Jan n diani U Tienu Laabaaliŋamo maama 15 - Gourmanchéma Bible

¹ Mini n tie duven tibu ñiamoanli. N Baa tie bu kubido.

² Yaa benu n tuugi leni nni ki naa luoni kuli, o pedi u. Yaa benu n luoni mo kuli, o kpendi ki ŋanbidi u wun yaa luoni ki pugidi.

³ Moala yi tuodi ki ŋanbi, kelima min maadi yi yaa maama ŋanbi yi no.

⁴ Yin yaa ye n niinni, n mo baa ye yi niinni. Nani u benu n kan fidi ki luoni u yuceli po, kali wun yaa tuugi leni li ñiali yeni, li tie yene leni yi moko. Yi kan fidi ki luoni yi yaa tuugi leni mini yaaka.

⁵ Mini n tie bu duven tibu ñiali, yinba n tie bu beni. Yua n ye n niinni, ke n mo ye o niinni, o baa luoni li bonluonkaala boncianla. Kelima n yaa ye leni yi, yi kan fidi ki tieni pu.

⁶ Yua n kaa tuugi leni nni ki ye n niinni kuli, bi baa lu o niinpo nani ban luni u benu maama, ke u kuodi. Bi taagi yaa beni n kuodi ki lu mi fantama nni ke i buodi.

⁷ Yi yaa tuugi leni nni ki ye n niinni, ke n maama mo ye yi niinni, mia mani yin bua yaala kuli, yi baa baa la.

⁸ Yi yaa luoni li bonluonkaala boncianla, n Baa baa baadi ti kpiagidi lipo. Yeni, yi baa doagidi ke yi tie n ŋoadikaaba moko.

⁹ Nani Baa n bua nni maama, n mo bua yi yene. Yin yaa ye mani n buama nni.

¹⁰ Yi yaa kubi n *bali maama, yi baa ye n buama nni nani n mo n kubi n Baa yaa bali maama ki ye o buama nni maama.

¹¹ N maadi yi laa maama, ke yin yaa pia n yaa pamanli buolu, ke yi pamanli n pugini ki dagidi.

¹² N bali maama tie line: Yin yaa bua mani yiyaba nani mini n bua yi maama.

¹³ Oba kuli ki pia yaa buama n cie mine, o nilo n pa o miali o danlinba po.

¹⁴ Yi yaa tuo ki tiendi min bili yipo yaala, yi tie n danlinba.

¹⁵ Mii go yi yi bi naacenba ka, kelima o naacemo naa bani o canbaa n tiendi yaala. Ama n yi yi n danlinba kelima n waani yi min gbadi yaala n Baa kani kuli.

¹⁶ Laa tie ke yinba ka den gandi nni. Ama mini n den gandi yi ki go gagidi yi, ke yin gedi ki yaa luoni li bonluonkaala, ke yi bonluonkaala mo n yaa ye. Lanwani Baa baa pa yi yin mia o yaala kelima n yeli po kuli.

¹⁷ Min bili yaa balimaama tie line: Yin yaa bua mani yiyaba.

Ŋanduna yaaba baa nani Jesu leni o yaaba

¹⁸ Ŋanduna yaaba yaa nani yi, yin tiadi ke bi den kpa nani mini hali ke bi daa nani yinba.

¹⁹ Ŋanduna bi baa bua yi yi yaa bi tie o yaaba, ama kelima yii tie ŋanduna yaa yaaba, ke n go gandi yi ki paadi leni ŋanduna, lani yaa po ŋanduna yaaba nani yi.

²⁰ Yin tiadi mani min den maadi yi yaa maama, naacemoba kuli ki cie o canbaa. Bi yaa waani mini falaciamo, bi baa waani yinba moko falaciamo. Bi yaa kubi n maama, bi baa kubi yi moko yaa maama.

²¹ Bi baa tiendi yi lankuli kelima n yeli po, kelima baa bani yua n soani nni.

²² N yaa bi den cua ki maadi leni ba, bi kan bi yaa pia *tuonbiadi. Ama moala bi kan baa ki nia ke baa pia tuonbiadi.

²³ Yua n nani nni nani n Baa moko.

²⁴ N yaa den soani bi siiga nni nitoa kuli n daa soani yaa tuona, bi kan bi yaa pia tuonbiadi. Moala bi laa laa tuona ki nani mini leni n Baa kuli.

²⁵ Li tieni yeni ke yaa maama n diani bi bali maama nni na n tieni ki dudi: ‹Bi den nani nni fanma fanma.›

²⁶ O Todika yaa cua, min baa soani yipo yua, wani i moamoani Fuoma, yua n ñani Baa kani yeni, wani n baa tiendi npo siedi.

²⁷ Yinba moko baa tiendi npo siedi kelima yi den ye leni nni hali mi cilima.