Jan n diani U Tienu Laabaaliŋamo maama 13 - Gourmanchéma Bible

¹ Hali ke mi *Pendima jaanma daa pundi, Jesu den bani ke wan baa ña ŋanduna nni ki gedi Baa po yaa yogunu pundi. O den bua o yaaba, yaaba n ye ŋanduna nni, o den bua ba hali mi juodima.

² Jesu leni o ŋoadikaaba den dini mi yenjojiema. Li sua ke Sutaani den kuani Simono Isikalioto bijua Judasa pali nni no, ke wan janbi Jesu.

³ Jesu wani oba den bani ke Baa dini o li bali ke o die li bonla kuli, ki go bani ke o den ñani U Tienu kani ki baa goa ki gedi U Tienu kani.

⁴ O den fii u saajekaanu kani, ki landi o tiadi, ki taa li cabili ki ñagini o ciaga.

⁵ Lani o den kuodi mi ñima ku tadigu nni, ki cili ki nigidi o ŋoadikaaba taana, ki duuni a leni o cabiñaginkaali.

⁶ O den pundi Simono Pieli kani ke o buali o: «N Daano, fine n nigidi n taana?»

⁷ Jesu den goa ki yedi o: «A daa bani min tiendi yaala moala, ama li yaa yen waamu a baa bandi.»

⁸ Pieli den yedi o: «N kan tuo ŋan nigidi n taana hali abada.» Jesu den goa ki yedi o: «N yaa nigidi apo a taana, ŋaa taa leni nni.»

⁹ Simono Pieli den yedi o: «N Daano, da nigidi n taana bebe ka, n nii leni n yuli kuli.»

¹⁰ Jesu den yedi o: «Yua n wali, waa go bua ki wali, kali wan nigidi o taana ki yaa ŋani cain. Yi ŋani, ama yikuli ka.»

¹¹ Jesu den bani yua n baa janbi o, lani yaa po ke o yedi: «Yikuli ka ŋani.»

¹² Wan den nigidi bi taana ki gbeni, ki go lani o tiadi ki goa ki kali u saajekaanu kani, o den yedi ba: «Naani yi faami min tieni yipo yaala na bi?

¹³ Yi yini nni yi Canbaa leni yi Daano. Yi maadi moamoani kelima n tie yeni lige.

¹⁴ To, mini yua n tie yi Daano leni yi Canbaa n nigidi yi taana yeni, li pundi ke yi mo n yaa nigidi yiyaba taana.

¹⁵ Kelima n ŋa yipo bontogidikaale, ke yi mo n yaa tiendi nani min tieni yipo maama yeni.

¹⁶ N yedi yi i moamoani, o naacemo kan cie o canbaa, o tondo mo kan cie yua n soani o.

¹⁷ Yi yaa bani lani ki tiendi la, yi pia li pamanli.

¹⁸ Mii maadi yeni ki baa yikuli ka. N bani min gandi yaaba. Ama tiladi li baa tieni nani lan diani i Diani nni maama na: ‹Yua n taa ki di leni nni lugidi nni u danbu.›

¹⁹ N tuodi ki wangi yi yaala n baa tieni hali ke li daa tieni, ke li yaa ti tieni yaa yogunu, yin daani ke n tie ‹N Ye›.

²⁰ N yedi yi moamoani, yua n ga n tondo cangu kuli, o ga mini nba yaa cangoe. Yua n ga n cangu mo ga yua n soani nni yaagu.»

Jesu waani ba ke Judasa baa janbi o

²¹ Jesu n den maadi yeni o yama den yagi. O den kadi ki yedi: «N yedi yi i moamoani ke yi siiga yendo baa janbi nni.»

²² O ŋoadikaaba den diidi biyaba kaa bandi wan baa yua.

²³ O ŋoadikaaba siiga, Jesu n den bua yua den kpaagi ki kuu leni o.

²⁴ Lane Simono Pieli den waani o o nuu ke wan buali Jesu wan maadi yua yaa maama.

²⁵ O den tabini Jesu ki buali o: «N Daano, ŋme yo?»

²⁶ Jesu den goa ki yedi o: «Min baa ŋu li saaboali ki teni yua, li tie wani.» O den ŋu li saaboali ki teni Simono Isikalioto bijua Judasa.

²⁷ Jesu n den teni o li yaa yogunu liga, Sutaani den kua o pali nni. Jesu den yedi o: «Ŋan baa tieni yaala, tieni li tontoni.»

²⁸ Yaaba n den taani ki ye u saajekaanu kani siiga, oba kuli ki den faami yaala yaa po ke Jesu yedi o yeni.

²⁹ Nani Judasa n den kubi bi ligiboagili yeni, bi tianba den tama ke Jesu yedi o: «Ŋan da tin baa bua yaala kuli mi jaanma po,» yaaka: «Ŋan ñani i ligi ki pa a luoda.»

³⁰ Judasa n den ga li saaboali, lanyogunu liga o den ñani. Ku ñiagu den bii.

Mi mabilikapanma

³¹ Judasa n den ñani, Jesu den yedi: «Moala o *Ja Bijua baa ti kpiagidi. U Tienu mo baa ti kpiagidi kelima opo.

³² U Tienu yaa baa ti kpiagidi kelima o Bijua yaa po, o mo baa teni wan baa ti kpiagidi o yaa kani. O baa kpiagi o ke li kan waagi.

³³ N bibuadimu, n go baa ye leni yi yogunu waamu bebe po. Yi baa lingi nni, ama n wangi yinba moko moala nani min den waani Jufinba maama, ke yi kan fidi ki gedi min caa naankani.

³⁴ N bili yipo yaa mabilikapanma n tie na: Yin yaa bua mani yiyaba. Nani min bua yi maama, Yi moko n bua yiyaba yeni.

³⁵ Yi yaa bua yiyaba, lani n baa teni bi niba kuli n bandi ke yi tie n ŋoadikaaba.»

Pieli baa ti nia Jesu

³⁶ Simono Pieli den buali o: «N Daano, a caa le?» Jesu den goa ki yedi o: «A kan fidi ki ŋoadi nni min caa naani moala, ama a baa ti yuandi ki ŋoadi nni.»

³⁷ Pieli den buali o: «N Daano, be yaa po ke n kan fidi ki ŋoadi a moala? Baa li yaa tie n miali ñama, n ye.»

³⁸ Jesu den goa ki yedi o: «Baa li yaa tie a miali ñama, a ye moamoani? N yedi a i moamoani, hali ke ku kootongu daa mua, a baa nia taalima taa ke ŋaa bani nni.