Jeremi 46 - Gourmanchéma Bible

¹ Diidi li Miali Diedo n den maadi Jelemi yaa maama i nibuoli kuli po:

Bi pua ki paadi Ejipiti yaaba Kalikemisi diema nni

² U Tienu n den maadi yaa maama Ejipiti diema po, mi bado*Falono Neko leni o toagoli po. Wani Ejipiti bado yeni den ye u kpenciamu Yufilata kani Kalikemisi po, Babilona bado Nebukanesa n den cua ki pua ki paadi o yaa yogunu. Li den tie Juda bado Josiasi bijua Yeojakimi bijua bali binnaali binli.

³ Babilona toatieba yudanba den tangi ki tua: «Caligi mani ti gbankoanditi buoli kuli bu toabu po.

⁴ Doali mani yi taami Bi tandanba, jagini mani yi taami. Cua mani leni a kusana Luani mani yi kpaana Laa mani yi kudiliada.»

⁵ Be n tieni? Be mo nne? Bi jigi kuli cie Bi sudi puoli po. Bi pua ki guli bi jakoanda. Moala wani yua tadi yua pa jige! Oba kuli ki go tiini ki gbegidi ki nua! Ti jawaandi bebe n ye i kaani kuli. Li Miali Diedo n yedi yeni.

⁶ Yua n yua ki cie bikuli kan fidi ki sani! O jakoando mo kan fidi ki sani ki cia! Nijienu po kpenciamu, Yufilata boanjaana po, Bi tuudi, ki ŋmadi ki baali moko.

⁷ Ŋme mo n do nani u kpenciamu Nili yeni, Yu yaa ñingola n pu loabiloabi?

⁸ Ejipiti n naani leni u kpenciamu Nili yu n gbie Ke u ñingola mo pu loabiloabi. Ejipiti den tua: «N baa fii ki milini ki tinga, N baa bolini li dogi kuli leni li niba.

⁹ I taami, ña mani Teliti yaa tiini! A jakoanda n ña Etiopi leni Puti diema yaaba, Yaaba n bani ku gbankoandigu mubinma Leni Ludi yaaba, yaaba n bani li dabanli bonŋanla!»

¹⁰ Ama laa daali tie Li Miali Diedo U Paaciamu Kuli Daano po yo. Li tie pantuuli daali. O baa guani yibalinba bi panpaani. Ki jugisiega di, ki baa je ki guo Ki baa ño mi soama bonŋanla Kelima li tie li padili, o Diedo Li Miali Diedo U Paaciamu Kuli Daano po, Nijienu diema nni, ki goa u kpenciamu Yufilata po.

¹¹ Yinba Ejipiti yaaba gedi mani Galaadi po, Ki ban lingi u ñoagu. Ama yi ñoagu kuli ki pia yipo fuomaba kuli.

¹² I nibuoli gbadi yi fe laabaalo. Yi bubula mo gbie ki tinga Kelima jakoando baa tuudi jakoando, Bikuli n taani ki baa.

Bi gedi ki baa Ejipiti diema

¹³ Li Miali Diedo n den maadi yaa maama o sawalipualo Jelemi Nebukanesa Babilona bado n den baa cua ki baa Ejipiti diema bu toabu yaa yogunu.

¹⁴ Waani mani laa bonla Ejipiti diema nni. Teni mani Migidoli yaaba n ga laabaali. Teni mani Memifisi leni Tapanesi yaaba n ga laabaali. Yedi mani: «Cua mani ki bogini bonŋanla Kelima bu toabu dini yi gaanilindima kuli niba.»

¹⁵ Be teni ke yi *bulo Apisi ŋmadi ki baa? Li Miali Diedo n pua ki guli o.

¹⁶ Li Miali Diedo n teni ke bi toatieba boncianla jadibi jadibi, Ki ŋmadi ki baali biyaba po ki tua: «Fii mani tin guani ti diema nni Ki foagidi leni bu toabu leni bu fala.»

¹⁷ Lanpo bi tangi ki tua: «Ban pa Ejipiti bado Falono yaa yeli n tie na: “Lanpaabu fanma, fanma bebe.” »

¹⁸ Mini Li Miali Diedo U Paaciamu Kuli Daano n tie Bade. Nani a juana siiga Taboli juali n kpedi maama Ke Kalimeli juali mo n se mi ñincianma nni maama yeni, Yibalinba baa cua ki baa Ejipiti diema ke laa pia tama yene.

¹⁹ Loli mani yi tiadi dietoama gedima po, Yinba Ejipiti diema yaaba! Kelima Memifisi baa kpandi ki tua paboanli kaanu, Bi baa buoni likani, nilo kan go yaa ye likani.

²⁰ Ejipiti tie yaa naasalo n ŋani hali bonŋanla. Ama ki naasibiadiga ñani nijienu po ki cua.

²¹ Baa Ejipiti diema nni ban pa yaa toatieba i ligi bu toabu po Lebidi ki sani. Baa ke bi wubi ba nani a naatonbila yeni, Oba kuli naa sedi ki baa mua jama, Min fii ki sedi bipo ki baa waani ba fala yaa daali.

²² Ejipiti yaaba sani ki mua nani i we, Bi yibalinba toagola n nagini yaa yogunu. Bi cua ki baa ba leni a yala Nani yaaba n pe i tiidi yeni.

²³ Bi pe bi tiidi, Li Miali Diedo n yedi Ke bi fuali nni kuama ki dingi Kelima bi yabe nani a dondoba yeni Bi coali mo ki pia bianu.

²⁴ Ejipiti diema yaaba ye leni i fe Bi ŋa ba nijienu nibuolu yaaba nuu nni.

²⁵ Li Miali Diedo Isalele Tienu yedi: «Diidi n fii ki sedi Tebesi yaaba bulo Amoni po, Ejipiti *buli po leni o badiba po ki taani leni yaaba n dugi opo kuli po.

²⁶ N baa ŋa baa yaaba n bua ki ñani bi miana nuu nni. N baa ŋa ba Babilona bado Nebukanesa, leni o toagoli nuu nni. Li yaa puoli Ejipiti diema baa goa ki tua nani man den kpa tie maama. Li Miali Diedo n yedi yeni.

Isalele baa mi faabima

²⁷ Fini Jakobo n naacemo, da jie liba Yi jigi n da cie mani yinba Isalele puoliŋuani N kpendi ki baa faabi a fini Jakobo buolu. N baa faabi a puoliŋuani leni ban den yayadi Ki ye ti yonbidi yaa diema n foagi nni. Jakobo puoliŋuani baa guani ki baa mi diema yanduanma. Liba kan go yagi bi yama mo.

²⁸ Fini Jakobo, n naacemo Da jie liba, Li Miali Diedo n yedi yeni. Kelima n ye leni a N baa bolini i nibuoli kuli Min den yadi yi yaaba yaa siiga yeni. Ama fini wani, n kan bolini a N baa mabini a nani lan pundi maama bebe N kan ŋa ŋa nani yua n ki pia tagili yeni.»