Jan n diani U Tienu Laabaaliŋamo maama 12 - Gourmanchéma Bible

¹ Dana luoba n den sieni mi *Pendima jaanma n pundi, Jesu den gedi Betani, Lasala, wan den fiini yua bi tinkpiba siiga, n ye yaa dogu nni.

² Bi den ŋanbi opo mi jiema likani. Malata den tendi ba mi jiema. Lasala den tie yaaba n ka ki di leni Jesu siiga yendo.

³ Maliyama den taa yaa tulale n yi *naadi kilo boagidima, ke li dunga yaba boncianla, ki wuli Jesu taana po ki duuni a leni o yudi. Tulale yeni nuulu den yadi ki gbieni li dieli kuli.

⁴ Judasa Isikalioto, Jesu ŋoadikaaba siiga yendo, yua n baa ti janbi o, den yedi:

⁵ «Be yaa po ke baa kuadi tulale yeni ki ga kujapiena kobitaa ki puni a luoda?»

⁶ Wan den maadi yeni, laa tie ke o bua a luoda ka, li tie ke o den tie conconli. O den kubi bi ligiboagili ki yen ñandi o yuli po ban ŋu yaala lienni.

⁷ Jesu den yedi: «Ŋan cedi o. O kubi laa tulale n piinma daali po.

⁸ Yi baa pia a luoda yi siiga yogunu kuli, ama yi kaa pia mini yaa yogunu kuli.»

Jufinba juogi ke bi baa teni ban kpa Lasala

⁹ Jufinba siiga yaa niligu n yaba den gbadi ke Jesu ye Betani yeni, ke bi cua likani. Baa den cua Jesu wani oba bebe po ka, ama bi go den bua ki le Lasala, wan den fiini yua bi tinkpiba siiga.

¹⁰ Lanwani bi kopadicianba yudanba den jagi ki bili ke bi baa kpa Lasala moko,

¹¹ kelima Jufinba boncianla den ŋa ba, ki tuo ki daani Jesu kelima wani Lasala po.

Jesu kua Jelusalema

¹² Lan den fii ki fa yaa niligu n den cua ki baa jaani mi jaanma den bandi ke Jesu kpendi Jelusalema.

¹³ Bi den pedi i kpakpa-bensoangi ki ñani ki tuogi o ki kpaani ki tua: «Ti pagi U Tienu. U Tienu n seligi yua n kpendi wani o Diedo yeli nni, Isalele yaaba bado.»

¹⁴ Jesu den laa li ŋunbisaagili, ki jagini li nani i Diani n yedi maama:

¹⁵ «Yinba Siyono dogu yaaba, da jie mani, Diidi ki le, yi bado kpendi na Ki jagi li ŋunbisaagili.»

¹⁶ Jesu ŋoadikaaba naa den kpa faami yaala n tieni yeni. Ama Jesu n den baa ti kpiagidi yaa yogunu, bi den tiadi ke laa bonla kuli den diani ki maadi o yaa po. Lanwani bi den sua ke man den yedi opo yaala den kua.

¹⁷ Li den sua ke yaa niligu n den ye Jesu kani wan den yini Lasala ke o ñani li kuli nni ki fiini o bi tinkpiba siiga yaa yogunu, den tiendi lipo siedi ki yayadi li laabaalo.

¹⁸ Li tie lani yaa po ke ku niligu den ñani ki tuogi o yeni, kelima bi den gbadi ke o tieni laa bancianma.

¹⁹ Lani yaa po *Falisieninba den yedi biyaba: «Diidi ki le, yin tiendi yaala kuli, yi baa gbali, kelima ŋanduna kuli ŋoadi o.»

Gilekinba tianba lingi Jesu

²⁰ Yaaba n den cua ki baa kpiagidi U Tienu mi jaanma yeni yogunu siiga, bi tianba den tie Gilekinba.

²¹ Bi den cua Filipi kani, yua n tie *Galile diema yaa Betisayida dogu yua, ki yedi o: «Canbaa, ti bua ki le Jesu.»

²² Filipi den gedi ki waani Andile, ke Andile leni Filipi kuli den yegi ki gedi ki waani Jesu.

²³ Jesu den goa ki yedi ba: «O *Ja Bijua n baa baa ti kpiagidi yaa yogunu pundi.

²⁴ N yedi yi i moamoani, mi dibima yaa kua ki tinga nni ki kpe, mi baa ye mi bebe lige. Ama mi yaa kpe, mi baa luoni yaa bonbi n yaba.

²⁵ Yua n bua o miali baa bolini li. Ama yua n nani o miali ŋanduna nni na baa pia li, yaa miali n kan gbeni po.

²⁶ O nilo yaa tuuni npo, wan yaa ŋua nni. Min baa ye naani, wani n naacemo mo baa ye lankani. Yua n tuuni npo kuli, n Baa baa jigini o.

Jesu maadi o kuuma maama

²⁷ Moala n yama yagi. Naani n baa yedi: ‹N Baa, faabi nni leni u naa yogunu fala? Ama li nan tie laa fala po ke n cua ki ye hali moala.

²⁸ N Baa, teni a yeli n baa ti kpiagidi.› » Lane u nialu den maadi hali tanpoli po ki yedi: «N teni ke li baa ti kpiagidi no, n go baa teni lin baa ti kpiagidi ki pugini.»

²⁹ Yaa niligu n den se likani ki gbadi u nialu yeni, bine den yedi ke ki taaga duni, bine mo ke maleki n maadi leni o.

³⁰ Jesu den yedi ba: «Laa tie mini yaa po ka ke u naa nialu maadi, ama li tie yi yaa po yo.

³¹ Moala ŋanduna buudi baa jia ki kadi. Moala bi baa deli ki ñani *ŋanduna bado.

³² Bi yaa fiini nni ki tinga po, n baa dadi bi niba kuli yama ban cua n kani.»

³³ Jesu den maadi yeni ki doagidi wan baa kpe yaa kuume.

³⁴ Ku niligu den goa ki yedi o: «Ti gbadi U Tienu *balimaama nni ke *U Tienu n Gandi Yua baa ye hali yaa yogunu kuli. Be yaa po ke fini yedi ke li tie tiladi ban fiini o Ja Bijua. O Ja Bijua yeni, tie ŋme yo?»

³⁵ Jesu den goa ki yedi ba: «Mi yenma da baa ye yi siiga u yogunu waamu po. Yin yaa cuoni mani hali yin pia mi yenma yaa yogunu kuli, ke li *biigili n da ludi yi. Yua n cuoni li biigili nni naa bani wan caa naani.

³⁶ Hali ke yi da pia mi yenma, yin dugi mani laa yenma po, ke yin tua mi yenma yaaba.» Jesu n den maadi lani, o den ñani bikani ki ban wuoni.

Jufinba naa daani Jesu

³⁷ Baa ke o den tieni yaa bancianma n yaba bikani, baa den tuo ki daani o.

³⁸ Li den tua yeni ke o sawalipualo Esayi n maadi yaa maama na n tieni: «O Diedo, ŋme daani ti maama? Fini o Diedo nuu paalu doagidi ŋme po?»

³⁹ Baa den fidi ki daani Jesu nani *Esayi n go maadi maama:

⁴⁰ «U Tienu juani bi nuni, Ki juagi bi pala, Ke ban da le leni bi nuni, Ki da ga leni bi pala, Ke ban da ti lebidi ki ŋa bi *tuonbiadi, Min paagi ba.»

⁴¹ Esayi den maadi lani kelima o den laa Jesu kpiagidi ki maadi o maama.

⁴² Baa leni lankuli, Jufinba yudanba siiga boncianla den tuo ki daani Jesu, ama baa den tuo ki doagidi ke bi ŋoadi o kelima Falisieninba po, ke ban da deli ki ñani ba li *balimaama bangima diena nni.

⁴³ Bi den tieni yeni kelima bi den bua bi niba pagidi ki cie U Tienu yaadi.

Jesu maama baa jia leni bi niba ti buudi

⁴⁴ Jesu den kpaani: «Yua n daani nni, waa daani mini bebe ka, o daani yua n soani nni mo.

⁴⁵ Yua n nua nni laa yua n soani nni.

⁴⁶ Mini n tie mi yenma, ki cua ŋanduna nni ke yua n daani nni kuli n da go ye li biigili nni.

⁴⁷ Yua n gbadi n maama, ki naa kubi ma kuli, mini ka bu leni o. Kelima mii cua ki baa bu leni ŋanduna yaaba ka. Ama n cua ki baa faabi ba.

⁴⁸ Yua n yie nni kaa ga n maama kuli, pia o bujialo. Min den maadi yaa maama yeni, mani n baa bu leni o li juodidaali.

⁴⁹ Mii maadi n yuli bali po ka, Baa yua n soani nni, wani n bili npo min baa yedi yaa maama leni min baa maadi ma maama.

⁵⁰ N bani ke o mabilikaama yeni tie yaa miali n kan gbeni. Lani yaa po min maadi yaa maama kuli tie Baa n waani nni min maadi yaama.»