Jan n diani U Tienu Laabaaliŋamo maama 10 - Gourmanchéma Bible

¹ N yedi yi i moamoani, yua n ki tagini bu buliñoabu kani ki kua li yanloli nni, ama ki doni kaanto yo ki kua, tie conconli leni sanjialo.

² Ama yua n tagini bu buliñoabu ki kua li yanloli nni tie i pe yankpaalo.

³ O jiidika luodi opo, i pe mo cengi o nialu. O yini wan die yaa pe, yua kuli leni o yeli, ki ñani ba.

⁴ O yaa ñani wan die yaa pe kuli, o baa kua bi liiga ban yaa ŋua o kelima bi bani o nialu.

⁵ Bi kan ŋoadi caano, bi baa sani ki ŋa o, kelima baa bani bi canba niali.»

⁶ Jesu den pua ba laa kpanjama, ama baa den bandi wan maadi ba yaala.

Jesu tie o yankpaaŋamo

⁷ Jesu go den yedi ba: «N yedi yi i moamoani, mini n tie bu buliñoabu i pe po.

⁸ Yaaba n den cua ke n daa cua kuli tie concona leni sanjiaba, ama i pe ki den cengi ba.

⁹ Mini n tie bu buliñoabu. Yua n tagini n yaa kani ki kua kuli baa faabi. O baa kua ki go ña ki baadi mi jiema.

¹⁰ Li conconli kpendi ki baa su, ki kpa, ki go bolini i pe. Mini n cua ke ban baa li miali, ki yaa pia li ke li dua bipo.

¹¹ Mini n tie o yankpaaŋamo. O yankpaaŋamo puuni o miali o pe po.

¹² Ama yua n tie naacemo ki naa tie i pe kpaalo, ki naa die ba mo yaa laa ke o fuasangbanlo kpendi, o baa sani ki ŋa i pe. O fuasangbanlo baa cuo bi tianba ki yadi yaaba n sieni.

¹³ O naacemo baa sani kelima o tie naacemo waa yagini o yama i pe po.

¹⁴ Mini n tie o yankpaaŋamo. N bani n pe, n pe mo bani nni,

¹⁵ nani n Baa n bani nni ke n mo bani o maama yeni. N puni n miali n pe po.

¹⁶ N go pia yaa pe n kaa ye li naa yanloli nni. Li tie tiladi min cuani bani moko. Bi moko baa cengi n nialu. Lani n pe kuli baa taani ki tua yangoyenli ki yaa pia yankpaayendo.

¹⁷ N Baa bua nni kelima n puni n miali ki go baa ti ga li.

¹⁸ Oba kuli kan fie nni li, n puni li n yama po. N pia li bali ki pa li, ki go pia li bali ki ga li. Lani n tie n Baa n den teni nni yaa ñoabonli.»

¹⁹ Mi paadima go den tieni Jufinba siiga kelima laa maama po.

²⁰ Bi siiga nni boncianla den tua: «O pia ki cicibiadiga. O gaadi. Be yaa po ke yi cengi o?»

²¹ Nitoaba mo den tua: «Yua n pia ki cicibiadiga kan yaa maadi mi naa maama. Naani ki cicibiadiga baa fidi ki teni a juama n noadi bi?»

Jufinba yie Jesu

²² Li den tie ku fawaagu yogunu, ke bi jaani yaa *jaanma n yi U Tienu diegu Goagagidima jaanma Jelusalema po.

²³ Jesu den cuoni U Tienu diegu nni Salomono janli kani.

²⁴ Jufinba den taani ki lindi o ki yedi o: «Hali u laa yogunu ke a baa waani ti, ti yama n duani? A yaa tie *U Tienu n Gandi Yua, ŋan kadi ki waani ti.»

²⁵ Jesu den goa ki yedi ba: «N den waani yi, ama yii daani n maama. Min tuuni yaa tuona n Baa yeli nni tiendi npo siedi.

²⁶ Ama yii daani kelima yii tie min die yaa pe siiga nni yaaba.

²⁷ N yaa pe cengi n nialu. N bani ba, bi mo ŋua nni.

²⁸ N puuni ba yaa miali n kan gbeni. Bi kan bodi hali abada, oba kuli kan fie baa n nuu nni mo.

²⁹ N Baa yua n den puni nni ba, cie yua kuli. Oba kuli kan fidi ki fie ba Baa nuu nni mo.

³⁰ Mini leni Baa tie yendo.»

³¹ Jufinba go den taa a tana ki baa lugidi o.

³² Jesu den yedi ba: «N den teni ke yi laa a tuonŋama boncianla, ya n ñani Baa kani. Li laa tuonli yaa po yo ke yi baa lugidi nni a tana?»

³³ Jufinba den goa ki yedi o: «Ti kan lugidi a a tana kelima tuonŋanliba po ka. Li tie ke a sugidi U Tienu, kelima fini yua n tie nisaalo tua ke a tie U Tienu.»

³⁴ Jesu den goa ki yedi ba: «Laa diani yi *bali maama nni ki yedi: ‹N yedi yi tie nani U Tienu?›

³⁵ Leni U Tienu n yedi i Diani nni ke o maama n den soagini yaaba po naani leni wani U Tienu yeni, ti bani ke i Diani mo kan lebidi.

³⁶ Li ga lede ke yi yedi ke n sugi U Tienu kelima n yedi ke n tie U Tienu Bijua yeni, mini U Tienu yua n tie ti Baa n gandi ki gagidi yua, ki soani nni ŋanduna nni?

³⁷ N yaa tuuni n Baa tuona, yin da daani n maama.

³⁸ Ama n yaa tuuni o tuona, baa ke yii daani n maama, daani mani kelima min tuuni yaa tuona po, ke yin bandi bonŋanla ke Baa ye n niinni, ke n mo ye Baa niinni.»

³⁹ Bi go den lingi ki baa cuo o, ama o den cia.

⁴⁰ Lane Jesu go den gedi Judana kpenu kandima, Jan n den kpa *batisi bi niba naankani, ki kali likani.

⁴¹ Bi niba boncianla den cua o kani. Bi den tua: «Jan ki den tieni bancianmaba. Ama wan den maadi yaa maama o naa ja po kuli tie moamoani.»

⁴² Bi niba boncianla den daani o likani.