Jeremi 31 - Gourmanchéma Bible

¹ Li Miali Diedo yedi: «N baa yaa tie Isalele yaaba kuli Tienu, Bi mo n yaa tie n niba.»

² Li Miali Diedo yedi nanda: «N doagidi n *ŋanbili Yaa niba n sani ki cia ki jugisiega mi fanpienma po. Lani yaa po Isalele baa ye leni mi yanduanma.

³ Mini Li Miali Diedo go yedi: ‹Hali yogu, n bua yi yaa buama n ki pia gbenma. Lani n teni ke n baa kubi n ŋanma yipo.

⁴ Yinba n niba Isalele yaaba, N baa goa ki mangi yi yema! Yi baa ña leni mu lonmu, Ki taani leni yaaba n jeli ki mangidi yi pala yaa siiga.

⁵ Yi go baa ŋu duven tiidi Samali juana po, Yaaba ŋuu baa ŋuu ki go pedi ki go yendi.›

⁶ Li daali didi go kpendi ke yaaba n guu u dogu baa yedi: ‹Fii mani tin gedi Siyono Li Miali Diedo ti Tienu po.› »

⁷ Kelima Li Miali Diedo yedi nanda: «Yiini mani Jakobo po leni li pamanli. Mangi mani yi pala i nibuoli nintuali. Teni ban gbadi yi niali, yin pagi o ki yedi: ‹Li Miali Diedo, faabi a niba Isalele yaaba, Yaaba n sieni!›

⁸ Diidi n baa teni ban ña nijienu diema po. N baa taani ba hali u tinbianu, Bi siiga pia a juama leni a diama, Yaa puoba n punbi leni u maditugukoanu danba kuli. Li tie nitaancianli n lebidi ki guani nekanba.

⁹ Bi kpendi ki mua yo. N cangi ba leni i baagi Ki gobidi ba yaa ñima n puubi po. Bi ŋua sanyendu ban kan tuudi naankani. N tie Isalele yaaba po nani bibaa yeni. N bijakpelo mo n tie Efilayima.»

¹⁰ I nibuoli, cengi mani Li Miali Diedo maama Ki yadi laa maama hali a kpendega yaa ye foagima po: «Yedi mani ke yua n den yayadi Isalele yaaba, Baa goa ki taani ba ki kubi ba, Nani o yankpaalo n kubi o yankulu maama yeni.

¹¹ Kelima Li Miali Diedo baa faabi Isalele yaaba, O baa da ki faabi ba yua n pa ki cie ba nuu nni.

¹² Bi baa cua Siyono juali po ki yiini leni li pamanli Kelima Li Miali Diedo n baa pa yaa piama po. Man tie: *ŋalikama, mi dapanma, mi kpama, Ti yanbidi leni a yangbenga. Bi baa yaa tie nani ban kpidi yaa tikuanu yeni. Jawaandi kan go cuo ba.

¹³ Lanwani bi jafanba baa jeli ki mangi bi pala Ki taani bi jawaaba leni a jakpela kuli. N baa teni bi paboanli n tua pamanli. N baa baagi ba. Bi falabiado yeni puoli po n baa teni bi pala n mangi.

¹⁴ N baa guoni bi kopadicianba leni mi yankpama. N niba baa baa n piama lan dagidi ba. Li Miali Diedo n yedi yeni.»

¹⁵ Li Miali Diedo yedi mine: «A bubula leni i moeciami fii ki loli Lama dogu nni. Lasela n mua o bijaba po, Ki yie ke o kan ga baagi kelima o bijaba ki go ye.

¹⁶ Li Miali Diedo maadi nanda: ‹Da mua, duuni ki ñani a ninsiidi Kelima a tuona baa baa i panpaani. Li Miali Diedo n yedi yeni. A bila baa ña bi yibalinba denpo ki kpeni.

¹⁷ Mi suginma ye apo saala po, Kelima a bijaba baa ti faa ki goa bi diema nni.› Li Miali Diedo n yedi yeni.

¹⁸ N gba ke Efilayima yaaba kaliti ki tua: ‹A faligi ti, ti laa fala Nani yaa naabiga n naa pia maanli yeni. Teni tin guani, ti baa guani Kelima Li Miali Diedo, fini n tie ti Tienu.

¹⁹ Ti den yaadi, ama ti biidi ti pala ki mia sugili. A teni ke ti bandi ti tagili Ti pua ti bena, i fe pia ti, Kelima tin den tieni yaala ti panma nni po.›

²⁰ Efilayima tie n bibuadiga Wani n tie n bigbabili. N kan fidi ki kan tiadi opo Kelima min bua o maama po. Mi niñima pia nni opo. N li bua o moamoane. Li Miali Diedo n yedi yeni.

²¹ Sieni, sieni mi maalima a sanu nni, Faami ŋan cuoni yaa sanu nni bonŋanla. Guani mani ne yinba Isalele yaaba. Guani mani yin die yaa dogi yeni nni.

²² Hali u laa yogu yo ke yi baa waagi ki puagi yinba yi tupaali danba? Kelima Li Miali Diedo cuani li boncanla ki tinga nni: Lani n tie ke o pua baa jiadi o ja.»

Mi goaŋanbima leni o ŋantaadipaano

²³ Li Miali Diedo U Paaciamu Kuli Daano, Isalele Tienu maadi yaa maama n tie na: «Diidi mani ban go baa yedi yaala Juda diema leni mi dogi, min baa teni bi yonbi n goa ki kpeni yaa yogunu: ‹Fini mi teginma diegu, mi gagidiŋanma juali, Li Miali Diedo n seligi a!›

²⁴ Lankane ke Juda leni o dogi yaaba kuli baa cua ki kali, ki taani leni a kpakpaaba, bi yankpaaba leni bi yangola kuli.

²⁵ N baa paagi yaaba n coagi pala, ki pugini yaaba n tadigi mo u fidu.

²⁶ Min den fundi yaa yogunu n den sua ke n guama den mangi npo.»

²⁷ Li Miali Diedo yedi: «Diidi a dana kpendi, ke n baa teni Isalele leni Juda diema nni, bi niba leni ti yandi n tua nani li bonludikaala yeni.

²⁸ Nani min den ŋabi ba, ki pua ki luni ba, ki bolini ba, ki ku ba, ki go tieni ba yaala n bia maama yeni, moko n baa fiini ba ki ŋanbi bi yema yene. Li Miali Diedo n yedi yeni.

²⁹ Laa dana nni bi kan go yedi: ‹Bibaanba ŋmani a cabikaana ke a bila ñina gaabi.›

³⁰ Ama yua kuli baa kpe o *tuonbiadi nne. Yaa nilo n ŋmani a cabikaana yeni o yaa ñina n baa gaabi.»

³¹ Li Miali Diedo yedi: «Diidi u yogunu kpendi ke n baa kuani yaa ŋantaado n paani leni Isalele leni Juda buolu yaaba.

³² Li kan yaa tie nani min kuani yaa *ŋantaado leni bi yaajanba min den mubini bi nii ki dadi ki baa ñani ba Ejipiti diema nni yaa daali ka. Baa ke n tie bi canbaa, bi den fidi laa ŋantaado. Li Miali Diedo n yedi yeni.»

³³ Mini Li Miali Diedo yedi: «Diidi mini baa kuani yaa ŋantaado Leni Isalele diema yaaba. Laa dana yaa pendi N baa kuani n *balimaama bi yantiana nni. Ki diani ma bi pala nni. N baa tie bi Tienu, Bani mo baa tie n niba.

³⁴ Oba kan go bangi o yua. Oba kan go yedi o kpiilo: ‹Bandi mani Li Miali Diedo!› Kelima bikuli baa yaa bani nni, Ki cili yua n wa bi siiga ki ban taani o nikpelo, Li Miali Diedo n yedi yeni. N baa tieni sugili bi tagili po. N kan go tiadi bi tuonbiadi po.»

³⁵ Li Miali Diedo yedi nanda: «Ŋme n teni ke u yienu ye ki yendi u yensiinu, Ki teni ke o ŋmaalo leni a ŋmabila mo yendi ku ñiagu? Ŋme n yen fiini mi ñincianma ñingola n yaa mua mi jama? O yeli yi Li Miali Diedo U Paaciamu Kuli Daano.

³⁶ Li yaa tie ke li daali baa fidi ki cua ke laa bonla baa lebidi, Laa daale ke Isalele puoliŋuanu moko kan go yaa tie n nibuolu. Mini Li Miali Diedo n yedi yeni.

³⁷ Li Miali Diedo maadi yaa maama n tie na: Li yaa tie ke tanpoli tawadi pia mi biigima, Li yaa tie ke ki tinga tanpuuli pia mi bandi gbenma, Lanwani n baa ña Isalele puoliŋuanu maama nni cain, Kelima ban tieni yaala yaa po. Mini Li Miali Diedo n yedi yeni.»

³⁸ Li Miali Diedo yedi: «Diidi a dana kpendi ke bi baa goa ki maa Jelusalema dogu mini Li Miali Diedo po, ki cili Ananeeli diefoagili kani ki yaa caa hali mi logidima buliñoabu.

³⁹ Bi baa goa ki biigi u dogu banlu nintuali po yo ki yaa goa Galebi juaga po, ki yuandi ki pegidi ki noanli Goati po.

⁴⁰ Bi baa biigi bi tinkpiba leni mi fantanpienma joaloangu ki taani leni yaa fanma n bili ki ban pundi hali Sediloni joaloangu ki ban tu i taami buliñoabu nijienu po. Bi baa taa likuli ki gagidi ki ŋanbi Li Miali Diedo po. Bi kan go tudi ki lu la, ki buali ban bolini la.»