Jan n diani U Tienu Laabaaliŋamo maama 18 - Gourmanchéma Bible

¹ Jesu n den maadi laa maama, wani leni o ŋoadikaaba den ñani ki duodi Sedilo fuanu. Sadinga den ye likani. Jesu leni o ŋoadikaaba den kua lienni.

² Judasa yua n den baa janbi o den bani li kaanu, kelima Jesu den maani ki caa lipo leni o ŋoadikaaba.

³ Judasa den baa a minteela cagili yenli leni U Tienu diegu jiidikaaba, bi kopadicianba yudanba leni *Falisieninba n soani yaaba. O den gedini ba likani, ke bi kubi mu fidisanmu leni i mukaani leni ti toatiadi.

⁴ Jesu den bani yaala n baa tieni o kuli ke o caadi ki yedi ba: «Yi lingi ŋme?»

⁵ Bi den goa ki yedi o: «Nasaleti Jesu.» O den yedi ba: «Mini n na.» Judasa yua n den janbi o den se leni ba.

⁶ Jesu n den yedi ba: «Mini nna» yeni, bi den guani puoli ki baa yanyanli.

⁷ Lanwani o go den buali ba: «Yi lingi ŋme?» Bi go den yedi o: «Nasaleti Jesu.»

⁸ Jesu den goa ki yedi ba: «N waani yi ke li tie mini. Lanwani yi yaa lingi mini, cedi mani bine n gedi.»

⁹ O den yedi yeni ke wan den kpa maadi yaa maama n tieni, mani nna: «Ŋan puni nni yaaba yaa siiga, mii biani baa yendo.»

¹⁰ Simono Pieli den kubi ki jugisiega. O den noadi ga ki pua bi kopadicianba bado naacemo, ki pedi ki joandi o jientubili. O naacemo yeni den yi Malikusa.

¹¹ Jesu den yedi Pieli: «Ŋuuni a jugisiega. Naani n kan ño Baa n puni nni yaa fala tadiñokaaga nni bi?»

Bi gedini Jesu Hana kani

¹² A minteela cagili yeni leni bi yudaano leni Jufinba n den soani bi jiidikaaba yaaba yeni den cuo Jesu ki loli o.

¹³ Bi den kpa gedini o Hana kani, kelima wani Hana den tie Kayifa cuado. Kayifa den tie bi kopadicianba bado laa binli.

¹⁴ Wani Kayifa den tie yua n den waani Jufinba ke li baa ŋani niyendo n kpe bi buolu po.

Pieli nia ke waa bani Jesu

¹⁵ Simono Pieli leni ŋoadikatoa den ŋua Jesu. Bi kopadicianba bado den bani laa ŋoadika. Lani yaa po o den baa ki yegi leni Jesu ki kua bi kopadicianba bado luolu nni.

¹⁶ Ama Pieli den se niinpo, bu buliñoajabu kani. Jesu ŋoadika, bi kopadicianba bado n bani yua yeni, den lebidi ki maadi leni yaa jafaano n gu bu buliñoajabu ki teni ke Pieli kua.

¹⁷ Laa yualo, bu buliñoajabu guudo yeni, den yedi Pieli: «A moko tie laa nilo ŋoadikaaba siiga yua, bi yeni kaa?» Pieli den yedi o: «A-a, mii tie.»

¹⁸ Li den sua ke ti wadi ye ke bi naacenba leni bi jiidikaaba yeni cuoni mi fantama ki se ki yie. Pieli moko den se leni ba ki yie.

Bi kopadicianba bado buali Jesu o maama fuuli

¹⁹ Bi kopadicianba bado den buali Jesu o ŋoadikaaba maama leni o bangima maama fuuli.

²⁰ Jesu den goa ki yedi o: «N den maadi asala nni ke bi niba kuli gba. Yogunu kuli n maadi li *bali maama bangima diena nni leni U Tienu diegu nni kuli, Jufinba kuli n yen taagi naankani. Mii den wuoni ki maadi liba kuli.

²¹ Be yaa po ke a buali nni i buali? Buali yaaba n den cengi min maadi ba yaa maama. Bani, bi bani min den yedi yaala.»

²² Wan den maadi yeni bi jiidikaaba siiga yendo yua n den se ki ku likani, den pabi o ki yedi: «Naani a baa guani bi kopadicianba bado yeni yoo?»

²³ Jesu den goa ki yedi o: «N yaa maadi ki tudi, waani n tudima. Ama n yaa maadi ke li tiegi, be yaa po ke a pua nni?»

²⁴ Lani Hana den loli o ki soani o bi kopadicianba bado Kayifa po.

Pieli go nia ke waa bani Jesu

²⁵ Li sua ke Simono Pieli se likani ki yie mi fantama. Lane bi den yedi o: «A moko tie o ŋoadikaaba siiga yua, bi yeni kaa?» O den nia ki yedi: «A-a, mii tie.»

²⁶ Bi kopadicianba bado naacemo yendo, Pieli n den pedi ki joandi yua yaa tubili yeni yaa kpiilo, moko den yedi o: «Mii bi laa ŋa ke a ye leni o sadinga nni?»

²⁷ Pieli go den nia. Lanyogunu ku kootongu den mua.

Bi gedini Jesu Pilata bujiali kani

²⁸ Bi den ñani Jesu Kayifa kani ki gedini o gufeneeli Pilata bujiali kani. Li den tie ku tiŋaapanpangu. Bani biba, baa den kua gufeneeli bujiali kani ke ban da ti *joagini biba, ki fidi ki baa ki je mi *Pendima jaanjiema.

²⁹ Lani yaa po Pilata den ñani ki gedi bikani ki yedi: «Yi yedi ke o naa nilo tieni be?»

³⁰ Bi den goa ki yedi o: «O naa nilo yaa tiendi yaala n bia ti kan bi cuo o ki cuani o a kani.»

³¹ Lanwani Pilata den yedi ba: «Yinba yiba, yin taa o ki ŋoadi yi *balimaama ki jia leni o ti buudi.» Jufinba den yedi o: «Tii pia sanu ki jia leni o nilo ti buudi ki kpa o.»

³² Li den tieni yeni ke Jesu n den maadi yaa maama ke mi doagidi wan baa kpe maama n tieni.

³³ Pilata den goa ki kua o bujiali kani ki yini Jesu ki yedi o: «Naani a tie Jufinba bado bi?»

³⁴ Jesu den goa ki buali o: «Naani a maadi yeni a yuli po bi, bi nitoaba n waani a n maama?»

³⁵ Pilata den goa ki yedi o: «Naani n mo tie Jufi yoo? A nibuolu yaaba leni bi kopadicianba yudanba n cuo ŋa ki cuani a n kani. A tieni be?»

³⁶ Jesu den goa ki yedi o: «N diema naa tie ŋanduna na yaama ka. N diema yaa bi tie ŋanduna na yaama, n naacenba bi baa koani ki ga nni ke ban da teni nni Jufinba. Ama n diema ki tie ŋanduna yaama ka.»

³⁷ Laa maama po Pilata den yedi o: «Lanwani a tie bado yo?» Jesu den goa ki yedi: «Fini n yedi la, n tie bado. Min den cua ŋanduna nni ke bi mali nni den tie ke min yaa tiendi siedi i moamoani po. Yua n tie i moamoani yua kuli baa cengi min yedi yaala.»

³⁸ Pilata den yedi o: «Be n tie i moamoani?» Pilata n den yedi yeni, o den goa ki ñani ki gedi Jufinba kani ki yedi ba: «Mii laa wan tieni yaala ke li baa teni min cuo o.

Pilata jia ki kadi ke ban kpa Jesu

³⁹ Ama yi pia li bogidili ke min faabi kpaadiyenli ki teni yi mi*Pendima jaanma yogunu. Naani yi bua min faabi yipo Jufinba bado bi?»

⁴⁰ Bi den tiani: «A-a, wani ka, faabi tipo Balabasa.» To, Balabasa yeni den tie sanjiale.