Jaki 5 - Gourmanchéma Bible

¹ Moala yinba a piada, yin cengi mani! Yin yaa buudi mani a bubupaala kelima yaa fala n baa baa yipo yaa po.

² Yi ŋalimani bedi, ti lulugidi mo ŋmani yi tiayiekaadi.

³ I tantonmoani biidi yi wula leni yi ŋanjilifa. I tantonmoani yeni baa fii ki sedi yipo ki kuli yi, ki bolini yi gbanandi nani mi fantama yeni. Yi dogini dogini yi ŋalimani a juodidana na niinni.

⁴ Diidi, yaa tuonsoanba n den yendi yi kuani ke yi janbi ba yeni, panpaani mua ki kuli yi. Yaaba n den yendi yi kpaandi yaa moe mo doni ki pundi hali o Diedo U Paaciamu Kuli Daano tuba nni.

⁵ Yi den ye ŋanduna nni leni mi yemanma ki go kuandi yi yama yi gbanandi bonbuakaala nni. Yi den di ki gbengidi nani a yanwubida ban wubi yaaba mi kodima daali po yeni.

⁶ Yi cuo o niteginka ki jia leni o ti buudi ki ku o, waa yie yipo.

Li juunli leni i jaandi yaa maama

⁷ Lanwani n kpiiba, yin yaa pia li juunli hali o Diedo cuama. Diidi mani, o kpakpaalo yen gu ki tinga bonluonkaala, yaala n pia mayuli hali boncianla, ki juuni lipo hali wan baa baa ki takpiaga leni ki tajuodikaaga kuli.

⁸ Yi moko n juuni ki paagi yi pala, kelima o Diedo cuama nagini.

⁹ N kpiiba, yin da yenbidi mani yiyaba po ke U Tienu n da bu leni yi ki cuo yi lipo. Wani o bujialo tuodi ki se bu buliñoabu kani.

¹⁰ N kpiiba, yin teni mani bi sawalipuaba yaa fala leni bi juunli n yaa tie yipo li bontogidikaala, bani yaaba n den maadi o Diedo yeli nni.

¹¹ Diidi mani, ti tua ke li pamancianli ye leni yaaba n laa fala ki go den juuni lienni. Yi gbadi Joba n den pia yaa juunli leni o Diedo n den yuandi ki puni o yaala o juodima yogunu. Kelima o Diedo pia mi niñingbadima ki go pia li *ŋanbili boncianla.

¹² N kpiiba, yaala n tugi mayuli tie line: Yin da poli leni tanpoli, bi leni ki tinga, baa leni poliba kuli. Ama yi yaa yedi: «Mm,» lan yaa tie, mm. Yi yaa yedi: «A-a,» mo, lan yaa tie, a-a, ke U Tienu n da ti jia leni yi ti buudi.

¹³ Naani yi siiga niloba ye leni fala bi? Wan jaandi. Naani niloba ye leni li pamanli bi? Wan yiini U Tienu yani ki pagi o.

¹⁴ Naani yi siiga niloba yia bi? Wan yini Kilisiti n yini yaaba nikpeliba ban jaandi opo, ki sogi o mi kpama o Diedo yeli nni.

¹⁵ Li *dandanli yaa jaandi baa paagi yua n yia yeni. O Diedo baa fiini o. Li yaa tie ke o den tieni ti *tuonbiadi, o baa baa sugili.

¹⁶ Lanwani yin tuo mani yi tuonbiadi yiyaba nintuali, ki go yaa jaandi yiyaba po ke yin paagi. O niteginka jaandimoani pia u paalu hali boncianla.

¹⁷ *Elia den tie nisaalo nani tinba yeni. O den jaandi jaandimoani ke ki taaga n da mi. Ki taaga naa den baa laa diema nni baa waamu hali bina taa leni boagidima.

¹⁸ Lani n pendi o go den jaandi ke ki taaga den mini, ke ki tinga mo loni ki bonluonkaala.

¹⁹ N kpiiba, yi siiga niyendo yaa yaadi ki ŋa i moamoani, ke nitoa gobidi ki guani o lienni,

²⁰ yin bandi mani ke yua n gobidi ki guani ti tuonbiadi daano wan den yaadi ki ŋa yaa sanu nni, o faabi o wan da kua mi kuuma nni, ki piini yaa tuonbiadi n yaba boncianla.