Jan n diani U Tienu Laabaaliŋamo maama 14 - Gourmanchéma Bible

¹ Yin da yagi mani yi yama. Daani mani U Tienu, daani mani mini moko.

² N Baa diegu nni pia i yekaani boncianla. Li yaa bi tie yeni, n bi den baa waani yi. N caa ki baa n ŋanbi yipo u kaanu.

³ N yaa gedi ki ban ŋanbi yipo u kaanu yeni, n baa goa ki cua ki taa yi tin yegi, ke min ye naani, yi moko baa ye lankani.

⁴ Yi bani min caa naanpo ki go bani lipo sanu.»

⁵ Toma den yedi o: «N Daano, tii bani ŋan caa naanpo, ti baa ga lede ki bandi lipo sanu?»

⁶ Jesu den yedi o: «Mini n tie u sanu, leni i moamoani, leni li miali. Oba kuli kan pundi Baa kani, li yaa tie mini yaa po.

⁷ Yi yaa bi bani nni, yi bi baa bani n Baa. Moala liiga yi bani o, yi laa o.»

⁸ Filipi den yedi o: «N Daano, waani ti Baa, lani bebe baa dagidi tipo.»

⁹ Jesu den yedi o: «Filipi, baa ke n waagi ki ye leni yi, a daa bani nni? Yua n laa nni kuli laa Baa. Be yaa po ke a yedi min waani yi Baa?

¹⁰ Ŋaa daani ke n ye Baa niinni, ke Baa moko ye n niinni yoo? Min maadi yi yaa maama yeni, maa ñani n yaa kani ka. Li tie Baa yua n ye n niinni n tuuni o tuona yeni.

¹¹ Daani mani nni ke n ye Baa niinni, ke Baa moko ye n niinni. Lani yaaka daani mani kelima a naa tuona wani yaa po.

¹² N yedi yi i moamoani ke yua n daani nni kuli, o moko baa tuuni min tuuni yaa tuona, ki go baa tuuni ya n cie ŋa, kelima n caa Baa po.

¹³ Yin baa mia yaala kuli n yeli nni, n baa tieni la ke Baa n baa ti kpiagidi kelima Bijua po.

¹⁴ Yi yaa mia bonlaba kelima n yeli nni kuli, n baa tieni la.

Jesu niani ke o baa soani U Tienu Fuoma Yua

¹⁵ Yi yaa bua nni moamoani, yi baa kubi n *bali maama.

¹⁶ N baa mia Baa, o baa pa yi toa wan yaa tie yi Todika yua n baa ye leni yi hali yaa yogunu kuli,

¹⁷ wani i moamoani Fuoma yeni. Ŋanduna yaaba kan fidi ki ga o cangu kelima baa nua o, baa bani o mo. Ama yinba wani, yi bani o kelima o ye leni yi, ki baa ye yi niinni.

¹⁸ N kan ŋa yi yibebe nani a kpienbila yeni, n go baa cua yikani.

¹⁹ Li yaa go pugini waamu, ŋanduna kan go le nni. Ama yinba wani, yi baa le nni kelima n fo ki ye, yi mo baa fo ki ye.

²⁰ Laa daali yi baa bandi cain ke n ye n Baa niinni, ke yi ye n niinni, ke n mo ye yi niinni.

²¹ Yua n tuo ki ga n bali maama ki go kubi ma, wani n tie yua n bua nni moamoani. Yua n bua nni yeni, n Baa baa bua o, n moko baa bua o, ki doagidi opo min tie yua.»

²² Jude, laa tie Judasa Isikalioto ka, den buali o: «N Daano, be teni ke a baa doagidi a yuli tipo, ki nan kan doagidi li ŋanduna po wani?»

²³ Jesu den goa ki yedi o: «O nilo yaa bua nni moamoani, o baa kubi n maama, lane n Baa baa bua o. Ti baa cua o kani ki yaa ye o deni.

²⁴ Yua n kaa bua nni kan tuo ki yaa kubi n maama. Yin gbadi yaa maama yeni, maa ñani mini yaa kani ka, mi ñani Baa yua n soani nni yaa kane.

²⁵ N maadi yi lankuli hali ke n da ye leni yi.

²⁶ O Todika, U Tienu Fuoma Yua, Baa n baa soani yua n yeli nni yeni, wani n baa bangi yi li bonla kuli, ki tiadi yi min waani yi yaala kuli.

²⁷ N ŋa yipo mi yanduanma. N puni yi n yaa yanduanme. Mii puuni yi ma nani ŋanduna n puuni maama ka. Yin da yagi mani yi yama, yin da jie mani.

²⁸ Yi den gbadi ke n yedi yi ke n baa gedi ki ŋa yi ki go baa goa yikani. Yi yaa bi bua nni moamoani, yi bi baa mangidi yi pala ke n caa Baa po, kelima wani cie nni.

²⁹ N tuodi ki waani yi lankuli moala hali ke li daa pundi, ke yaa daali ke laa bonla kuli baa tieni, yin daani nni.

³⁰ N kan go maadi leni yi boncianla, kelima *ŋanduna bado kpendi. Waa pia npo baliba kuli.

³¹ Ama li tie tiladi ke ŋanduna kuli n bandi ke n bua Baa ki tiendi wan puogi nni yaala. Fii mani tin fuadi nekanba.