Jan n diani U Tienu Laabaaliŋamo maama 17 - Gourmanchéma Bible

¹ Jesu n den maadi laa maama, o den yaadi ki diidi tanpoli po ki yedi: «N Baa, u yogunu pundi. Kpiagi a Bijua, ke Bijua mo n kpiagi a.

² Kelima a dini o li bali ke o die bi nisaaliba kuli, ke wan pa ŋan puni o yaaba kuli yaa miali n kan gbeni.

³ Line n tie yaa miali n kan gbeni, ke ban bandi a, fini yua bebe n tie U Tienu moamoani, ki go bandi ŋan soani yua, Jesu Kilisiti.

⁴ N den kpiagi a ki tinga nni, ki soani ki dudi ŋan den puogi nni yaa tuonli.

⁵ Moala, fini Baa, ŋan kpiagi nni a kani leni min den kpa pia yaa kpiagidi a kani ke ŋanduna daa den ye.

⁶ N doagidi a yeli ŋan den puni nni yaa niba kani ŋanduna siiga. Bi den tie a yaa yaaba, ke a den puni nni ba. Bi mo tuo ki kubi a maama.

⁷ Moala bi bandi ke ŋan puni nni yaala kuli ñani a kani.

⁸ Kelima n caa ba ŋan den soani nni yaa tondu, bi mo ga ki bandi ke n ñani a kani moamoani, ki go daani ke fini n soani nni.

⁹ N mia ŋa bi yaa po yo. Mii mia ŋa ŋanduna po ka, ama n mia ŋa ŋan puni nni yaaba yaa po yo, kelima bi tie a yaa yaaba.

¹⁰ Min die yaala kuli tie a yaala, ŋan die yaala kuli mo tie n yaala. N baa ti kpiagidi kelima bi yaa po.

¹¹ N kan go yaa ye ŋanduna nni. Ama bani wani baa ye ŋanduna nni. Mini n caa a yaa kani. Baa yua n gagidi ki ŋani, ŋan yaa kubi ba kelima a yeli po, ŋan puni nni yaa yeli yeni, ke ban yaa tie yendo nani tinba n tie yendo maama.

¹² Min den ye leni ba, n den kubi ba kelima a yeli paalu po, ŋan puni nni yaa yeli yeni po. N den kubi ba ke bi siiga baa yendo ki bodi kali yua n den baa bodi yaaka, ke i Diani n yedi yaala n tieni.

¹³ Moala n kpendi a kani. N maadi lani ki da ye ŋanduna nni ke min pia yaa pamanli buolu n dagidi bi niinni.

¹⁴ N caa ba a tondu. Ŋanduna yaaba nani ba, kelima baa go tie ŋanduna yaaba nani mini n ki tie ŋanduna yua maama.

¹⁵ Mii mia ŋa ke ŋan ñani ba ŋanduna nni ka. Ama ke ŋan yaa kubi ba o *Biado n da paadi ba.

¹⁶ Nani min ki tie ŋanduna yua maama, bani moko ki tie ŋanduna yaaba yene.

¹⁷ Gagidi ki ŋanbi ba i moamoani nni. A maama tie i moamoani.

¹⁸ Nani ŋan den soani nni ŋanduna nni maama, n moko soani ba ŋanduna nni yene.

¹⁹ N gagidi ki ŋanbi n yuli apo ke bani moko n gagidi ki ŋanbi apo i moamoani nni.

²⁰ Mii mia ŋa bani bebe yaa po ka, n go mia ŋa yaaba n baa tuo ki daani nni kelima bi yaa maama po moko yaa po.

²¹ Min mia ŋa bipo yaala tie line, ke bikuli n yaa tie yendo nani fini Baa n ye n niinni ke n moko ye a niinni maama, ke bani mo n yaa ye ti niinni ke ŋanduna yaaba n daani ke fini n soani nni.

²² N puni ba ŋan puni nni yaa kpiagidi ke ban yaa tie yendo nani tinba n tie yendo maama.

²³ Mini n ye bi niinni, ke a mo ye n niinni, ke ban tua yendo cain ke ŋanduna yaaba n bandi ke fini n soani nni, ki bua ba nani ŋan bua mini maama.

²⁴ Baa, ŋan puni nni yaaba yeni, min baa ye naankani, n bua bani moko n yaa ye lankani, ke ban yaa nua n kpiagidi, ŋan puni nni yaadi kelima a den bua nni hali ke ŋanduna daa tagi.

²⁵ Baa yua n tiegi, ŋanduna yaaba naa bani a, ama mini n bani a. Bine mo bandi ke fini n soani nni.

²⁶ N den teni ke bi bandi a yeli n go baa teni ban bandi li, ke ŋan bua nni yaa buama buolu n yaa ye bi pala nni, ke mini mo n yaa ye bi niinni.»