Jan n diani U Tienu Laabaaliŋamo maama 11 - Gourmanchéma Bible

¹ Niyendo den ye ki yia ke bi yi o Lasala. O den tie Betani yua. Betani yeni den tie Maliyama leni o naataanpuoga Malata dogu.

² (Laa Maliyama tie yua n den wuli Jesu taana po tulale ki duuni a leni o yudi.) Lasala yua n den yia den tie o naataanja.

³ A naataanpola yeni den soani u tondu Jesu kani ki yedi o: «Ti Daano, a buado yia.»

⁴ Jesu n den gbadi lani, o den yedi: «Laa yianu kan tua kuuma, u cuo o ke U Tienu n baa ti kpiagidi, ke U Tienu Bijua mo n baa ti kpiagidi kelima u yaa po.»

⁵ Jesu den bua Malata leni o waalo leni Lasala.

⁶ Wan den gbadi ke Lasala yia, o go den tieni dana lie wan ye naani.

⁷ Lani n pendi, o den yedi o ŋoadikaaba: «Tin goa ki gedi Jude.»

⁸ O ŋoadikaaba den yedi o: «Canbaa, laa waagi ke Jufinba den bua ki lugidi a a tana likani, ke a baa goa ki gedi lipo?»

⁹ Jesu den goa ki yedi ba: «Yentunmunli kuli pia piiga n leedo lie kaa? Yua n cuoni li yentunli nni kuli kan yaa tuudi, kelima o nua ŋanduna yaa yenma.

¹⁰ Ama yua n cuoni ku ñiagu kuli baa tuudi, kelima mi yenma ki ye o niinni.»

¹¹ Jesu n den maadi lani, o go den yedi ba: «Ti danli Lasala goa, n baa gedi ki ban fundi o.»

¹² O ŋoadikaaba den yedi o: «Ti Daano, o yaa goa yo wani, laafia baa tieni.»

¹³ Jesu den maadi o kuuma maama, ama o ŋoadikaaba den tama ke o maadi mi fuodima guama.

¹⁴ Lane Jesu den kadi ki waani ba: «Lasala kpe.

¹⁵ N pali mani ke mii den ye lipo kelima yi yaa po, ke yin daani nni. Tin fii mani ki gedi opo.»

¹⁶ Lanwani Toma, ban go yi yua ku poligu, den yedi o ŋoadikalieba: «Ti mo n gedi mani ki ban taani ki kpe leni o.»

Jesu tie bi tinkpiba fiima leni li miali

¹⁷ Jesu den pundi likani ki sua ke Lasala ye li kuli nni ke li pundi dana naa.

¹⁸ Li sua ke Betani kuu leni Jelusalema dajenbila taa,

¹⁹ ke Jufinba boncianla den cua Malata leni Maliyama kani ki baa baagi ba kelima bi naataanja kuuma po.

²⁰ Malata n den gbadi ke Jesu kpendi, o den ñani ki tuogi o, ama Maliyama den ka li dieli nni.

²¹ Malata den yedi Jesu: «N Daano, a yaa den ye ne, n kpelo kan den kpe.

²² Ama n bani ke baa moala ŋan baa mia U Tienu yaala kuli, o baa pa ŋa la.»

²³ Jesu den yedi o: «A kpelo baa fii bi tinkpiba siiga.»

²⁴ Malata den goa ki yedi o: «N bani ke o baa fii bi tinkpiba kuli n baa fii ŋanduna juodima daali yaa fiima.»

²⁵ Jesu den yedi o: «Mini n tie bi tinkpiba fiima, leni li miali. Yua n daani nni, baa o yaa kpe, o baa fo.

²⁶ Yua n fo ki daani nni kan kpe hali abada. Naani a dugi mi naa maama po bi?»

²⁷ Malata den yedi o: «Mm, n Daano, n daani ke a tie *U Tienu n Gandi Yua, U Tienu Bijua, yua n den baa cua ŋanduna nni.»

Jesu buudi

²⁸ Wan den yedi yeni, o den gedi ki ban yini o waalo Maliyama ŋasiili nni ki yedi o: «Canbaa cua. O yi ŋa.»

²⁹ Maliyama n den gbadi, o den fii tontoni ki gedi Jesu po.

³⁰ Li sua ke Jesu daa kua u dogu tugu nni, o da den ye Malata n den tuogi o naankani.

³¹ Yaa Jufinba n den ye leni Maliyama li dieli nni ki baagi o n den laa ke o fii tontoni ki ñani yeni, bi moko den fii ki ŋoadi o kelima bi den tama ke o caa li kuli po ki baa n buudi.

³² Maliyama n den pundi Jesu n ye naani ki laa o, o den gbaani o taana kani ki yedi o: «N Daano, a yaa den ye ne, n kpelo kan den kpe.»

³³ Jesu n den laa o ke o buudi, ke yaa Jufinba n yegi leni o moko buudi, li paboanli den cuo o hali o pali tugu nni ke o fuo ki jiini.

³⁴ O den buali ba: «Yi piini o le?» Bi den yedi o: «Canbaa, cua ki ban le.»

³⁵ Jesu den buudi.

³⁶ Lani yaa po Jufinba den yedi: «Diidi ki le mani wan den bua o maama.»

³⁷ Bi siiga nni bi tianba den yedi: «Wani yua n den puni o juamo ke o nua, naani o kan den fidi ki teni ke one n da kpe?»

Jesu fiini Lasala bi tinkpiba siiga

³⁸ Li paboanli go den cuo Jesu ke o fuo ki jiini. O den pundi li kuli kani. Li kuli yeni den tie tanlongu ke ku tanpabigu bii bu ñoabu.

³⁹ Jesu den yedi: «Biidi mani ku tanpabigu.» Malata, yua n kpe naataanpuoga den yedi o: «N Daano, moala o baa nuugi, kelima hali ban piini o dinla n tie dana naa.»

⁴⁰ Jesu den yedi o: «Mii yedi a ke a yaa daani ke a baa le U Tienu kpiagidi?»

⁴¹ Lane bi den biidi ku tanpabigu. Jesu den yaadi ki nuali tanpoli ki yedi: «N Baa, n tuondi a ke a cengi n maama.

⁴² N bani ke a cengi n maama yogunu kuli, ama n yedi yeni yaa niligu n se ki lindi na yaa todima po, ban daani ke fini n soani nni.»

⁴³ Wan den jaandi yeni, o den kpedi o nialu ki kpaani: «Lasala, ña na.»

⁴⁴ Yua n den kpe yeni den ñani, ke o nii leni o taana kuli finfini a caba, ke li cabili pini o nunga mo. Jesu den yedi: «Findifindi o mani ki cedi wan gedi.»

Bi cancannikpeliba juogi ke bi baa kpa Jesu

⁴⁵ Yaa Jufinba n den cua Maliyama kani ki laa Jesu n tieni yaala yeni siiga boncianla den tuo ki daani Jesu.

⁴⁶ Ama bi siiga bi tianba mo den gedi *Falisieninba kani ki waani ba wan tieni yaala.

⁴⁷ Lanwani bi kopadicianba yudanba leni Falisieninba den taani bi *cancannikpeliba ki yedi: «Ti baa tieni be? Laa nilo tiendi mi bancianma boncianla.

⁴⁸ Ti yaa cedi o ke o tiendi yeni ki pugidi, bi niba kuli baa tuo ki daani o, ke Loma yaaba baa ti cua ki bolini ti*kaangagidiŋamu, leni ti buolu.»

⁴⁹ Bi siiga nni yendo, yua n yi Kayifa ki tie bi kopadicianba bado laa binli, den yedi ba: «Yii bani liba.

⁵⁰ Yii kpaagi ki sua ke li baa ŋani yipo ke niyendo n kpe ti nibuolu kuli po yoo? Lani n baa cie ti buolu kuli n bodi.»

⁵¹ Waa den maadi laa maama o yama po ka, ama wan tie bi kopadicianba bado laa binli yeni n teni ke o den pua sawali ke Jesu baa kpe bani Jufinba buolu kuli po.

⁵² Laa tie Jufinba buolu po bebe ka, ama o kuuma baa taani U Tienu bila yaaba n yayadi i kaani kuli, ban taani ki tua yenma.

⁵³ Ki cili laa daali, bi den jagi ki bili ki baa teni ban kpa o.

⁵⁴ Lani yaa po Jesu den cedi kaa go goadi Jufinba siiga. O den ñani likani ki gedi yaa kaanu n kuu leni mi fanpienma, ban yi yaa dogu Efilayima. O den kali lipo, wani leni o ŋoadikaaba.

⁵⁵ Jufinba *Pendima jaanma go den nagidi ke bi niba boncianla den ñani i dogi nni ki gedi Jelusalema, ki baa ŋanbi biba hali ke mi Pendima jaanma daa pundi.

⁵⁶ Bi den lingi Jesu. Ban den ye U Tienu diegu nni bi den tua biyaba: «Yi tama be? O nan ko baa tuo ki cua mi jaanma na bi?»

⁵⁷ Li sua ke bi kopadicianba yudanba leni Falisieninba den ñani li ñoabonli, ke yua n bani Jesu n ye naani, wan teni ban bandi ke bi baa cuo o.