Jan n diani U Tienu Laabaaliŋamo maama 16 - Gourmanchéma Bible

¹ N waani yi lani, ke lan da ti tua yipo tingbali bonla.

² Bi baa ñani yi li *bali maama bangima diena nni. U yogunu kpendi ke yua n baa kpa yi, baa nua ke o kpiagidi U Tienu.

³ Bi baa tiendi yi laa bonla kelima baa bani Baa, baa bani mini moko.

⁴ N waani yi lani, ke li yogunu yaa ti pundi, yin tiadi ke n den waani yi la. Mii den waani yi lani hali mi cilima, kelima n den ye leni yi.

U Tienu Fuoma Yua tuonli

⁵ Moala n caa yua n den soani nni kani. Yi siiga nni oba kuli naa buali nni: ‹A caa le?›

⁶ Li paboanli cuo yi boncianla kelima n waani yi lani.

⁷ Baa yeni, min wangi yi yaala na tie moamoani. Li ŋani yipo min gedi, kelima n yaa gedi, o *Todika kan cua yikani. Ama n yaa gedi, n baa soani o yikani.

⁸ Wani, o yaa cua, o baa bu ki cuo ŋanduna yaaba yaala n tie ti*tuonbiadi po leni mi *teginma po leni ti buudi po.

⁹ Yaala n tie ti tuonbiadi po kelima baa tuo ki daani nni.

¹⁰ Mi teginma po, kelima n caa Baa po ke yi kan go le nni.

¹¹ Ti buudi po mo, kelima U Tienu jia leni *ŋanduna bado ti buudi no yo.

¹² N go pia mi maama boncianla ki baa waani yi, ama yi kan fidi ki ga ma moala.

¹³ O yaa cua, wani i moamoani Fuoma yeni, o baa gobidi yi yin bandi i moamoani maama fuuli kuli. O kan maadi o yuceli po ka, ama o baa maadi wan gbadi yaama, ki wangi yi yaa bonla n baa ti cua.

¹⁴ O baa kpiagi nni, kelima o baa taani min pia yaala ki yaa wangi yi.

¹⁵ N Baa n pia yaala kuli tie n yaa yaala. Lani yaa po ke n yedi ke o Fuoma baa taani min pia yaala nni ki yaa wangi yi.

Li pabiidili baa lebidi ki tua pamanli

¹⁶ Li yaa yen waamu yi kan go le nni, ama li yaa pugini waamu yi go baa le nni [kelima n caa Baa po.]»

¹⁷ Lane o ŋoadikaaba siiga tianba den yedi biyaba: «Wan yedi ti yaala, ke li yaa yen waamu ti kan go le o, li yaa pugini waamu ti go baa le o yeni, li bua ki yedi be? O go yedi ke li tie kelima o caa Baa po, lani mo bua ki yedi be?»

¹⁸ Lani yaa po bi den tua: «Tii bani wan bua ki yedi yaala: ‹Li yaa yen waamu yeni...› »

¹⁹ Jesu den bandi ke bi bua ki buali o, ke o yedi ba: «Min yedi yi ke li yaa yen waamu yi kan go le nni, ama li yaa go pugini waamu yi go baa le nni yeni, yi buali yiyaba laa maama n bua ki yedi yaala.

²⁰ N waani yi i moamoani ke yi baa buudi ki go mua, ama ŋanduna yaaba baa mangi bi pala. Li pabiidili baa cuo yi, ama yi pabiidili baa lebidi ki tua pamanli.

²¹ Li tie nani u maditugukoanu n pia o pua yaa yogunu yeni. O yen le fala kelima o yogunu pundi. Ama o yaa mali o biga, waa go tiani wan bi laa yaa fala kelima o pali mangi ke o mali nisaalo ŋanduna nni.

²² Li baa tie yeni leni yinba moko. Moala li pabiidili cuo yi, ama n go baa le yi ke yi pala baa mangi. Oba kuli kan fie yikani laa pamanli.

²³ Laa daali yaa pundi yi kan go buali nni liba. N waani yi i moamoani, yin baa mia Baa yaala kuli n yeli nni, o baa pa yi la.

²⁴ Hali moala yi daa mia liba kuli n yeli nni. Mia mani, yi baa baa la, ke yi pamanli n pugini ki dagidi cain.

Jesu paadi ŋanduna

²⁵ N maadi yi lankuli leni mi kpanjama. Ama u yogunu kpendi ke n kan go pua kpanjama ka ki maadi leni yi. N baa maadi yi n Baa maama fuuli lan doagidi.

²⁶ Laa daali yaa pundi yi baa miadi o n yeli nni. Mii yedi ke n baa mia Baa yipo,

²⁷ kelima Baa wani oba bua yi kelima yi den bua nni, ki go daani ke n ñani wani U Tienu kani.

²⁸ N den ñani Baa kani ki cua ŋanduna nni. Moala n go baa ña ŋanduna nni ki guani Baa po.»

²⁹ O ŋoadikaaba den yedi o: «To, moala a maadi bonŋanla, ŋaa go pua ti kpanjama.

³⁰ Moala ti bandi ke a bani li bonla kuli, laa tie tiladi ŋan guudi ke o nilo n buali a bonlaba kuli. Lani yaa po ke ti daani ke a ñani U Tienu kani ki cua.»

³¹ Jesu den goa ki yedi ba: «Moala yi daani?

³² U yogunu kpendi, u pundi moko, ke yi baa yayadi ki gedi yua kuli o denpo ki ŋa nni nbebe. Ama mii ye nbebe, kelima Baa ye leni nni.

³³ N waani yi lani ke yin yaa pia mi yanduanma n niinni. Ŋanduna nni yi baa le o falabiado, ama yin paagi mani yi pala. Mini, n paadi ŋanduna.»