Jeremi 10 - Gourmanchéma Bible

¹ Cengi mani Li Miali Diedo n pia yaa maama ki baa maadi leni Isalele yaaba!

² Li Miali Diedo yedi nanda: «Da togidi mani i nibuoli bontienkaala, Da teni mani yaa sinankeeninba n tiendi tanpoli n jieni yi. Kelima yaa nibuoli n sieni n baa jie laa bonla.

³ Laa nibuoli bogida ki pia fuomaba kuli. Bi yen pedi bu tibu li fuali nni, O tuonsoanbando n taa li yali ki kpie bu bonŋanla.

⁴ Bi yen bobini bu tibu daagu yeni bonŋanla leni ŋanjilifa leni wula. Bi yen taa ki tuatuaga ki kpaa bu leni a kpakpaana ke bun da begibi.

⁵ Laa *buli tie nani a bunbungbenga yeni Baa maadi, Se bi tugi ba lani yaaka bi kan fidi yaagi taali. Da jie ba mani, Kelima bi kan fidi ki tieni bonbiadiliba kuli. Nani ban kan fidi ki ŋanbi liba mo maama yeni.»

⁶ Oba kuli ki naani leni a, Li Miali Diedo A yaba, a yeli moko yaba ki go pia u paaciamu

⁷ Fini i nibuoli kuli bado, ŋme n kan jie ŋa? Fini n tie lan pundi ban fangi yua Kelima i nibuoli yanfodanba kuli siiga, Leni mi diema buoli kuli siiga, Oba kuli kan niagi leni a.

⁸ Bikuli taani ki tie yanpiidanba leni yanluodanba. Yaala n doagidi ke baa pia fuoma n tie bu tibu yeni.

⁹ Hali Talisisi po yo ke bi ñandi ŋanjilifa, Ufasa po yo ke bi ñandi wula. O maano soani leni laa bonla bonŋanla. Bi yen yuandi ki lani i buli yeni Leni yaa tiadi moani colicoli Ki ŋmadi leni yaa tiadi n moani ki suudi. Lankuli tie o tuonsoanbando yaa tuonle.

¹⁰ Ama Li Miali Diedo tie U Tienu i moamoani, Wani yaa Tienu n fo tie yaa bado n ki pia juodima. O pabienli nni ki tinga digibi I nibuoli kan fidi ki sedi o pabiencianli nintuali.

¹¹ Yin maadi leni ba nanda: «Yaa buli n ki tagi tanpoli leni ki tinga baa bodi. I baa bodi mi tinfanma nni cain.»

¹² O tagi ki tinga leni o paaciamu. O tagi ki tinga leni o yanfuoma. Leni o yanfuome ke o tandi ti tawadi.

¹³ O yaa li yedi mayenma Mi ñima yen sani ki taani tanpoli. O yen teni ti tawadi n ban fii u tinbianu po ki do tanpoli. O yen teni i tañigi n tieni ki taaga po. O den ñani u faalu wun wuo naani.

¹⁴ Ja kuli banma yen ti teni wan tua yanpiidaano. I fe n cuo yaaba n tuuni leni wula ban tagi yaa buli po Kelima bi buli yeni tie fanma bebe Baa pia fuoma bi niinni.

¹⁵ Baa pia mayuli Bi cila pia ti laadi, Bi baa bodi, Bi fala yaa cua yaa daali.

¹⁶ Ama Isalele Tienu yua n tagi tanpoli leni ki tinga Naa tie nani i buli yeni ka. Wani n die Isalele yaaba. O yeli n tie Li Miali Diedo U Paaciamu Kuli Daano.

Mi yebiadima ki pia kaa cua

¹⁷ Wodi a tiadi fini Jelusalema, Ban cebi ki lindi fini yua yeni!

¹⁸ Diidi Li Miali Diedo yedi mine: «N baa lugidi mi diema yaaba Nani ku tanbuncaangu yeni. N baa mabini ba bonŋanla, Ki teni ban nandi ba.»

¹⁹ Jelusalema yedi: «Mi naa yebiadima te? N bia n yeni! N nali koani N mo den tua: Laa bia, N baa naabi!

²⁰ N gbandieli biidi! Li baabi kuli cie cie. N bijaba sani ki ŋa nni Baa go ye. Mii go pia yua n baa tii npo n gbandieli Yua n baa pini npo n diena.»

²¹ Bi gobidikaaba tua yanpiidanba Baa lingi Li Miali Diedo. Lani n teni ke baa bani bonla gagidima. Ban gobidi yaaba mo kuli yayadi.

²² Ti gba ke bu lanbu kpendi. Laa lancianbu ñani nijienu diema po yo, Ki baa teni Juda dogi n tua diegbendi Leni tanboe yekaanu.

Jelemi jaandi o niba kuli yeli nni

²³ Li Miali Diedo n bani ke o nisaalo ki die o sanu O kan fidi ki ŋoadi o yuceli po sanu.

²⁴ Tundi nni Li Miali Diedo Leni mi *teginma Lan da tua leni pabienli ka, Ŋan da ti teni min juodi fanma.

²⁵ Teni a pabiencianli n jiidi i nilanbuoli po Bani yaaba n ki bani a Leni yaa nibuoli n ki jaandi ki miadi a todima yeni po. Kelima bi di Jakobo buolu. Bi dini o hali ki bolini o Ki teni ke o tinga tua paboanli kaanu.