Jan n diani U Tienu Laabaaliŋamo maama 21 - Gourmanchéma Bible

¹ Lani n pendi Jesu go den doagidi o yuli o ŋoadikaaba po ke bi ye Tibeliada ñincianma boanjaali po. Line n tie wan den doagidi o yuli bipo maama:

² Simono Pieli leni Toma, ban go yi yua ku Poligu, leni *Galile yaa Kana yua Nataneli, leni Sebede bijaba, leni ŋoadikatoaba bonba lie den taa ki ye.

³ Simono Pieli den yedi ba: «N caa u jankpaanu.» Bi den yedi o: «Ti baa yegi leni a.» Bi den ñani ki kua ku ñinbiagu nni ki gedi u jankpaanu, ama laa ñiagu kuli baa den baa pu.

⁴ U yienu n den pudi yaa yogunu Jesu den se li boanjaali kani, ama bi ŋoadikaaba naa den bandi ke li tie Jesu.

⁵ Jesu den buali ba: «N bila, naani yi pia i jami?» Bi den goa ki yedi o: «A-a.»

⁶ O den yedi ba: «Lu mani yi taalu ku ñinbiagu jienu po, yi baa baa.» Lanwani bi den luni u taalu ke u gbie i jami hali ke baa fidi ki dadi u.

⁷ Jesu n den bua yaa ŋoadika den yedi Pieli: «Li tie o Diedo yo.» Simono Pieli n den gbadi ke li tie o Diedo, wani yua n den se benbili, den goli o kpalibu ki yugi ki cii mi ñima.

⁸ Yaa ŋoadikaaba n den sieni den cua leni ku ñinbiagu ki dadi u taalu hali li wali kani ke u gbie i jami kelima baa den foagidi leni li jaali ke li cie nani nukpanduna kobilie.

⁹ Ban den ñani ku ñinbiagu nni ki sedi li boanjaali po, bi sua ke mi fantama ye likani ke i jami ŋuabi mipo ke dupen mo ye.

¹⁰ Jesu den yedi ba: «Cuani mani yin cuo yaa jami yeni waamu na.»

¹¹ Simono den kua ku ñinbiagu nni ki dadi u taalu ki cuani li boanjaali kani. U den gbie a jangbenga, ke a pundi kobiga n piimuu n jami taa. Baa ke i jami den yaba yeni, u taalu naa den padi.

¹² Jesu den yedi ba: «Cua mani ki siibi.» Bi siiga baa niyendo naa den tuo ki buali o: «A tie ŋme?» Bi den bani ke li tie o Diedo.

¹³ Lanwani Jesu den nagini ki taa dupen ki teni ba, ki go teni ba i jami moko.

¹⁴ Lani n den tie mi tataama hali Jesu n den fii bi tinkpiba siiga ki doagidi o yuli o ŋoadikaaba po.

Jesu maadi leni Pieli

¹⁵ Ban den siibi ki gbeni, Jesu den buali Simono Pieli: «Jan bijua Simono, a sua ke a bua nni ki cie bine bi?» O den goa ki yedi o: «Mm, n Diedo, a bani ke n bua ŋa.» Jesu den yedi o: «Ŋan yaa kpaa n pebila.»

¹⁶ Jesu go den buali o: «Jan bijua Simono, a sua ke a bua nni bi?» Pieli den goa ki yedi o: «Mm, n Diedo, a bani ke n bua ŋa.» O den yedi o: «Ŋan yaa kpaa n pe.»

¹⁷ Jesu go den buali o mi tataama: «Jan bijua Simono, a sua ke a bua nni bi?» Li den biidi Pieli pali ke Jesu buali o taalima taa: «A sua ke a bua nni bi?» Lane o den yedi o: «N Diedo, a bani li bonla kuli, a bani ke n bua ŋa.» Jesu den yedi o: «Ŋan yaa kubi n pe.

¹⁸ N waani a i moamoani, ŋan den tie jawaalo, a den yie ki ñagindi fini aba a gbanñagidigu, ki caa ŋan bua naani. Ama a yaa podi, a baa tandi a nii nitoa n ñagini apo, ki gedini a ŋan kaa bua naani.»

¹⁹ Jesu n den maadi yeni, o den doagidi Pieli n baa kpe yaa kuuma lan kpiagi U Tienu. Lani Jesu den yedi Pieli: «Ŋoadi nni.»

Jesu leni wan bua yaa ŋoadika

²⁰ Pieli den jili ki laa Jesu n bua yaa ŋoadika ke o se bi puoli. Laa ŋoadika n den kpagini ki nagini Jesu ban den taani ki di ban den cuo Jesu yaa ñiagu, ki den buali Jesu: «N Diedo, ŋme n baa janbi a?»

²¹ Pieli n den laa o, o den yedi Jesu: «N Diedo, one mo te?»

²² Jesu den yedi o: «N yaa bua wan yaa ye hali min go baa cua, li ŋua ŋa bi? Fini, ŋoadi nni.»

²³ Lani yaa po mi maama den yadi bi kpiiba siiga ke laa ŋoadika kan kpe. Ama Jesu naa den yedi Pieli ke laa ŋoadika kan kpe, o den yedi: «N yaa bua wan yaa ye hali min go baa cua, li ŋua ŋa bi?»

Mi majuodikaama

²⁴ Wani n tie yaa ŋoadika n tiendi siedi yaa maama n tie na kuli po, ki diani ma. Ti bani ke wan tieni yaa siedi tie moamoani.

²⁵ Jesu go den tieni bontoala boncianla. Bi yaa bi diani likuli bonyenla yenla, n tama ke baa ŋanduna nni kuli kan bi yaa pia yaa kaanu n baa dagidi ki ga ban diani yaa tila.