Jeremi Bubula 5 - Gourmanchéma Bible

¹ Li Miali Diedo, tiadi yaala n tieni ti! Diidi ki le ti fe!

² Bi canba ga ti faali. Bi fie baa leni ti diedi mo.

³ Ti kpandi ki tua kpienbila, Ti naanba mo tie nani a kpepuona yeni.

⁴ Ti ñima, ti baa da ma yo ki ño. Ti daadi moko, ti baa daa de ki kuuni.

⁵ Ti yibalinba fii ki sedi tipo. Ti coagi hali boncianla, Baa puni ti fuodima baa waamu.

⁶ Li den tie tiladi yo tin gedi, Ejipiti leni Asili po ki ban mia mi jiema.

⁷ Ti baanba tudi, ama bi naa go ye. Tinba n di tugi bi tagili.

⁸ I yonbi n die ti. Oba kuli mo ki faabi ti bi nuu nni.

⁹ Ti jiema baama ki tie faala bonla, Li tie yaala n baa fidi ki ñani ti miali, Ki koani leni ki jugisiega mi fanpienma po.

¹⁰ Ti gbanandi siage nani ki buaga yeni Kelima mi koma n bia maama po.

¹¹ Bi ñii bi puoba leni u paalu Siyono juali po, Ki ñiigi a *powandiana mo Juda dogu nni.

¹² Li pia ban den soadi yaa koanbala. Baa jigindi a nikpela.

¹³ Bi nipanba tugi li naali, Bi jawaaba tugi a dababikpiaga ki tuudi ki baali.

¹⁴ A nikpela ŋa bu buliñoabu, Bi jawaaba mo cedi bi yani.

¹⁵ Li pamanli ñani ti pala nni, Ti ciamu kpandi ki tua pabiidili bonla.

¹⁶ Ki badifogiliga cibidi ti yuli po ki baa. Fala baa ti kelima ti tieni ti *tuonbiadi.

¹⁷ Lani n teni ke ti pali ye leni fala Ke ti nuni mo biigi.

¹⁸ Siyono juali biidi. Lankane ke i coli goadi Ban bua maama!

¹⁹ Fini Li Miali Diedo yua kaa Ti gbandi po yaa yogunu kuli, A gbandi baa waagi ki ye yaa yogu n tu yaa yogu.

²⁰ Li ga lede Ke a baa sundi tipo Yaa yogu n tu yaa yogu? Naani a baa lu ki diani ti ti miali yema kuli nni?

²¹ Li Miali Diedo teni tin guani a kani, Lanwani ti baa guani! Goa ki pandi ti dana nani u yogu nni yeni.

²² Naani a li baa lu ki diani ti cain yo? Naani a pali li beni tipo hali ki duodi?