Jaki 2 - Gourmanchéma Bible

¹ N kpiiba, yinba yaaba n daani ti Diedo Jesu Kilisiti yua n pia ti kpiagidi yeni, laa pundi yin yaa tiendi mi gagidima bi niba siiga.

² Min bagi yaala tie line: O nilo n kua yi taanli nni ki pili wula ñoagibili, ki go yie yaa tiadi n pia ti kpiagidi, o luodo mo n kua ki yie a kpacala.

³ Li yaa tie ke yi jigini yua n yie yaa tiayiekaadi n pia ti kpiagidi yeni ki yedi o: «Kali ne ti jigidi kaanu,» ki yedi o luodo mo: «Yaa se ne,» yaaka: «Kali tiipo n taana kani.»

⁴ Naani yii tieni mi gagidima yi yama nni ki go bigidi leni li yantiabiadili ka?

⁵ N kpibuadiba, cengi mani! Naani U Tienu ki gandi yaaba n tie luoda ŋanduna nuni po ke ban tua a piada li *dandanli nni, ki go baa wan niani ke o baa pa yaaba n bua o kuli yaa diema kaa?

⁶ Ama yinba, yi fali o luodo. Laa tie a piada ka mabindi yi ki caani yi li bujiali kani?

⁷ Bani ka sugidi yaa yeŋanli n ye yi niinni?

⁸ Yi yaa kubi *U Tienu diema balimaama nani lan diani maama li ŋani, mani yaama n yedi: «Ŋan bua a nisaalilielo nani ŋan bua a yuli maama.»

⁹ Ama yi yaa tiendi mi gagidima bi niba siiga, yi tiendi ti*tuonbiadi, li bali maama mo buni ki cuo yi kelima yi miidi ma.

¹⁰ Kelima yua n kubi li bali maama ki nan miidi baa balimayenma bebe, pia i tagili mikuli po.

¹¹ Kelima yua n yedi: «Ŋan da conbi», wani n go yedi: «Ŋan da kpa o nilo» moko. Lanwani a yaa conbi ki nan ku nilo, a tua li balimaama miidika.

¹² Yin yaa maadi mani ki go tiendi, ki bani ke U Tienu baa jia ti buudi leni yi ki ŋua yaa balimaama n puuni mi *faabima.

¹³ U Tienu yaa jia ti buudi yaa yogunu, o kan gbadi mi niñima yua n kaa den gbadi o lieba po mi niñima yaa po. Mi niñingbadima paani li bujiali.

Li dandanli leni a tuona

¹⁴ N kpiiba, o nilo yaa yedi ke o pia li dandanli ki naa pia a tuona, li pia be fuoma? Naani o dandanli yeni baa fidi ki tindi o bi?

¹⁵ Li yaa tie yi siiga, ja bi pua luo ti tiayiekaadi ki go luo daali kuli bonjekaala,

¹⁶ ke yi siiga nni yendo yedi o: «Yaa kuni leni mi yanduanma, ki ban yeli mi fantama ki go je ki guo,» ama ki naa puni o yaala n tie o yema po tiladi, li pia be fuoma?

¹⁷ Li tie yeni leni li dandanli: li yaa pia a tuona, li kpe.

¹⁸ Ama niloba yaa yedi: «Fini a pia li dandanli, n mo pia a tuona.» N baa yedi o: «Waani nni a dandanli yaali n ki pia tuona, n mo n baa waani a n dandanli kelima n tuona yaa po.»

¹⁹ A daani ke U Tienu ye ki tie yendo bebe, a tieni ke li ŋani. Ama mu cicibiadimu moko daani yeni, ki jie ki digibi.

²⁰ Fini o yanluodaano na, naani a bua ki bandi ke yaa dandanli n ki pia a tuona tie fanma bi?

²¹ Naani ti yaaja Abalahama ki den baa li *moamoansaali kelima a tuona po wan den padi o bijua Isaaka li *padibinbinli po kaa?

²² A laa ke o dandanli den taani ki yegi leni o tuona, ke o tuona yeni mo den teni ke o dandanli ŋani ki dagidi cain.

²³ Yeni i Diani n yedi yaala tieni: «Abalahama den daani U Tienu ke U Tienu den coadi opo la ke li tie *teginma.» Bi den yi o U Tienu danli.

²⁴ Yi laa, o nilo baa li moamoansaali kelima o tuona po, laa tie kelima o dandanli bebe po ka.

²⁵ Li go tie yeni Lahaba li poconconli po. O den baa li moamoansaali o tuona po, kelima o den ga bi tondiba cangu ki teni ke bi tagi santo ki kuni.

²⁶ Lanwani, nani yaa gbanandi n ki pia naano n kpe maama, yaa dandanli n ki pia tuona moko kpe yene.