Jeremi Bubula 1 - Gourmanchéma Bible

Jelusalema nani ban luni ki diani yaa kpepuoli yeni

¹ Jam, li ga lede, Yaa dogu n den gbie bonŋanla yeni N di ti bili bonkuongu, Ki naani leni li kpepuoli! I nibuoli diema siiga, Jelusalema den tie dociamu Ki tie badisalo a dogbenga po, Mani n di goa ki tuuni li tuonpaali!

² Ñiagu kuli o mua, O ninsiidi mo tagidi o tankpina po. Yaaba n den bua o kuli siiga, Oba kuli ki baagidi o. O danlinba kuli ñani o puoli Ki kpandi ki tua o yibalinba.

³ Bi gedini Juda ti yonbidi, o laa i fe. O fala kandi hali boncianla. O kaa i nibuoli siiga kaa pia yanduanma. Yaaba n sedi opo kuli baa paadi o, O paboankandikaali siiga.

⁴ Siyono sani kuli ye leni li pabiidili, Kelima baa go kpendi u badu po. O buliñoana kuli biidi cain, O kopadicianba duni, U dogu badisiaba ye leni li paboanli, O dogu baa ye leni pabiidicianmoanli.

⁵ O yibalinba n tugi yuli Bi koanginkaaba kaa leni mi yanduanma. Li Miali Diedo waani o fala Kelima o tuongunda n yaba maama yaa po. O yibalinba taa o bila ki gedini ba ti yonbidi.

⁶ Siyono mua ke yaaba n den tie O Kpiagidi kuli caa ki baa bodi. O koanbala kuli goa ki tua nani i kabili Yaaba n kaa pia moaŋmankaadi, Ki tiini o tuado nintuali kaa pia fidu yeni.

⁷ Jelusalema baa tiani wan laa i fe yaa dana nni ki puagi. O baa tiani wan den pia yaa bonmoanla kuli po. Yaa yogunu ke yibali paadi o diema, Ke niloba kuli ki cua ki baa todi o O yibalinba den nua o, ki laa o kelima o bodima po.

⁸ Jelusalema tieni o *tuonbiadi boncianla, Lani n teni ke o *joagini. Yaaba n den kpiagidi o kuli Fali o kelima bi laa o mubili. O duni ki guani puoli po.

⁹ O joagindi gbiabi o liadili nni Waa faami yaala n baa fidi Ki tieni o ki juodi. O tingbali ki pia maama! Yua n baa baagi o kuli ki ye. O yedi: «Ŋain Li Miali Diedo diidi min laa yaa fe Yibali wani yaa bali doni.»

¹⁰ Yibali tandi o nuu Ki taa wan pia yaa bonmoanla kuli. O laa ke i nilanbuoli kua O *kaangagidiŋamu nni, Ŋan den kuani yaaba n da kua a nitaanli nni yeni.

¹¹ O niba kuli duni ki lingi bi bonjekaala. Bi taa ban den pia yaa bonŋanla kuli Ki lebidi leni mi jiema Ki bua ki faadi bi miali. O go yedi: «Diidi fini Li Miali Diedo, ŋanbi ki diidi, Diidi ban fali nni maama.»

¹² Lan da tua mani yeni yinba yaaba n tagini u sanu kuli po. Diidi mani ki le, Li yaa pia yaa fala n naani n fala Ban waani nni yaa fala yeni. Li Miali Diedo teni ke n pali boandi O pabiencianli daali.

¹³ Hali tanpoli, o teni ke mi fantama Kua n kpaba nni ki juugi ŋa. O dia nni ti cuadi, Ki teni ke n ŋmadi ki baa. O teni ke n pali boandi Ki ye leni fala li yentunli nni kuli.

¹⁴ O taa n biadima kuli ki tuni nni. Lani n tie Li Miali Diedo n gbeni n gbanmanu maama n yeni. O teni ke yaa nii n muubi nni yeni, n kan ŋmadi.

¹⁵ O Diedo deli ki ñani Yaa jakoanda kuli n den ye n kani. O yini ki tieni toagocianli kelima mini yaa po. Ki baa nugi n jawaaba. O Diedo nugi nni, mini li *powandiali Juda.

¹⁶ N mua lani yaa po yo, N nuni mua boncianla, N nuni kuli tie ninsiidi Kelima o baagika foagidi leni nni. Wani yua n baa goa ki faadi n miali. N bijaba ye leni li paboanli Kelima yibali yaa paalu n cie.

¹⁷ Siyono pua ki bubuuga Niloba kuli ki nanli o. Li Miali Diedo teni ke Isalele yieninlieba kpandi ki tua o yibalinba, Jelusalema tua joagindi bi siiga.

¹⁸ Li Miali Diedo n tiegi Kelima n den yie o *bali maama. Cengi mani yinba i nibuoli kuli Diidi mani n fala! N jafanba leni n jawaaba gedi ti yonbidi.

¹⁹ N yini yaaba n den bua nni, Ama bi boandi nni. N kopadicianba leni n nikpela Kpe u dogu nni, Ban den lingi mi jiema yaa yogunu Ki bua ki ga bi miana.

²⁰ Li Miali Diedo, diidi n paboanli! Leni n gbanu kuli n jeli maama! N yama kuli yagi boncianla, Kelima n tua niyieka moamoani. I sani nni bu toabu di a miana Ti diedi tugu nni moko kuuma bebe.

²¹ Bi den gbadi ke n duni, Ama oba kuli naa den baagi nni. N yibalinba kuli gbadi n yebiadima, Bi mangi bi pala leni ŋan teni ke li tieni. Ŋan den maadi yaa daali yaa maama yeni, A teni ke li cua. Teni bani moko n goa ki tua nani mini yeni!

²² Bi biadima kuli n cua a nintuali. Ŋan soani bani mo Nani ŋan den soani nni maama Kelima n janda po. Moamoani n ñiindi yaba, N pali mo ye leni fala.