Jeremi 16 - Gourmanchéma Bible

¹ Li Miali Diedo den maadi nni yaa maama n tie na:

² «Ŋan da taa pua, A kan maa nekanba bonjala bi bonpola.

³ Li Miali Diedo maadi Yaa bonjala leni yaa bonpola N baa maa nekanba kuli po, Bi baanba leni bi naanba yaaba n mali ba Mi naa diema nni kuli po, ki yedi:

⁴ ‹Bi baa yiage ki kpe. Bi kan baa kuŋanbili. Bi kan baa ban bogidi ba. Bi baa kpandi ki tua bugidi u tingbanu po. Bu toabu leni mi koma baa dudi ba. Bi gbanandi baa tua jiema tanpoli nuani leni ti yandi kuli po.› »

⁵ Li Miali Diedo yedi nanda: «Da kua kuuma n kpe yaa diegu nni, Da gedi kudiegu Da mua bipo ŋain! Kelima n ñani n yanduanma laa niba siiga, Ki taani leni n ŋanma leni n niñingbadima kuli.

⁶ Li nikpela leni li bila kuli baa kpe mi naa diema nni. Bi kan baa piinma, Bi kan baa ban lu bi kudiegu, Oba kan kuo o yuli bipo, Ki buali nni ban be i be bipo.

⁷ Oba kan cua ki taani ki je Leni yaaba n ye leni mi kuuma paboanli ki baagi ba. Oba kuli kan padi i baagi padili Yua yaa baa bi yua yaa naa n kpe po.

⁸ Ŋan da kua yaa diegu nni n pia u badu Ki kali leni ba ki je ki go ño.

⁹ Kelima Li Miali Diedo U Paaciamu Kuli Daano, Isalele Tienu yedi: ‹Mini nna! N baa teni li pamankandikaali yani, Toginaa leni togibaa yani leni i yigini kuli n gbeni. Laa bonla kuli baa tieni yi nunbu nni ke yi da pia yi miana.›

¹⁰ A yaa ti waani mi naa maama kuli ke bi yedi a: ‹Be yaa po yo ke Li Miali Diedo maadi ti mi naa yebiadimoanma maama? Ti tagili n tie i le? Ti tieni Li Miali Diedo ti Tienu po be yaa tuonbiade?›

¹¹ Lanwani a baa guani ba: ‹Li tie kelima yi baanba ŋa nne. Mini Li Miali Diedo n yedi yeni. Yi tiini ki ŋua i *buli, ki baa yaa kpiagidi i, Ki gbaandi i, ki go pugi i Ama mini wani, bi ŋa nni, Baa go kubi n *balimaama.

¹² Yimo go tieni mi biadima ki cie yi baanba. Diidi yi siiga nni yua kuli ŋua O pajagindi tundiyuodi ki naa cengi nni.

¹³ N baa ñani yi mi naa diema nni, Ki lu yi, Yinba leni yi baanba kuli n ki bani yaa diema nni. Lankani li yensiinu leni li ñiagu kuli, Yi baa yaa kpiagidi i buli Kelima n kan gbadi yipo niñima.› »

I yonbi baa ña ti yonbidi ki kpeni

¹⁴ Lani n teni ke Li Miali Diedo yedi: «Diidi a dana kpendi ke bi kan go yedi: ‹Li Miali Diedo fo wani yua teni ke Isalele yaaba ñani Ejipiti.›

¹⁵ Ama bi baa yedi: ‹Li Miali Diedo fo wani yua ñani Isalele yaaba Nijienu po yaa diema nni, Leni wan den yayadi ba yaa diema nni kuli.› N baa goa ki cuani ba mi diema nni, Min den puni bi baanba yaa diema nni yeni.»

Bi baa cuo i tagili danba kuli

¹⁶ Li Miali Diedo yedi: «Mini nne n baa soani bi jankpaanba boncianla Ban cua ki kpaani ba. Li yaa puoli n baa soani a fuagoada boncianla ban cua Ki deli ba a joaciama leni a joabila kuli po Leni ti joatanlondi nni kuli.

¹⁷ Kelima n nuni diidi ban tiendi yaala kuli. Bi tuona naa duagi n nuni po N nua bi tagili kuli mo.

¹⁸ N baa pa ba bi *tuonbiadi panpaani figilima lie Bi tagili leni bi tuonbiadi po. Kelima bi *joagini n diema leni bi tuongunda, Leni bi cancaginbuli yi n kpe yeni.»

Yua kuli n bandi i moamoani Tienu

¹⁹ Li Miali Diedo n tie n gbanmanu, n wuonkaanu, Li pabiidili daali min baa sani ki deni yua. I nibuoli baa ña u tinbianu ki cua ki yedi: «Ti baanba den dini yaa faali n tie faama bebe. Yaa faama n ki pia mayuli

²⁰ Naani o nilo baa fidi ki tagi o yuli po I buli yi n ki tie bonmoanla?»

²¹ Li Miali Diedo yedi: «Moala wani, N baa teni ban bandi n fidu leni n paaciamu. Yeni bi baa bandi ke n mini n tie Li Miali Diedo.»