Jeremi 52 - Gourmanchéma Bible

¹ Sedesiasi den pia piilie n binyenle wan den tua Juda bado yaa yogunu. O den kali ti gbandi po piiga n binyenli Jelusalema dogu nni. O naa den yi Amutali, ki tie Jelemi Libina diema yua yaa bisalo.

² O den tieni yaala n bia Li Miali Diedo po nani Yeojakimi n den tieni maama yeni.

³ Yaala n den tiendi Jelusalema dogu nni leni Juda diema nni kuli den taani ki biendi Li Miali Diedo pali, hali yaala ke o den ñani bi maama nni cain. Sedesiasi den fiini mi yiema Babilona bado Nebukanesa po.

⁴ Wan kali ti gbandi po li binyiali nni, cipiiga danpiiga daali Babilona bado Nebukanesa den cua leni o toagoli kuli ki baa Jelusalema.

⁵ Bi den gaani ki lindi u dogu ki kaa hali o bado Sedesiasi piiga n binyenli.

⁶ Cinaa dana yia daale ke mi koma den moandi u dogu nni boncianla. Bonjekaala ki go den ye bi niba po.

⁷ U folu den tieni u dogu nni ke a jakoanda kuli den lundi likani ki sani ki ñani u dogu nni ku ñiagu. Bi den tagini yaa buliñoabu n ye i bilinliedi siiga ki kuu leni o bado kpintiidi kuanu. Kalide yaaba n den lindi ki baa cebini u dogu yaa yogunu, bi den taa Alaba sanu.

⁸ Ama Kalide yaaba toagoli den ŋoadi o bado Sedesiasi ki nandi o Jeliko tialu nni. O toagoli kuli den yadi ki ŋa o.

⁹ Bi den cuo o bado ki gedini o Babilona bado yua n den ye Libila kani Hamati diema nni. Bi den jia leni o ti buudi lankani.

¹⁰ Babilona bado den teni ke bi kodi Sedesiasi bijaba o nunbu nni. O go den teni ke bi kodi Juda koanbala kuli Libila po.

¹¹ Lan yuandi o den teni ke bi fiadi fiadi Sedesiasi nuni ki teni ke bi loli o leni i kumoangaali. Babilona bado den gedini o Babilona diema nni ki luoni o li kpaadidieli nni hali o kuuma daali.

Nebusaladani biidi Jelusalema ki dudi

¹² Cimuu danpiiga li den tie Nebukanesa Babilona bado bali piiga n binyiali.

¹³ O den juu Li Miali Diedo diegu, o bado diegu leni Jelusalema diedi kuli leni yaa dieli n den pia mayuli kuli.

¹⁴ Lanwani Kalide yaaba toagola ya n den ye leni bi guudikaaba yudaano yeni, den mudi yaa bilinciami n den lindi ki cebini Jelusalema kuli.

¹⁵ Bi guudikaaba yudaano Nebusaladani den taa mi diema niba tianba yaaba n den luo ki gedini ba ti yonbidi, yaa niba n den sieni u dogu nni yaaba n den taa bi yula ki puni Babilona bado leni a tuonsoanbanda kuli.

¹⁶ Baa leni lankuli Nebusaladani bi guudikaaba yudaano den ŋa bi nitianba nani taliginba ke bi guu duven tiidi kuani ki go ko bu kpaabu.

¹⁷ Kalide yaaba den mudi ti kumoandi dasaana ya n den ye Li Miali Diedo diegu nni, leni ti ñinniditiadi tuankaani leni ti kumoandi ñintadiciangu, yaagu n den ye Li Miali Diedo diegu nni. Bi den gedini ti kumoandi yeni Babilona.

¹⁸ Bi go den taa mi fantanpienma tiadi, pelinba, mu jugimu, mu tadiñokaamu, mu tadibuomu leni ban den tuuni U Tienu diegu pada tuonli leni yaa tiadi ke ti tie kumoandi kuli.

¹⁹ Bi guudikaaba yudaano go den taa ti ñingaandi, mi fantama tiadi, mu tadiñokaamu, mu tadibuomu, yaala n den tie wula leni ŋanjilifa kuli.

²⁰ Baa den fidi ki baa biigi o bado Salomono n den taa yaa kumoandi ki den kuani yaala n den tie Li Miali Diedo diegu maama nni yaa kpiagu. Li kumoandi tiadi n den tie ti ne: a bunbunlieda, ku tadiciangu leni a piiga n naatonlieda yaaba n den tugi gu leni ti teliti.

²¹ A bunbuna yeni siiga, bonyenli kuli yaa kpedima den tie piiga n nukpanduna nii ki pia yaa baabu n lindi ki cebini. A gaanilindima den tie piiga n nukpanduna lie. Li bunbunli yeni den tie bonlongu ke li pianu den tie nubila naa.

²² Li bunbunli yuli po den pia bontuankaala ke li tie kumoandi ki kpedi ki pundi nukpanduna muu. Li bunbunli yuli gaanilindima den pia bu ganbu leni *gelenadie bonluonkaala nannanli ke likuli tie kumoandi. Li den tie yene li bunbunli yaali n den sieni leni gelenadie tiidi bonluonkaala kuli po.

²³ Gelenadie tiidi bonluonkaala yaala n den gaani ki lindi den tie piiyia n bona luoba. Yaa gelenadie tiidi bonluonkaala n den gaani ki lindi bu ganbu den tie bona kobiga.

²⁴ Bi guudikaaba yudaano den cuo bi kopadicianba bado Selaya leni o duogili Sofoni leni U Tienu diegu buliñoaguuditaadiba.

²⁵ O den cuo moagiliyenga, yaaga n den tie bi toatieba yudaano. O den cuo ban den laa u dogu nni o bado cancantieba yaaba siiga niba muu, leni bi toatieba yudaano tidianlo, yua n den yen dangi yaaba n baa gedi bu toabu. O den cuo i tinkundogi niba niba piiluoba, yaaba n den ye u dogu nni.

²⁶ Nebusaladani bi guudikaaba yudaano den taa ba ki gedini ba Babilona bado kani Libila dogu nni.

²⁷ Babilona bado den pua ki ku ba Hamati diema nni.

²⁸ Yene ke bi den taa Juda yaaba ki gedini ba ti yonbidi naani n foagi leni bi diema. Diidi Nebukanesa n den gedini yaa niba ti yonbidi: li binleleeli, Jufinba tudataa n piilie n niba taa (3 023).

²⁹ Nebukanesa piiga n binniili o den ñani Jelusalema kobinii n piitaa n niba lie.

³⁰ Nebukanesa bali piilie n bintaali, bi guudikaaba yudaano Nebusaladani den gedini Jufinba kobilele n piinaa n bonba muu ti yonbidi. Bi niba kuli coali den tie tudanaa n kobiluoba (4 600).

Babilona bado tieni sugili Yeojakini po

³¹ Juda bado Yeojakini n den gedi ti yonbidi ke li tieni piitaa n bina lele yo ke Efili-Melodaki den tua Babilona bado. Laa binli piiga n cilie piilie n danleleeli daali ke o den gbadi Yeojakini po mi niñima ki ñani o li kpaadidieli nni ki go kaani o ti gbandi po.

³² O den maadi leni o leni mi buama, ki teni ke o bali kpiagi ki cie yaa badiba n sieni, ki den taa ki ye leni o Babilona nni kuli.

³³ Babilona bado den teni ke Yeojakini den landi o kpaadi tiadi ki lani tiatoadi ki di wani o bado saajekaanu kani o miali dana kuli.

³⁴ O miali yema dana kuli nni hali o kuuma daali, Babilona bado n den kuandi opo o ŋantaadi kuli daali n tu liyali.