Jan n diani U Tienu Laabaaliŋamo maama 19 - Gourmanchéma Bible

¹ Lani Pilata den teni ke a minteela taa Jesu ki pua o i baliji.

² A minteela den taa i konkoni ki piani nani ki badifogiliga yeni ki cibini o, ki go golini o bu kpalimoanbu.

³ Lani bi den kpendi o kani ki tua: «Ti fuondi a, fini Jufinba bado.» Bi go den pabini o.

⁴ Pilata go den ñani ki gedi Jufinba kani ki yedi ba: «Diidi, n baa teni ban ñani o yikani, ke yin bandi ke mii laa ke o tieni liba yaala n baa teni min cuo o.»

⁵ Lane Jesu den cua bikani ki ciibi i konkoni ki goli bu kpalimoanbu. Pilata den yedi ba: «No mani o ja na.»

⁶ Bi kopadicianba yudanba leni bi jiidikaaba n den laa Jesu, bi den tiani: «Joani o li *dapoanpoanli po, joani o li dapoanpoanli po.» Pilata den yedi ba: «Yinba yiba n taa o ki joani o li dapoanpoanli po, kelima mini, mii laa ke o tieni liba yaala n baa teni min cuo o.»

⁷ Jufinba den goa ki yedi o: «Tinba wani pia li *bali maama. Laa bali maama mo yaa po li bili ke li pundi wan kpe, kelima o den yedi ke o tie U Tienu Bijua.»

⁸ Pilata n den gbadi laa maama, o den jie ki pugini,

⁹ ki go den kua o bujiali kani ki buali Jesu ki yedi: «A ñani lepoe?» Jesu naa den guani o maamaba kuli.

¹⁰ Lani yaa po Pilata den yedi o: «A kan guani mini liba? Naani ŋaa bani ke n pia li bali ki baa faabi a, yaaka ki joani a li dapoanpoanli po?»

¹¹ Jesu den goa ki yedi o: «A kan baa npo baliba, bi yaa den puni a li tanpoli po. Li tie lani yaa po ke yua n den cuo nni ki teni a pia i tagili ki cie fini.»

¹² Lanyogunu liiga Pilata den moandi ki baa faabi Jesu, ama Jufinba den tiani: «A yaa faabi o naa nilo, ŋaa tie*Sesa danli. Yua n yedi ke o tie bado kuli, o fiini mi yiema Sesa po.»

¹³ Pilata n den gbadi laa maama o den ñani Jesu niinpo, ki kali u bujiakaanu po ke u ye yaa kaanu n yi “Ti Tanpabidi luolu”, Ebilu maama nni u yi Gabata.

¹⁴ Laa daali den tie mi *Pendima jaanma boginli daali, ke li bua ki pundi u yensiinu. Pilata den yedi Jufinba: «Diidi mani yi bado nna.»

¹⁵ Bi den tiani: «Kpa o, kpa o, joani o li dapoanpoanli po.» Pilata den yedi ba: «Min joani yi bado li dapoanpoanli po bi?» Bi kopadicianba yudanba den goa ki yedi o: «Tii pia baditoa kali Sesa.»

¹⁶ Lanwani Pilata den teni ba Jesu ban ban joani o li dapoanpoanli po. Lane bi den taa Jesu ki gedini o.

Bi joani Jesu li dapoanpoanli po

¹⁷ Jesu den bugi o dapoanpoanli, ki ñani u dogu nni ki ban caa ban yi yaa kaanu “ku Yukuokuogu kaanu”. Ebilu maama nni bi yi u Goligota.

¹⁸ Lankane ke bi den joani o li dapoanpoanli po. Bi go den joani nitoaba bonba lie a dapoanpoana po, yendo o jienu, yendo o ganu, ke Jesu mo ye siiga nni.

¹⁹ Pilata den diani i diani ki tabini li dapoanpoanli yuli po. Yaala n den diani n tie na: “Nasaleti Jesu, Jufinba bado.”

²⁰ Jufinba boncianla den cogi i diani yeni, kelima ban den joani Jesu li dapoanpoanli po naankani den kuu leni u dogu. Li den diani Ebilu maama nni, Latena maama nni leni Gileka maama nni.

²¹ Lani yaa po bi kopadicianba yudanba den yedi Pilata: «Ŋan da diani “Jufinba bado”, ama ŋan diani ke o yedi ke o tie Jufinba bado.»

²² Pilata den goa ki yedi ba: «Min diani yaa maama, n diani ma.»

²³ Yaa minteela n den joani Jesu li dapoanpoanli po, den taa o tiadi ki boagidi kaani naa, ke minteeli kuli den baa kaanyendu. Bi den taa o liadicianli moko, yaali n naa den pia ñialu kelima li den tie cabiyenli, ki cili tanpoli hali tinga, ki yedi biyaba:

²⁴ «Tin da padi li, tin toa li tiatia ki le yua n baa baa li.» Lani den tieni ke yaala n diani i Diani nni n tieni ki dudi: «Bi boagidi n tiayiekaadi bi siiga, Ki toa tiatia n liadicianli po.» Lani n tie a minteela n den tieni yaala.

²⁵ Jesu naa leni o naa waalo, leni Kilopa pua Maliyama, leni Magidala yua Maliyama den se ki nagi Jesu dapoanpoanli.

²⁶ Jesu n den laa o naa leni wan bua yaa ŋoadika ke o se leni o, o den yedi o naa: «Pua, no a bijua nna.»

²⁷ Lani o den yedi o ŋoadika yeni: «No a naa nna.» Laa yogunu liiga laa ŋoadika den kubi Jesu naa o denpo.

Jesu kuuma

²⁸ Lani yaa puoli, kelima Jesu den bani ke li bonla kuli tieni ki dudi, o den yedi: «U ñunñuunu pia nni.» O den yedi yeni ke yaala n diani i Diani nni n tieni ki dudi.

²⁹ Ku ñintiagu den se likani ki gbie leni mi ñinmiligima. Niyendo den taa u cietuogu ki pagini mi niinni ki tuuni *isope benu, ki gedini Jesu ñoabu kani.

³⁰ Jesu n den fua mi ñinmiligima yeni o den yedi: «Likuli tieni ki dudi.» Lani o den tibini ki cabi o naano ki kpe.

Bi muu Jesu logili

³¹ Li sua ke li tie li boginli daali, ke li baa fii ki fa ki yaa tie *U Tienu fuodima daali, yaali n gagidi ki tie jaancianma. Jufinba naa den bua a kpiema n yaa ye a dapoanpoana po laa daali. Lanwani bi den mia Pilata wan teni ban kuakua yaaba n ye a dapoanpoana po taana ki ñani ba likani.

³² Lani yaa po a minteela den gedi likani ki kua o nikpialo taana leni o nilielo yaa, ban den joani yaaba a dapoanpoana po leni Jesu.

³³ Ama ban den pundi Jesu kani ki sua ke o kpe no, baa den kua o taana.

³⁴ A minteela siiga nni yendo den muu Jesu logili li kpaanli. Lanyogunu mi soama leni mi ñima den ñani likani.

³⁵ Yua n den laa lankuli n tieni siedi lipo. O siedi tie moamoani. O go bani ke o maadi moamoani. O tieni siedi yeni ke yi moko n tuo ki ŋoadi Jesu ki dugi opo.

³⁶ Lankuli den tieni yeni ke i Diani n kua: «Bi kan kua o kpaba siiga baa yenli.»

³⁷ I Diani go yedi kaanto: «Bi baa diidi ban den muu yua.»

Jesu piinma

³⁸ Lani n pendi, Alimate dogu yua Josefi, yua n den tie Jesu ŋoadika, ama ŋasiili nni, kelima o den jie Jufinba, den mia Pilata ke wan pa o u sanu wan taa Jesu o kpiemo ki piini. Pilata den puni o u sanu, ke o gedi ki ban taa o kpiemo.

³⁹ Nikodema, yua n den kpa cua Jesu kani ku ñiagu moko den taani leni Josefi ki cuani *mili leni *alowesi ki kakali ke li kpiagu den pundi kilo piitaa.

⁴⁰ Bi jaliediba yeni den taa Jesu o kpiemo ki fini o a cabipiena ki taani leni tulale yua n pia u nuulimanu nani Jufinba n maani ki tiendi maama.

⁴¹ U kuanu den nagi ban den joani Jesu li dapoanpoanli po naankani. Yaa kuli n tie kupanli ke bi daa kuani kpiemo kuli lienni den ye u kuanu yeni niinni.

⁴² Nani lan den tie Jufinba n baa bogini mi fuodima daali po yaa daali ke li kuli mo ye koankoanma nni yeni, bi den kuani Jesu o kpiemo laa kuli nni.