Jan n diani U Tienu Laabaaliŋamo maama 2 - Gourmanchéma Bible

¹ Li dataali daali li pocaali den tieni Kana, *Galile diema nni. Jesu naa mo den ye likani.

² Bi den yini Jesu leni o ŋoadikaaba moko ban cua li pocaali yeni.

³ Duven n den poadi, Jesu naa den yedi o: «Baa go pia duven.»

⁴ Jesu den goa ki yedi o: «Pua, be n ye mini leni fini siiga? N yogunu daa pundi.»

⁵ O naa den yedi bi naacenba: «Yin tieni mani wan baa yedi yi yaala kuli.»

⁶ Bobiciama luoba den ye likani ki tie tana ki tie Jufinba nidiŋanbima bogida po. Bobicianyenli kuli baa fidi ki ga litidi kobiga.

⁷ Jesu den yedi ba: «Yin gbieni mani a bobiciama na mi ñima.» Bi den gbieni a ke a landilandi.

⁸ Lane o den yedi ba: «Kabidi mani ki gedini mi pocaajiema yudaano kani.» Bi den gedini.

⁹ Mi pocaajiema yudaano den leni yaa ñima n lebidi ki tua duven kaa bani man ñani naani. Ama yaa naacenba n den kabidi den bani.

¹⁰ Lani o den yini o pocaancalo ki yedi o: «Nilo kuli yen kpa cuani wan yini yaaba po yaa duven n ŋani boncianle no. Bi yaa ñuni ki guo, wan di cuani bipo yaa duven n ŋani waamu. Ama fini wani a bi wuoni yaa duven n ŋani boncianla ki ti cuani o moala.»

¹¹ Lani n tie Jesu n den cili ki tieni yaa bancianma Kana, Galile diema nni. O den doagidi o kpiagidi ke o ŋoadikaaba den daani o.

¹² Lani n pendi Jesu den gedi Kapenayuma, wani leni o naa leni o waamu leni o ŋoadikaaba kuli, ki tieni likani danaba.

Jesu kua U Tienu diegu nni

¹³ Jufinba jaanma, mi *Pendima jaanma yeni n den nagidi, Jesu den doni ki gedi Jelusalema.

¹⁴ O den laa U Tienu diegu nni yaaba n kuadi i ne leni i pe leni mu kpaajiemu, leni bi ligilebidiba ke bi ka.

¹⁵ O den taa u baabu ki lebini ke u tua nani u baliju yeni, ki deli bikuli ki ñani ba U Tienu diegu nni, bani leni bi pe leni bi ne kuli. O go den tudi ki luni bi ligilebidiba kpagidi, ki yayadi bi ligi,

¹⁶ ki yedi a kpaajekuada: «Ñani mani laa bonla nekanba. Yin da teni n Baa diegu n tua daaga.»

¹⁷ O ŋoadikaaba den tiadi ke li diani ki yedi: «A diegu yankuali cuo nni hali boncianla.»

¹⁸ Lani yaa po Jufinba den yedi o: «A baa tieni be bancianme ki doagidi tipo ke a pia li bali ki tieni ŋan tieni yaala na?»

¹⁹ Jesu den goa ki yedi ba: «Bolini mani U Tienu diegu na, n go baa maa li dana taa siiga.»

²⁰ Jufinba den goa ki yedi o: «Li den pundi piinaa n bina luoba ke bi maa U Tienu diegu na, ke fini wani baa goa ki maa li dana taa?»

²¹ Ama wan den maadi U Tienu diegu yaali yaa maama yeni den tie o gbanandi.

²² Wan den fii bi tinkpiba siiga, o ŋoadikaaba den tiadi ke o maadi laa maama, ki daani i Diani n yedi yaala, leni Jesu n den maadi yaa maama.

Jesu bani yaala n ye o nilo pali nni kuli

²³ Jesu n den ye Jelusalema mi Pendima jaanma yogunu yeni, bi niba boncianla den laa wan tiendi yaa bancianma, ki daani o yeli nni.

²⁴ Ama Jesu ki den dugi bipo, kelima o den bani bikuli.

²⁵ Laa den tie opo tiladi ban tieni opo siedi niloba kuli po. Wani oba den bani yaala n ye o nisaalo niinni.