Jan n diani U Tienu Laabaaliŋamo maama 4 - Gourmanchéma Bible

¹ *Falisieninba den gbadi ke yaa niba n den tua Jesu ŋoadikaaba ke o go *batisi ba, yaba ki cie Jan yaaba.

² Ama Jesu wani oba ka den batisi bi niba, o ŋoadikaaba n den batisi ba.

³ Wan den bandi ke bi yedi yeni, o den ñani Jude ki baa goa *Galile diema nni.

⁴ Li den tie tiladi wan tagi Samali diema nni.

⁵ Lane o den pundi Samali dogu yu n yi Sikali. Laa dogu den kuu leni Jakobo n den puni o bijua Josefi yaa kuanu.

⁶ Jakobo n den gbini yaa caali mo den ye likani. Jesu den cuoni ki coagi ki kali li caagbanli po. Li den bua ki pundi u yensiinu.

⁷ Samali pua den cua li caali kani ki baa yidi mi ñima. Jesu den yedi o: «Pa nni min ño.»

⁸ Li den sua ke o ŋoadikaaba kua u dogu nni ki baa n da mi jiema.

⁹ Samali pua yeni den buali o: «Li ga lede ke fini yua n tie Jufi mia mini Samali pua ke min pa ŋa ŋan ño?» O den yedi yeni kelima Jufinba naa den pia ŋantaado leni Samali yaaba.

¹⁰ Jesu den goa ki yedi o: «A yaa bi bani U Tienu paabu n tie yaala, leni mini yua n yedi a: ‹Pa nni min ño› yeni n tie yua, fini n bi baa mia o. Lani o bi baa pa ŋa yaa ñima n pia li miali.»

¹¹ O pua yeni den yedi o: «Canbaa, ŋaa pia loangu ke li caali mo nan ñua. A baa baa yaa ñima n pia li miali le?

¹² Naani a tama ke a cie ti yaaja Jakobo yua n den puni ti li naa caali? Wani oba n den ñuni li ñima wani leni o bijaba leni o yandi kuli.»

¹³ Jesu den goa ki yedi o: «Yua n ñuni mi naa ñima kuli, u ñunñuunu go baa co o.

¹⁴ Ama yua n ñuni min baa pa o yaa ñima kuli, u ñunñuunu kan go cuo o hali abada. Min baa pa o yaa ñima baa tua ñinbunli o niinni ki yaa pudi ki puubi hali yaa miali n kan gbeni nni.»

¹⁵ O pua yeni den yedi o: «Canbaa, pa nni laa ñima ke u ñunñuunu n da go cuo nni, ke min da go cua ne ki yidi.»

¹⁶ Jesu den yedi o: «Gedi ki ban yini a calo ne.»

¹⁷ O pua yeni den goa ki yedi o: «N naa pia ja.» Jesu den yedi o: «A maadi moamoani leni ŋan yedi ke ŋaa pia ja.

¹⁸ Kelima a den kuni jaba muu ke bi den tie a ciaba, ŋan ye leni yua moala naa tie a calo. A maadi moamoani.»

¹⁹ O pua yeni den yedi o: «Canbaa, n sua ke a tie sawalipualo.

²⁰ Ti yaajanba den kpiagidi U Tienu li naa juali po. Ama yinba Jufinba yedi ke tiladi bi niba n baa kpiagidi U Tienu naani tie Jelusalema.»

²¹ Jesu den yedi o: «Pua, daani n maama po. U yogunu kpendi ke yi kan go yaa kpiagidi yua n tie Baa li naa juali po, yaaka Jelusalema po.

²² Yinba Samali yaaba, yii bani yin kpiagidi yaala, ama tinba Jufinba wani, ti kpiagidi tin bani yaala, kelima mi *tindima baa ña Jufinba kani.

²³ Ama, u yogunu kpendi, u pundi baa moala ke yaa niba n kpiagidi Baa moamoani, baa kpiagidi o bi pala nni leni i moamoani. Kelima Baa lingi yaaba n baa kpiagidi o yene.

²⁴ U Tienu tie mi fuoma. Lani yaa po li tie tiladi ke yaaba n baa kpiagi o kuli n yaa kpiagidi o bi pala nni leni i moamoani.»

²⁵ O pua yeni den yedi o: «N bani ke *U Tienu n Gandi Yua baa cua, wani, ban yi yua Kilisiti yeni. O yaa cua o baa waani ti li bonla kuli.»

²⁶ Jesu den yedi o: «Mini yua n maadi leni a yeni tie wani.»

²⁷ Lanyogunu o ŋoadikaaba den goa ki cua. Li den paki ba ke o boe leni o pua yeni, ama oba ki den buali: «A bua be?» yaaka, «Be yaa po ke a maadi leni o?»

²⁸ O pua yeni den ŋa o cuali, ki goa ki kua u dogu nni ki yedi bi niba:

²⁹ «Cua mani ki ban le yaa nilo n waani nni min tieni yaala kuli. Waa baa tie U Tienu n Gandi Yua kaa?»

³⁰ Bi niba den ñani u dogu nni ki cua Jesu kani.

³¹ Laa yogunu Jesu ŋoadikaaba den yedi o: «Canbaa, a di.»

³² Ama o den yedi ba: «N pia yin ki bani yaa jiema ki baa je.»

³³ Lane o ŋoadikaaba den buali biyaba: «Naani niloba cuani opo bonjekaala bi?»

³⁴ Jesu den yedi ba: «N yaa jiema tie min yaa tiendi yua n soani nni yanbuama, ki yaa tuuni o tuonli hali ki dudi.

³⁵ Yii tua ke ŋmaali naa ka sieni yin taani ti kpaandi? Ama mini wani n yedi yi, yaadi mani ki nuali i kuani, i beni ki pundi yin taani ti kpaandi.

³⁶ Yua n yendi baadi o panpaani ki taagi ti kpaandi yaa miali n kan gbeni po, ke yua n buu leni yua n yendi kuli n taani ki mangi bi pala.

³⁷ Ban pua yaa kpanjama na tie moamoani: ‹One buu, one mo yendi.›

³⁸ N soani yi ke yin yendi yin ki den soani yaala yaa po. Nitoaba den soani li tuonli ke moala yi mo taani ti kpaandi kelima bi den soani.»

³⁹ Yaa niba n den ye laa dogu nni ki tie Samali yaaba, boncianla den tuo ki daani Jesu kelima o pua yeni den yedi ba: «O waani nni min den tieni yaala kuli.»

⁴⁰ Samali niba yaaba n den cua Jesu kani yeni den mia o ke wan sedi leni ba. O go den tieni likani dana lie.

⁴¹ Yaaba n tuo ki daani o den pugini hali boncianla kelima ban den gbadi yaa maama o kani po.

⁴² Bi den yedi o pua yeni: «Moala, laa di tie ŋan bi waani ti yaa maama bebe ka teni ke ti tuo ki daani o, tinba tiba gbadi o maama ki bani ke moamoani wani n tie ŋanduna Candaano.»

Jesu paagi o bado koanbali bijua

⁴³ Laa danlieda n den pendi Jesu den fii ki ñani lankani ki gedi Galile diema nni.

⁴⁴ Wani oba den yedi ke bi kan kpiagi sawalipualo o dandogu nni.

⁴⁵ Wan den pundi Galile, laa diema yaaba den ga o cangu bonŋanla kelima bi moko den gedi Jelusalema ki jaani mi *Pendima jaanma, ki laa wan den tieni yaala kuli laa jaanma yogunu.

⁴⁶ Jesu den goa ki gedi Galile yaa Kana, wan den teni ke mi ñima lebidi ki tua duven naankani yeni. O bado koanbali den ye Kapenayuma dogu nni ke o bijua yia.

⁴⁷ Li koanbali yeni n den gbadi ke Jesu ñani Jude diema nni ki cua Galile diema nni, o den cua o kani ki mia o ke wan yegi leni o ki gedi Kapenayuma ki ban paagi o bijua kelima o nagini mi kuuma.

⁴⁸ Jesu den yedi o: «Yi yaa laa mi bancianma leni li bonpakikaala yaaka, yi kan daani nni.»

⁴⁹ Li koanbali den yedi o: «Canbaa, cua tin yegi ki gedi ke n biga daa kpe.»

⁵⁰ Jesu den yedi o: «Kuni, a biga baa laafia.» O ja yeni den daani Jesu n maadi o yaa maama po ki gedi.

⁵¹ Wan den ye u sanu nni, o naacenba den tuogi o ki waani o ke o biga baa laafia.

⁵² O den buali ba wan li baa laafia yaa yogunu. Bi den waani o ke wonli li yenlebidile ke o gbananbiendi den kagidi opo.

⁵³ Ki biga baa den bani ke li den tie laa yogunu cap ke Jesu yedi o: «A biga baa laafia.» Wani leni o deni yaaba kuli den tuo ki daani Jesu.

⁵⁴ Line n tie Jesu n den tieni yaa bancianliema wan den ñani Jude diema nni ki guani Galile diema nni.