⁴² N bani yi, yii pia U Tienu po mi buama yi pala nni.

⁴³ N cua ki tie n Baa tondo, ama yii tuo nni. Ama nitoa yaa cua o yuceli cuama, yi baa tuo o.

⁴⁴ Yi tuo ki baadi ti kpiagidi yiyaba kani, ama yii lingi yaa kpiagidi n ñani U Tienu yua n kaa pia lielo kani. Yin tiendi maama yeni, yi baa ga lede ki dugi npo?

⁴⁵ Yin da tama ke mini n tie yua n baa kuli yi Baa kani. Yua n kuliti yi, lani n tie Musa, yin bili yi suginma yua yaa kani.

⁴⁶ Kelima yi yaa den daani Musa maama po, yi bi den baa daani n yaa maama moko. Kelima wan den diani yaa maama yeni maadi mini yaa maame.

⁴⁷ Ama yin ki daani wan den diani yaama po yeni, yi nan baa ga lede ki daani min maadi yaa maama po?»